#مات_الكلام20
باعدت منه و ريحة عطره مهدئات عصبيه 🥺♥️..
قتله ح ننزل أنا ..
قالي لا نبيك خليك ..
مشى لي مكتبه فتح الدرج .. أعطاني ظرف فيه فلوس قالي جايني ضيف مهم .. خليك في مكتبي هنا و أعطي الظرف هذا لي السكرتيره ..
قتله أنا ؟؟ 😳
قالي ايه ايه أنتي و ما تطلعيش من مكتبي لين نجيك ..
طق الباب .. خشت أنسام ..
قاللها تعالي تأسفي منها ..
أنصدمت 😰😰 و قعدت نشوف لي مغيره ..
جت وقفت قدامي و قتلي أنا آسفه ..
طلع مغيره و نزل قاعة الاجتماعات ..
أنا متوتره 😰 شن بنتصرف معاها هادي !!
قتلي أستاذ مغيره قالي مزنه تبي تتفاهم معاك 😏😏 ...
خديت نفس 😌 و قتلها الظرف هذا ليك 🤗 تفضلي ..
خداته فتحاته لقت فيه فلوس ..
تفاجأت أنسام 😨😨 و تفاجأت حتى أنا معاها 😳😳..
قتلي شن معناها هادي ؟ معاش بنخدم هنا ؟ ..
قتلها مش أنا الي نقرر 🤗 انزلي تحت و لما يكمل مغيره اجتماعه هو يتصرف ..
قربت مني و قتلي مغيره صار !! 😠
جيتي أمس يا حقيره و بي تلزيني اليوم ؟
قتلها انزلي ..
محلاه كيف جابها تتأسفلي 🤭♥️ يعني و كأنه يقوللها الزمي حدودك معاها و مزنه خط احمر .. تصرف يخليك تحبي نفسك 🥺♥️
طلعت أنسام من المكتب و أنا مقعمزه نقول ليش بيستغني عن خدماتها 🤔 !!
الكمبيوتر مفتوح على صفحته في الفيس ..
أممممم ليش أنا ما عنديش فيس 🤔 تو لما ننزل نقول لي حنان تفتحلي واحد ..
اتكيت ع الكرسي ..
محلاه حضنه 🥺♥️ ليش اللحضات هادي قصيره 🤨
😳😳 موعد الدواء متع رقيه ..
اتصلت بي حنان و قتلها دواء رقيه في الشنطه أعطيها منه توا .. قتلي تمام به ..
قعدت في المكتب .. مره نقعمز و مره نوقف في الروشن ونتفكر أول مره جيت فيه الشركة هادي .. لين ركب مغيره ...
قالي عطلت عليك ؟
قتله هلبا 😉 ..
ضحك و كأنه فهم قصدي ...
سكر الباب و خش ... شدني من أيدي و قالي روحي خلاص ع الأقل رقيه ترتاح ...
قتله أنسام معاش بتخدم هنا ؟
قالي ايه ...
قتله ليش خليتها تتأسف مني ؟ و ليش بتستغني عليها ؟
قالي الي يمسك يمسني .. و الي يوصل فيك يوصل فيا ..
زاد قرب مني و قالي ما تشغليش بالك بي الأمور هادي ..
قتله و الموضوع الي صار يومها كيف عرفته ؟
قالي كيف مدير شركة و ما نعرفش شن يصير فيها ؟ 😉..
قعدت ساكته نشبحله 🥺
قالي في كاميرات في المكاتب كلهم ..
قتله 😳😳 تشوفوا فينا شن نديروا ؟
ضحك و قالي لا لا .. بس في مشكله زي هادي نستحقوهم 😉
قتله معناها أنا نمشي توا ..
قعد شاد أيدي و قالي ردي بالك على روحك 🥺♥️..
نزلت و أول ما خشيت للمكتب لقيت حنان تصور في رقيه ..
قتلها ليش تصوري فيها ؟
قتلي ههههه من كثر ما نحكي عليها لي أمي بتهبل تبي تشوفها ..
خديت رقيه و طلعت .. و أول ما ركبت تاكسي .. لحضه لحضه 🤚🏻 ..
مش أم حنان ميته !
دماغي مشوش و نفكر في موضوع خنبة الحديده .. ليش هاربه يا مزنه ! .. ليش ما تواجهيش ؟ .. قررت نمشي لي حوش بوي ..
عندي قوة أستمديتها من مغيره ممكن 🤷🏻♀️
وصلت و طقيت ع الباب فتحتلي موده و عيونها فيا 😒😒
خشيت داخل سلمت على أمي و بعدها خشيت دار عماد و طبست عليه في سريره و قعدت نحضن فيه و نبكي و هو يبكي معاي 😢💔
مش عارفه ليش نحس فيه هو بس الي حاس بيا .. و لو صح لي عماد يكون بطل الروايه هادي شن كان حكى علينا و هو يراقب في كل وحده فينا من فراشه و هو عاجز ! 🤷🏻♀️
بعدها طلعت قعمزت مع امي و موده .. قتلهم أنا خانبه حديده من أم حسن ؟
قالولي المرأه هكي قالت ..
قتلها و أنتي صدقتيها يا ماما ؟ ما تعرفيش بنتك ؟ ما دافعتيش عليا ؟ و لا لأني هربت من حسن و من الماضي الاسود معناها انا نخنب و ندير كل شي خلاص ؟؟
قتلي باش عندك تخلصي ايجار ؟
قتلها من مرتبي ..
قتلي توا كيف خدمتي انتي ..
قتلها المهم انا ما خنبتش ..
قتلي موده حماواتك و سلفتك شهدوا و قالوا شفناها طالعه من الدار ..
قتلها أهااا ليك سنين تعرفيهم يا موده و ما عمركم صدقتوهم .. توا بس صدقتوهم ؟
قتلي احنا ما صدقناهمش لكن نبوا نديروا حل للموضوع ..
قتلها موضوع شنو الي تبي اديري حل فيه و انتي تقوليلي ردي أمانة الناس !!
طق باب الحوش .. مشت بنت موده بتفتح الباب .. شكون الي جى ؟؟
خش حسن .. معاه عمي و راجل مفيده أخته ..
أنصدمت 😳😳
تلفتت لي أمي .. قتلها أتصلتي بيه ؟؟ 😰
قتلي خلي نحلوها الخرافه هادي .. تبي تطلقي ارجعي هنا حوش بوك و فكيني لا خدمة لا دوه فاضيه .. تبي تقعدي في شقتك اهو راجلك مستعد يروح معاك ..
قعدت نقوللها ليش هكي يا ماما ! 😰😰
قعمز حسن .. يقدم في وعود ليها أول ما ليهاش آخر ..
أسهل شي في ليبيا الزواج .. و أطول 👌🏻 أطول ها مش أصعب 🤚🏻 اطول شي في ليبيا الطلاق ..
ما تطلقي لين تضيع منك اجمل سنين عمرك ..
حسن يقول لي عمي هي ما طلبتش الطلاق الا لما بدت تخدم .. أنا خدمتها هادي مش خاشتلي دماغ ...
كلهم جوا ضدي و كل واحد يحكي من جهة .. و ليش توا بالذات طلبتي الطلاق ! ..علاش مش من قبل ما طلبتيش الطلاق ! .. هادي الخدمة الي ذهبتلك شيرتك ..
🤦🏻♀️🤦🏻♀️🤦🏻♀️
هي حياتنا مراحل 👌🏻 و كأنك تقولي ليش الله عز و جل ما بعتش محمد عليه الصلاة و السلام على طول بالدين الأسلامي ! و ليش كانوا في قبله رسل ؟؟
هي حياتنا مراحل .. و في كل مرحله قرارك يختلف ع المرحله الي قبلها لين تعذري نفسك خلاص في اخر قرار 🤚🏻🤷🏻♀️
و في داخلي نقول في النهاية راجلي و أب رقيه .. بدليل جى للعياده و خلص التكاليف كلها و اطمن على بنته من غير ما يزعجني ..
و بعد هلبا كلام و وعود بالجنه ..
تلفتت لي حسن .. قتله خلي امك تفتح محضر عادي أنا ما درت شي ..
بس دير في بالك اني مش مستعده نحرم رقيه من بوها بكل
بس أماليك على قطع رقبتي نخش حوشهم ..
قالي الي تبيه انا فيه ..
نضت نبي نطلع و أنا حاسه بي لوم على امي .. ليش كلمت حسن و قتله مزنه هنا ؟
قتلي امي استني راجلك يروح بيك ..
نضت طلعت و لحقني حسن .. و رقيه في حضني و نقول في داخلي ع خاطرك يا روحي .. ع خاطرك يا طفلتي ..
عقد قرآن أحنا وقعناه 👌🏻 مش ذنبك أنتي تدفعي ثمنه 🤷🏻♀️
ركبت السياره و أنا نقول شن جابني بس 🤦🏻♀️..
عادي يا مزنه عادي كله تدابير ..
ركب حسن و هو يخفف في دمه مع رقيه ..
قعدت ننعت فيه في الحوش .. و روحنا الشقه و هو فرحان تقول هو الي مأجرها ..
نحيت حوايجي و قالي شن رايك نهدرزوا شويه .. قتله شوف حسن 👌🏻 أنت في حالك و أنا في حالي 🤚🏻.. أعتبرني مفيده و لا حميده اختك .. اعتبرني أمك .. أعتبرني أي شي المهم أنت في حالك و أنا في حالي ..
قالي تو تهدي و تمشي الامور 😜..
مبردك و مبرد دمك 😏 ..
طلع من الشقه ..
اتصل بيا مغيره يسأل على رقيه ...
ارتبكت و خفت من الجاي .. خفت يجي .. خفت يعرف أن حسن معاي في الشقه ..
حسيت روحي تورطت 😰😰
قتله تعبانه و بنخش الدوش و بنرقد .. قالي ردي بالك من الحراره تفقديها مره مره و خلي أختك تبات معاك ..
قتله تمام به ..
قعمزت أنا و بنتي .. روح حسن و جايب معاه بساطات و منادير و حاجات للحوش ..
نضت نفرش فيهم .. قالي جبت غاز و جبت عوالة مطبخ ..
خش حسن يطيب في مكرونه .. ريحتها جت في خاطري 🥺♥️
مش عارفه ليش بس كل شي يجي متأخر 🥺♥️ ليش نتغيروا بعد فات الفوت ! ...
طابت المكرونه و جاب السفره حسن و مداير حتى سلاطه معاها ..
قعمزت تعشيت لين عرقت ..
و رقيه كلت منها لين شبعت و بعدها نضت بنغسل الحوسه .. قالي لا خليها تو نضمها انا ..
خشيت فراشي انا و بنتي و حسن رقد في الدار داخل ... الفجر نسمع فيه يصلي .. قعدت في فراشي لين طلع الصبح نضت بنمشي للخدمه قالي خلي رقيه معاي .. و تو نوصلك انا ..
قتله كيف 😰
قالي بنوصلك شن كيف !
قتله به ..
طول الطريق و انا نخمم في مغيره مرات يشوفني نازله من حسن 😰😰
بعتت رساله لي حنان ( أستاذ مغيره جى الشركة ؟ ) ...
ردت عليا برساله ( لا مزال ما جاش )
يارب نوصل قبله يارب 😰 أنا ليش دخلتها في بعضها هكي بس 🤦🏻♀️
وصلت الشركة و نزلت بسرعه نبي حسن يمشي .. خشيت صبحت على حنان و بديت في خدمتي .. جى مغيره الساعه 10:00
كلمني قالي أركبي نبيك .. ركبت ..
و طول جى وقف قدامي و قالي أستاحشتك 😉 ......
أنا 😳😳
الا اليوم يعني ! 😰😰
قتله مغيره 🤚🏻🥺♥️
أستغرب فيا 🥺
قتله أنا ........... 🥺🥺 قعدت ساكته .. معاش عرفت شن نحكي و شن نقول ..
قالي نبيك جنبي .. نبيك هنا معاي في المكتب .. نبي كل ما نتلفت نشوفك ..
و غمض عيونه و قرب مني يبي يبوسني ..
تخايلت حسن طول ..
دفيته و قتله لا مغيره 🤚🏻🥺
قالي أوكى أنا آسف 😉..
و في داخلي نقول عاود تاني و مش ح نخليك تتأسف بكل 🥺♥️
شدني من أيدي و قعمزني ع الكرسي و هو قعمز مقابلني ..
قالي أنا نعرف ان موقف أنسام مش ح يتنحي من بالك .. و مش عارف كيف نقنعك اني ما نحبهاش و ما فيش شي بيني و بينها بكل 🤷🏻♂️ ..
قتله ليش نحس ان القرب منك حلو هلبا 🥺♥️ في الوقت نفسه يخوف 🥺💔
نزل راسه متضايق و بعدها قام عيونه فيا و قالي انتي في فتره صعبه و مشاعرك ملخبطه .. لكن كل الي نبي نقولهولك أنك شاغله تفكيري في كل وقت 🥺♥️
قتله نبي ننزل ..
قالي به أوكى أنا معاك لين تبدي حره ..
نزلت و قعدت مقعمزه في المكتب .. كلمني حسن قالي انا جايك .. خفت مغيره يشوفه 😰..
قتله انا بنمشي للمحل في الشارع الي ورانا تلقاني غادي ..
طلعت من الشركه و مشيت للمحل و جى حسن روح بيا ..
و في الطريق خديت هلبا قرارات .. رقيه في حضن بوها تلعب عليه .. المشهد كفيل انه يخليك تباعدي فكرة الطلاق من بالك ..
قررت معاش نمشي الشركه تاني و نختفي من حياة مغيره .. كان القرار هذا أصعب قرار ممكن ناخده في حياتي ..
روحنا الشقه .. و جيت لي حسن قتله مش ح نخدم في الشركة تاني ..
قالي معناها هيا نمشوا حوش اماليه من توا ..
قتله ليش ! 😳
قالي و كيف بنخلصوها الشقه ؟
قتله اعطيت لي رقيه دواها ؟ ..
قالي دواء شنو ؟ علاش هي رقيه مريضه ؟ 😳
قتله كيف دواء شنو !
قالي ايه دواء شنو ! 🤷🏻♂️
قتله ليش أنت ما تعرفش أن بنتك كانت راقده في المستشفى !! ..
قالي رقيه كانت راقده في المستشفى ! 😳
به ليش يا مغيره ؟ 😰 ليش كل ما نبي نبعد تردني مواقفك ؟ 😰
أنا نبي نمشي صح .. و الله تبي نمشي صح 🤦🏻♀️💔
No name ♥️🌺
