رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 15🔥
حطولي فطور في المكتب .. و سكرت حنان الباب و قعدت تلعب مع رقيه ..
جعانه بس مش خاطري ناكل بكل ..
وصلتني رساله .. ( كولي ع خاطري ) ..
حطيت التليفون و نضت وقفت ع الروشن .. حنان تسأل فيا خيرك شن في ؟؟
قتلها خايفه نكون حامل 😔..
قتلي قاعده صغيره و تربيهم مع بعض ..
رن تليفونها .. ردت ..
شكله خوها رد عليها بخصوص الأيجار .. تلفتت منتبهة لي كلامها ..
سكرت الخط و قتلي في شقه جهتنا صاحب الشقه ع خاطر خوي بياخد منكم كل شهر و شهره ..
قتلها تمام 😍 اعطيني رقم صاحب الشقه ..
قتلي اهو خوي بيبعتهولي و نعطيهولك طول..
اووووف دووخه تاني 🥺🥺
قعمزت و هي تحلف فيا ناكل .. و أنا نقوللها به تو ناكل ..
جت أنسام .. خشت طول جيهتي أنا .. قتلي ع أساس دايخه و مريضه ! 😠
قتلها و أنتي شن دخلك ؟ ندوخ و لا نموت 💁🏻♀️
قتلي حركاتك هادي ياما درت منها و فوتيه ع غيري ..
أنا 😏
زادت قربت مني و قتلي معاش نلقاك راكبه فوق بكل .. و بالك تحسابيه بيتلفت لي وحده زيك راس مالها عبايه وحده كل يوم لابستها ..
🤦🏻♀️🤦🏻♀️ قتلها اطلعي برا ..
قتلي نعممممم !!! 😠
قتلها اطلعي برااااااا 💁🏻♀️
قتلي يا أنا يا أنتي في الشركة هادي .. و طلعت من المكتب ..
حنان تقولي حي حي حي 😱 .. تو بتركب لي أستاذ مغيره ..
تهربي من مشكله في حوش اماليك تحصلي في مشكله في حوش اهل راجلك .. تهربي منها تحصلي في مشكله في خدمتك ..
🤷🏻♀️💔
نسمع في صاحب مغيره يحكي في التليفون .. قتلي حنان شفت أنسام 😳 خشت للمطبخ ..
قتلها يعني ما خشتش لي مغيره ؟
قتلي الواضح لا ..
قتلها شوفيلي تليفونك وصلك الرقم او لا ؟. .
أعطتني الرقم و طول اتصلت بيه .. قتله انا الي بنأجر الشقه .. قالي تاخدي مفتاحها غدوة بأذن الله ..
سكرت الخط .. و نفكر كيف بنقنع حسن بي الشقه !!
أنا و الله ما نعرف ليش الشركة هنا يعطوا فيا في مرتب ! 🤔
جى مغيره و وقف في باب المكتب و هو أيديه في جيوبه و يشوف لي سفرة ..
نزلت راسي و تجاهلت وقفته ..
طلع من الشركه و هو يتصل بيا .. رديت عليه .. قالي ليش ما تاكليش ؟
قتله تقدر تعاملني گ موظفه رجاءً ..
قالي لا ما نقدرش ..
نسمع في صوت صاحبه جنبه .. كيف يحكي معاي قدام صاحبه هكي عادي !!
قلت حاضر و سكرت الخط ..
الضهر جى حسن بيروح بيا .. نتمنى الطريق تزيد تطول أكثر باش نتشجع و نفتح معاه موضوع الشقه ..
وجهه مقلوب اليوم مش بالعاده 🤔
قتله حنان زميلتي خوها حصلنا شقه .. قالي لا لا لا لا ما نقعدش في أيجار و حوش بوي مفتوح ..
نرفزني 😠 قتله اوقف السياره و نزلني هنا ..
قالي نعم !! 😳
قتله نزلني هنا و امشي عيش فيه بروحك حوش بوك ..
قالي هبلتي أنتي ؟ 😠
قتله وقف السياره خير ما نعيط و نديرلك العار ..
و وقف السياره صح .. بس وقفها قدام حوش بوه .. و قالي انزلي ..
نزلت و خشيت و أنا مستهزبه لا كرامه لا شي ..
مقعمزه في الدار نفكر كيف بنطلع من الحوش ؟؟
به الراجل متع الشقه قالي تعالي غدوة استلمي المفتاح ..
وين بنمشي من هنا لي غدوة ؟
عماد .... أستاحشت عماد هلبا 🥺♥️
مغيره يتصل .. ما رديتش عليه ..
بعتلي رساله ( طمنيني عليك نفكر فيك من بكري )
...............
ما فكرت فيا أمي بتفكر فيا انت 🤦🏻♀️ ! ...
ما فكرت فيا اختي بتفكر فيا انت 🤦🏻♀️!.....
ما فكر فيا راجلي الي قهرني قهر بتفكر فيا انت 🤦🏻♀️!....
هكي تحسي أن الولاء مش للعائله لا لا ..
الولاء للناس الي تحبنا و تضحي ع خاطرنا حتى لو كانت غريبه ..
مقعمزه في الدار و رقيه راقده .. شكلهم يتغذوا برا .. توا هادي حياة ؟
شن هالقسوة الي فيك يا حسن ! شن الي غيرك هكي ! ..
خش حسن و قالي جاتك أمي تنادي فيك ع الغذاء خيرك ما جيتيش ؟
قتله كذب ما جاني حد ..
قالي أمي تكذب ؟؟
سكتت ما نبيش أناقشه ..
نضت وقفت .. قتله تعرف 👌🏻 أنت توا تعامل فيا هكي لأنك زابط أمي لزتني و ما عندي وين نمشي.. بس مش رجوليه هكي تتعامل معاي ..
شدني من أيدي و قالي تعلميني الرجوليه كيف 😠 ...
نحيتله أيده و قتله تعرف ليش أمي لزتني ؟؟
لزتني لأنك جيت رقدت معاي .. و فتحتلك حوش بوي .. لزتني باش انت اتدير حل مدامك تبي مرتك ..
أنا الي غالطه يا حسن .. و الله غالطه الي كل ما بناخد قرار .. ضميري يردني لاورا ..
قالي مدامك هكي تفكري معاش في خدمة و قعمزي هنا شدي حوشك ..
قتله كيف .. كيف ؟؟؟؟؟؟ 😳
قالي الي سمعتيه .. مش أمك تبيك تروحي مع راجلك باش تتحملي ظروفه .. تحملي ظروفي معناها ..
و طلع من الدار و سكرها بقوة ..
وقفت مصدومه .. 😳😳
شنو يعني !! ..
يبيني نقعد هنا نخدم امه و حميده و مفيده ؟؟
ناضت رقيه و طلعت بحدا عماتها ..
أنا نبكي في الدار داخل .. جعانه .. دايخه ..
رقيه نسمع فيها تضحك و تلعب برا ..
حتى أطفالنا ينكروهم علينا .. يكبروهم باش يبدوا أعداءنا ..
يزرعوا شي في داخلك مش لطيف بكل أتجاه طفلك لمجرد أنه يبكي يبي يطلع جنبهم ..
و لسان حالك يقول هادوا سبب همي و تكديري .. رقدت و تاني يوم الصبح نضت نبي نمشي للخدمه .. قالي لا ما فيش مشي ..
سكرت راسي بخوف و توتر و قتله نبي نمشي .. قالي لا ما فيش مشي ..
قعدت مقعمزه داخل ..
صحه ليها مفيده قلبتله راسه عليا ..
مغيره يتصل .. حنان تتصل .. درته صامت و حطيته في الشنطه ..
الساعه 11:00 جيت لي حسن قتله بنمشي حوش خالي قالوا مريض ..
قالي ساعه تانيه و نرفعك ..
عمارة حوش خالي فيها باب خلفي .. بمجرد ما نخش العماره ح نطلع من الباب الخلفي و نهرب منه ...
خديت أوراقي المهمة .. بطاقة تطعيم رقيه .. و طلعنا ماشيين حوش خالي ..
وصلنا و قالي خلي ندرس السياره بننزل معاك .. قتله لما تجي تروح بيا انزل شوفه ..
قالي تمام ..
نزلت من السياره .. في ضهري شنطتي و شنطة حوايج رقيه ..
قلبي يمى 🥺 قلبي .. بنموت من الخوف ..
خشيت العماره .. و من غير ما نتلفت وراي بكل طلعت نجري من الباب التاني .. نجري بخوف و بدموع و بأنهيار و بيأس و ضياع ..
عيون رقيه 🥺 يقولولي شنو في مامي ! 🥺🥺
و أخي ع الظرف و أخي ع الخدلان و أخي ع القلة و أخي ع كل شي ..
ركبت تاكسي و خديت التليفون نتصل بي صاحب الشقه .. قعد ينعث فيا و اعطيت التليفون للتاكسي يزبط النعته ...
و في الطريق نقول الحمدلله .. ايه الحمدلله ع راحتي .. الحمدلله ع عزة نفسي .. الحمدلله ع الطمأنينه ...
مشيت للشقه و خلصت التاكسي و نزلت ..
اعطيت لي صاحب الشقه ايجار شهرين و خديت المفتاح و خشيت الشقه ..
رقيه تجري مستغربه في المكان .. قعمزت في الصاله ع الزليز ..
يااااا رب أعني يارب ..
الشقه كلها زليز فاضيه .. بس في راحه عجيبه .. هكي تحسي روحك طلعتي من سجن الكل يتأمر فيه عليك ..
في راحه .. في راحه ..
قعمزت نعد في باقي الفلوس ... و شن بناخد و شن الضروري ..
طق عليا صاحب الشقه .. فتحت الباب .. اعطاني بساط و منادير و بطاطين ..
سكرت الشقه و نحيت الشفره من الجهاز قبل ما يكتشف حسن و قعدت نفرش في الشقه ..
صح مكاني مش هنا .. مكاني في حوش بوي .. لكن هذا يتوقف ع حب أمهاتنا لي نسيبهم ..
كان يحبوه مرحب بيك .. و كان يكرهوه غير مرحب بيك 🤷🏻♀️💔
يتبع ♥️🌺
