#مات_الكلام21
قعمزت حاطه أيدي ع راسي 🤦🏻♀️ 😰
مغيره هو الي خلص ! 😰
جى حسن قالي ليش رقدت بنتي في المستشفى ! و كيف ما عنديش علم انها رقدت ؟ و شكون رفعك ؟ و في أي مستشفى رقدت ؟ و من شنو مرضت ؟
...................
سأل الأسئلة كلها 🤷🏻♀️ الا الأسئلة الي متعلقه بي الفلوس 🤦🏻♀️
قتله حراره 😒
نضت بنعطيها دواها .. نسمع في تليفون حسن يرن .. طلع للبلكونه يتكلم ..
غريبه 😏 ..
بعدها قالي أنا بنطلع نخدم ع السياره ..
أتصلت بي مغيره و قتله ليش ما قتليش انت الي مخلص المصحه ؟ 🥺
قالي أممممممم 🤷🏻♂️ عادي وين المشكله ؟ و ليش بنقول ؟
قتله لا بس قالولي ان بوها الي مخلص ..
ضحك و قالي ماهو سألوني ع الأسم و خفت نقول اسمي لان اختك و راجلها جايين و مرات يعرفوا و نسببلك مشكله .. فما كانش قدامي الا أسم أب رقيه 🤷🏻♂️😄 .. عموماً ما تهتميش الموقف عادي 😉
قالي بروحك ؟
قتله ايه أنا و رقيه بس 🥺🥺 ..
قالي نجيكم نطلعوا مع بعض ؟
قتله أها 😳 هههه ايه نسيت أن جارتي بتجيني 😄😄 ايه هههه ..
قالي تمام أوكى معناها بنصبر لي غدوة و خلاص ♥️
قتله بنوض انا نجهز روحي ..
سكرت الخط و أنا مش عارفه نمشي للخدمة و لا نبطل منها ..
أختفي يا مزنه .. أختفي خلاص ..
غيري رقمك .. و بالنسبه للشقه تقدري تحولي منها بمجرد ما يتم الأيجار .. و تقدري تحصلي أي خدمة تانيه ..
هذا الصح ..
أهتمام مغيره مؤقت .. زيني زي أي وحدة حلوة خدمت عنده ..
قعدت نلعب مع رقيه لين جى حسن .. و قالي وتيلي حوايجي بنخش ندوش ..
نضت جهزت حوايجه و خش الدوش .. رن تليفونه .. عيوني في جهازه ..
و كأن في صوت داخلي يقولي نوضي شوفي شكون ..
نضت نجري خديت الجهاز و فتحته .. صوت الميه وقف .. يعني حسن كمل الدوش ..
رقم شكون هذا الي يتصل !!
حطيت التليفون و رجعت قعمزت ..
رقدت رقيه و جى حسن يبي يتقرب مني .. نفرته وقتله كانش و أنا ميته 🤷🏻♀️
قالي كانك تعرفي ربي حرام هذا الي تديري فيه .. قتله أعرفه أنت ربي و اصرف على حوشك و قد روحك ..
خش الدار و خلاني .. رن تليفونه .. خداه و نزل تحت العماره ..
نضت طبست من البلكونه .. لقيته مقعمز في سيارته يتكلم في التليفون ..
فاتت ساعه .. ساعتين .. قاعد يتكلم ..
خشيت رقدت و خليته و ركب الحوش متأخر ..
تاني يوم نضت متأخر .. قالي مش ماشيه للخدمه ؟ قتله لا معاش بنمشي ..
رن تليفوني .. لقيته مغيره 😳 قتله هادي البنيه الي تخدم معاي 😟 قالي حنان !
قتله ايه ههههه حنان 😰 .. طلع حسن و التليفون في أيدي 😰 سكري الشفره يا مزنه خلاص ما تضعفيش 🥺💔
بعتلي رساله .. ( يا نبعة الريحان حني على الولهان .. جسمي نحل و الروح ذابت و عظمي بان )
ليش هكي مغيره تزيد فيها عليا 🥺💔 و أصعب شي انك تفارقِ حلم بعد ما وصلتيله ..
أتصلت المحاميه 😱 نسيتها هادي بكل 😰 شن بنقوللها توا 😰
رديت .. قتلي أستاذه مزنه تم تحديد جلسه و تبو عنوان زوجك باش يعلنه المحضر ...
قتلها ايه بس هو تدخل عمي و راجل اختي و ع اساس بيطلق بي التراضي يعني ما فيش داعي للجلسه 😰 ..
قتلي معناها بمجرد ما تتفقوا على يوم للطلاق بي التراضي تعالوا للمكتب عندي و نتم انا الاجراء ... قتلها ان شاءالله حاضر به 😰
سكرت الجهاز و نحيت الشفره ..
حسن كيف عرف أسم حنان !!
زعمه أنا حكيت عليها ؟
العشيه جت جارتي بشرى ..
طول الوقت تفكيري مع مغيره 🥺♥️ أستاحشته و كلي حنين ليه 🥺♥️
قتلي يومها شفت واحد راكب لي شقتك ههههههه و عندي صاحبتي .. تعرفي قتلها هذا شنو نهار اسود رنج روفر تسوق في رنج روفر 😄😄
شنو الطرف هذا 😉
قتلها لا 😰 للللللكن هذا قريبي و مشيت عاينت بنتي بس 🤷🏻♀️😰
قتلي و صاحب التاكسي هذا شكون ؟
قتلها راجلي 😰 .. قعدت تهدرز على خدمتها في المزين .. قتلها تبي وحدة تخدم معاك ؟
قتلي ياريت من غدوة ..
روحت بشرى و نضت بنطيب عشاء .. طبست من المطبخ لقيت حسن يتكلم في التليفون في سيارته .. هذا خيره ! 🤔 أن شاءالله غير مش وحدة من أخواته تعبيله في راسه ..
سكرت الروشن و خشيت نطيب .. كملت العشاء و خشيت بنرقد و هو قاعد مقعمز في السياره ..
ركب بعدها .. قتله نحطلك عشاء ؟
قالي لا ما خاطريش .. تاعب و من الصبح نخدم ع السياره ..
أمممم معناها ما يعرفش أني شفته من فوق 😏 ..
خش الدار و نادى عليا .. قالي تعالي نبي نحكي معاك ..
غافلني و سكر الباب .. خفت 😨 و كأني بنتعرض لي أغتصاب .. شدني و حدفني ع المندار .. و بديت نعافر فيه .. ضربني كف .. دفيته و طلعت هربت منه ..
نرعش في فراشي بنموت .. صوت سنوني يضربوا في بعض من الخوف ..
دهشني 😰 بس الحمدلله ما مسنيش ..
ما قدرتش نرقد بكل .. متوتره و مش مرتاحه .. قلبي مقبوض ..
الصبح نضت و رقيه تلعب .. حسن شكله قاعد في الدار ما طلعش .. باب الحوش يطق ..
شكون الي جى !
نضت فتحت الباب .. لقيتها أمي و حسن 😳 .. خشينا داخل .. قتلي امي خيرك انتي و راجلك ؟
قتلها تي أنا نحسابه راقد داخل راه .. آمته طلع ؟ و آمته مشالك ؟ و آمته شكالك اصلا ؟؟
قتلي هذا راجلك و عنده حقوق عليك .. قتلها نعرف 😒
جى حسن قعمز و بكل جرأه 👌🏻قاللها مقصره معاي في الفراش .. و الشي هذا ما يتحملاش الراجل و كان بنتك ما تبينيش مش مغصوبه عليا نعطيها كلمتها و تمشي في حالها ..
أنا أنصدمت 😱
قعدت أمي تصبر فيه و تتأسف و تقوله صغيره و معليشي وووووو ...
ناض حسن طلع و قتلي بنت خالتك راجلها دار عمليه اليوم .. اطلعي و واصلي الناس ..
و الي اديري فيه مع راجلك معاش نبي نسمعه الملائكة تلعن فيك ليل نهار ..
طلعت امي روحت بعد ما حكت قداش خالتي تحملت راجلها .. و قداش عمتي صبرت على راجلها .. و قداش حناي عانت راجلها ..
به مش كنتي ما تحبيشي يا أمي حسن ! 🤦🏻♀️
روح حسن و طول مشيت حكيت معاه .. قتله ما تتحشمش تحكي مع امي هكي ؟
قالي مع شكون نحكي امالا ؟ مع خوك او اختك ؟
انقرفت منه وقتها .. قتله هذا الي يهمك انت ؟
قالي انا راجل و ما نتحملش الوضع هذا ..
قتله مدامك راجل نوض اخدم و خلص الشقه و حق دواء امك .. و لا راجل في الفراش بس !!
قالي تعرفي 👌🏻 ح يجي يوم و تندمي عليه الكلام هذا ..
طلع و خلاني و العشيه جى قالي خيره تليفونك مقفل ؟
قتله نسيته ما شحنته ..
قالي بتمشي حوش بنت خالتك ؟ قتله ايه ..
رفعني حوش بنت خالتي ..
مقعمزه بين الناس و هما يهدرزوا و انا تايهة 🥺 غريبه 🥺
هادي كوجينتها .. أنا لو عندي كوجينه هكي ح انوض الصبح بكري ندير فطوري 🥺
لو عندي كوجينه هكي ح نحب التطييب فيها ..
شوفي بساطاتها 🥺 تجيك النيه ترقدي عليهم 🥺 أنعم من البطانيه الي نتغطى بيها ..
زعمه شن شعورها و هي تملك حوش زي هدا ! 🥺
عندها مطبخ خاص بيها .. عندها دار نوم .. عندها صالون و جلسه تستقبل فيها الناس ..
🥺🥺
جى حسن روح بيا و انا في دوامه .. آمته نرتاح بس ..
قتله بكره موعد مراجعة الدكتور .. قالي ان شاءالله به ..
خشينا للشقه .. جى قعمز جنبي و قالي آسف ع الكف ..
ما رديتش حتى حرف .. أعطاني كيس صغير .. ما كانش عندي اي رغبه نفتحه او ناخده ..
بس أهو مجامله و خلاص ..
فتحته لقيت فيه دبله ذهب .. تلفتت له قتله شن هذا ؟ 😳
قالي ماهو بعتي دبلتك زمان لما مرضت رقيه .. قلت ناخدلك دبله جديده 😄
قلت في داخلي هذا ربي حبيبي يبي يقولي شكراً ع صبرك و تحديك نفسك و بعدك ع الحرام ..
خديت لبستها و قتله شكراً ..
رن تليفونه و قالي هذا واحد يبيني نوصله لكن فكيني منه 😄 نبي نقعد نسهر معاكم الليله ..
قتله جارتنا تخدم في مزين .. و طلبت مني نساعدها و بمرتب كويس ..
قالي مستحيل نوافق تخدمي في مزين ..
قتله و كيف بنعيشوا ؟
قالي نقولك من توا مزنه مزين لا 🤚🏻 و لو قدرت نوفق نخلص ايجار و لو ما قدرتش بنرجعوا حوش اهلي ..
قتله معناها وفق .. وفق يا حسن لأني و الله ما نرجع حوش اهلك على قطع رقبتي ..
و نضت خشيت الفراش .. رن تليفونه تاني .. طلع من الشقه .. نضت للروشن نبي نشوفه لقيته مقعمز في سيارته و يتكلم في التليفون ..
رجعت للفراش .. بعد أكثر من ساعه نضت نشوف من الروشن لقيته قاعد في سيارته و يحكي في التليفون ..
شن السر وراه ! 🤔
ركب حسن و خش طول رقد و ما قدرتش نشوف تليفونه .. و الصبح اول ما خش الحمام مشيت نجري نشوف في التليفون .. في جهاز تاني !! غريبه .. خديت فتحته و الجهاز قاعد في أيدي وصلتني رساله .. ( صباح الفل يا عمري )
عمري 😳🥴
منو هادي ! 😰
خديت الرقم و رجعت الجهاز في مكانه ..
طلع حسن من الدوش و قعمز في البلكونه يدخن .. أكيد عرف أني شفت الرساله لأنه ح يلقاها مفتوحه ..
بس تليفون شكون هذا ؟؟؟
ما كلمنيش بكل ..
طلع حسن و اتصلت أنا بي الرقم .. ردت عليا بنت .. هذا صوت حنان !!
قتلها انا مرت حسن .. سكرت عليا الخط ..
شكون هادي !
صوتها زي صوت حنان !!
و دقايق و كان حسن عندي ..
أمممم شكلها قالتله ..
قالي واحد من الزباين ناسي جهازه عندي 😄 .. قتله و الله !! 😒
قالي خودي انتي كلمي مرته ما نبيش نكلم حد انا .. قتله لا حتى انا ما نبيش نكلم حد .. قالي معناها نستناه لين يكلمني و خلاص ..
و استمر حسن في مكالماته .. بالرغم كل مره يتقرب مني بس قعدنا و كأننا اخوات عايشين مع بعض في نفس الحوش ..
و فاتت سنه و سنتين .. و شهر ندفعوا أيجار و شهر لا ..
رقيه اليوم عمرها 4 سنين .. بدت تفهم ..
اتصلت بيا أمي .. قتلي أم سلفة أختك توفت اليوم الجنازه ..
قتلها به الله يرحمها 😏 ..
قتلها لحضه لحضه 😳 أم شكون ؟
قتلي أم مروه ..
أم مغيره توفت 😰😰
قلبي تحرك من مكانه .. قتلها من بيرفعك ؟ قتلي بتخطم عليا موده ..
قتلها خلاص نتلاقوا غادي ..
دموعي ينزلوا بروحهم 😢💔 أستاحشته و غاب عليا لحضه .. أستاحشته و قاعد ساكن في داخلي .. كلمت حسن و جى رفعني .. هيا نبي نوصل .. هيا .. وصلت لقيت سيارة أسعاف ..
خشيت لقيت النعش في الصاله و كلهم يقروا عليها في قرآن و يبكوا ..
خش الازهر و خوهم الكبير و اولاد خوه طلعوا النعش .. و أنا ندور على مغيره بعيوني 🥺🥺
طلعوا بي النعش و قعدنا مقعمزين انا و امي و اخواتي لليل .. كل مره نخش نعاونهم في حاجة .. فقدت رقيه .. وينها زعمه ؟
طلعت ندور فيها في الجنان .. الصغار هلبا و كانت تلعب معاهم ..
الدنيا شتاء و الجو صقع .. دورت برا ما لقيتهاش .. صالة النساوين برا زحمه و الصاله الداخليه زحمه .. قتلي مسره بالك فوق ؟ قتلها عادي نركب ؟ قتلي عادي ..
ركبت الدور الفوقي كله ضلام .. درت ضي تليفوني ..
في حد راقد ع الصالون .. قربت لقيته مغيره و رقيه راقده في حضنه و مغطيها بي جيبوتيه ..
شن فيها لو حطيت راسي معاهم ؟ 🥺♥️ شن فيها لو تغطيت بي جيبوتيه ؟ 🥺💔 شن فيها لو كان الحضن هذا حضننا ؟ 🥺💔
قربت نحيت شعره من عيونه 🥺♥️ آآآه يا نسري قداش أستاحشتك 🥺♥️
No name ♥️🌺
