مات_الكلام 28
فتحت الشيشمه غسلت وجهي 😰 .. نحس بي حبل مربوط ع رقبتي .. دموعي من قلبي تنزل .. وجهي أحمر ..
قعدت نبكي و عاودت غسلت وجهي و طلعت للصاله .. لقيت أمي و مسره مهناش ..
قعمزت و لاحظ حسن وجهي كيف أحمر و عيوني دموع .. و نظرت عيونه 🥺♥️ يقولولي للدرجة هادي تحبيني يا مزنه 🥺♥️
سبحان الله 🤷🏻♀️ الي داخلك قداش صعب الناس تتكهن بيه ..
نزل حسن لي راجل موده تحت العمارة و خو حسن معاهم ..
حميده شاده تليفونها تكتب في رساله و ملامح وجهها متشمته ..
وصلت رساله لي مفيده .. قامت تليفونها تقرا في الرساله ..
حميده حطت تليفونها و هي مبتسمه 😌 .. مفيده رجعت كتبت رساله ..
قامت حميده تليفونها بتقرا الرساله ..
وقتها أستنتجت ان حميده كتبت الموقف الي شافاته لي مفيده .. غيبه بطريقه متحضره .. كنت نحس و كأني مكلبشه و ماشيه في ممر المحكمة الطويل هلبا و الناس كلها تصور فيا و تضحك و تتكلم عليا ..
كنت جالسه ع الجمر .. ما يحكوش معاي بكل .. لين جت بشرى و جايبه معاها العشاء .. قعمزت بشرى تهدرز معاهم و الغريب انهم زي الي ارتاحولها و ياخدوا و يعطوا معاها في الهذرزه ..
اتصلت بيا سميره .. و قتلي جاياتك في الطريق .. و لحضات و ناضوا بيرحوا أهل حسن ..
و أنا نقول الحمدلله يارب ..
أول ما طلعوا خديت التليفون و اتصلت بي مغيره .. قتله من بكري و انا حاطه تليفوني في جيبي و خايفه حد يشوف رقمك ..
قالي حد زي شكون 😠 !!
قتله أمي و أخواتي هنا ..
قالي أنا تحت العماره ..
قتله هبلت أنت 😡 ..
قالي ديري روحك بتمشي لي جارتك و انزلي شويه ...
سكرت الخط و أنا نندب 😰 قتلها بشرى مغيره جاي ..
قتلي قولي لي راجلك يركب ..
قتلها معاه راجل اختي 😰 .....
قتلي قوليله يركب بحجة انك خايفه عليه من البحث و و و ..
و انتي ع أساس بتركبي معاي شقتي ..
بعتت رقيه لي حسن قتلها نادي بابا .. جى حسن و قتله خليك هنا في الشقه لاني خايفه عليك 😰 .... قالي روح راجل اختك و انا كنت واقف مع جارنا .. قتله أهااا معناها خليك فوق هنا خير ..
قالي خايفه عليا يا روحي 😉 ..
رن تليفوني و هو في جيبي .. زدت توترت 😰 .. ما بيتش نرد ..
قلت لي حسن ح نركب شويه لي بشرى و بعدها نجيك ..
قالي ما تعطليش ..
طلعت طول لي شقة بشرى و كلمت مغيره .. انت شن تبي مني مغيره ؟ شن تبي مني ؟
قالي انزلي انا تحت ..
نزلت و ركبت معاه السياره و طلعنا من جهة العماره ..
درس مغيره و أنا نقوله تقدر تعتبر الي بيني و بينك صفقه و تمت خلاص بححح 👏🏻
قالي هذا هو ؟
هكي خلاص ؟
عندك حق مزنه .. صفقه صح 👌🏻 .. راجلك و بنتك ما لقوش فيك الخير بنلقاه انا ؟؟
لكن مش مغيره الي تلعب عليه وحده زيك ..
ضحكت 😄 و قتله ليش يوم عيد ميلادك مع منو كنت ؟
مع منو احتفلت ؟
مع منو كنت في حجرتك ؟
و أنا زي الغبيه نستنى فيك .. شن الحقاره الي فيكم هادي .. قبلها بليله كنت معاي ..
قالي البنت ما كانتش معاي .. نحلف بي رحمة أمي انها ما كانتش معاي و كانت مع صاحبي ..
قتله و حتى أنا توا أعتبرني بروحي و حسن مش معاي 😉
شدني من إيدي بقوة و قالي ما تلعبيش معاي مزنه .. ما تلعبيش معاي ..
نحيت إيده و قتله حتى الخدمه معاك معاش نبيها و فتحت الباب و نزلت قعدت نمشي في اتجاه العماره ..
ركبت شقة بشرى .. داهشه .. ريقي يابس .. لقيت سميره عندها ..
قعمزت نشرب في اميه .. قالولي شن في ؟
قتلهم لا ما في شي ..
قتلي سميره امته بترتاحي منه هذا ؟؟ و جاي قاعد عندك زياده 😏
قتلها شكون ؟
قتلي راجلك 😏 يطلب في التليفون من الشباب غادي و يكلم في وحده 😏
قتلها حسن ؟ 😳😳
قتلي أمالا شكون 😏 ! لوحي عليك البلى هو أنا الي عزوز ما نرضاش بيه و لا يحل لي عيني 😏 .......
أنا دايخه 😰 حسن في منو يكلم ؟؟
قتلي سميره بتمشي معاي لي السهريه ؟
قتلها سهرية شكون ؟
قتلي واحد معروف بنمشوا نسهروا بس و نظمي أمورك 😉
قتلها لا ما نبيش نوع هذا من السهريات 🤚🏻 ..
ضحكت عليا 😆 و قتلي ها شن تبي !! تبي تحبسي راجلك كل ما بتسافري بس ؟ 😉
حسيت وقتها بمساومتها ليا .. بس بطريقه غامضه ...
قتلهم بننزل شقتي أنا .. طلعت معاي بشرى للباب و قتلها أول ما تروح سميره تعالي بنعطيك أمانه خليها عندك ..
قتله به تمام ..
نزلت شقتي و قعمزت مع حسن و رقيه .. راقد ع ضهره و قايم رقيه برجليه يلعب فيها طياره 🤸🏻♀️ و يغني لها .. أغنية أفتح يا سمسم طيري طياره طيري .. طيري فوق البلدان .. طيري و معاي أصحابي طيري و معي نعمان ..
رقيه تقوله من نعمان 🤸🏻♀️؟
حسن يقوللها هذا صاحب بابا سمين 😆 ..
أنا مقعمزه نتفرج 🥺♥️ كنت في عمرها لما بابا توفى الله يرحمه .. ذاكرتي ما تحمل شي من تفاصيله ..
حسن يقيم فيها برجليه و هي في قمة الفرح ..
حاسدتها رقيه إن عندها أب هكي 🥺♥️ ..
بس كيف قدر حسن يطلع من البحث و نفسيته هكي !!
ع الاقل يخاف .. يخمم شن وراء حبسته ! .. يتضايق .. يخش في حاله نفسيه ..
ليش هو هكي بكمية الراحه هادي كلها ! ..
طق باب الحوش .. نضت بنفتح قالي حسن خشي داخل ..
قتله هادي بشرى أكيد .. قالي شن ما عندكش راجل يفتح الباب ؟
قعدت واقفه 🥺♥️ و موقف مغيره لما جى صاحبه سلم عليا و موقف حسن و هو يقولي خشي داخل 💔💔 ..
خش حسن الدار و جت بشرى قعمزت جنبي .. قتلها أنا صاحبتك هادي مش خاشتلي دماغ .. قتلي فوتيها ما تعدليش عليها ..
قتلها و كان تورطني في حاجة او تفضحني مع راجلي و اماليه ؟
قتلي ما عندها شي عليك خليها تملح ..
قتلها عندي طقم نبيك تخليه عندك .. فرحت بشرى 😍 و قتلي وخيتك عيب 😉 ..
نضت للدار و في شي يقولي اوقفي لا ما تعطيهاش الطقم 🤚🏻 .. هذا غالي و انتي ما تعرفيهمش كويس ...
به لو شافه حسن ؟؟ 😰
لو شافه حسن قولي متع موده او مسره خواتك 🤷🏻♀️ .. به أنا توا شن بنقول للمرأه بعد ما ناديتها ؟ 😰 ..
سألني حسن خيرك واقفه ؟
قربت منه و قتله بشرى جارتي عندها عرس و طلبت مني طقم .. قالي به ..
قتله عندي زوز .. واحد فضه و واحد متع موده اختي 😥
قالي ردي بالك 👌🏻 تعطي طقم اختك .. قتله به 😊 ..
ارتحت لان لو شاف حسن طقم الي اهداهولي مغيره ح يقول هذا طقم موده .. في الوقت نفسه ح نعطي طقم الفضه لي بشرى ..
خديت الطقم و طلعته لي بشرى و قتلها ما نقدرش نخليه عندي .. خليه في حوشك لين ناخده منك .. قتله تم خلاص 😉
نزلت بشرى و خشيت لي حسن لقيته يخمم .. قالي شنو الشناطي هادوا ؟
قتله حوايجي خديتهم من حوش بوي ..
قالي به ..
عيونه في السقف سرحان ..
قتله خيرك ؟
قالي السياره مشت رابش .. و مش عارف شن بنخدم و كيف بندير .. الشقه كيف بنخلص إيجارها ؟ ... كيف بنصرف ؟؟
قتله تفرج بأذن الله ..
قالي مرتبك بيسد إيجار و مصروف لين ندبر خدمه ؟؟
قتله مرتبي ؟ 😰
قالي هو حقك يقعد ليك أنتي بس .. لكن 🥺🥺🥺🥺🥺
قتله لا بس واخده أجازه من الخدمه و ممكن اتطول شويه 😰
قالي ليش الأجازه ؟
قتله لأنك كنت محبوس 🤷🏻♀️ ..
قالي ايه حق .. كيف عرفتي أني كنت محبوس ؟
توترت 😰 بلعت ريقي .. قتله خو بشرى هو الي قال ..
قالي بشرى جارتنا ؟
قتله ايه 😰 ..
قالي غريب 🤔 الي نعرفه أن بشرى مقاطعه أماليها ليها سنين ..
قتله بشرى ؟ 😳
قالي صاحب العماره يحكي عليها ..
زدت قربت منه .. قتله شن يحكي ؟
قالي مزنه 😬 تقصقصي فيا ؟ 😆
قتله قولي حسن هيااااا ..
قالي شن دخلنا بيهم احنا ..
قتله نبي نعرف شن قالك بس ..
قالي الي عرفته انها كانت متزوجة واحد و جابت منه البنات هادوا و كانت تصرف عليه و لما سافرت أمها للحج خنبت ذهب أمها و أعطتهوله و هو صرفه كله و سافر مصر و تزوج و طلقها ..
قتله بس أنا مره شفت عندها واحد في الشقه و قالت أنه خوها 😰..
قالي معاش تمشيلها .. و هي تبي تجيك عادي ..
قتله معقوله هذا كله يعرفوه الجيران على بشرى و انا ما نعرف شي ! 😰
قالي الرجاله ما يندس عليهم شي و الدنيا صغيره .. توقفي بالصدفه تهدرزي على واحد يطلع معرفه من زمان ..
لقيت عنده مصحف .. قتله من وين جبته ؟
قالي خديته من الجامع بكري 😄
طلعت للصاله .. نخمم .. علاش بشرى كذبت عليا بخصوص أماليها ؟
و كيف تخنب ذهب أمها ! 😰😰
هما الناس هادوا الي حياتهم خاربه .. ليش متوزعين في مجتمعنا زي الجرثومه يبو يخربوا حياة أي بنت متهنيه و مرتاحه !
No name ♥️🌺
