رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 11🔥
و أحنا مقعمزين خشت أنسام .. الوشاح طايح ع كتافها .. شعرها مصبوغ أسود داكن ..
رموش صناعيه .. ظوافر صناعيه .. عدسات .. لابسه خلخال في رجلها ..
مش عارفه ليش نخاف لما نشوفها .. نحس بقرف من لا شي ..
حطت أيدها في نصها و قتلي خيره أستاذ مغيره ؟
قتلها أركبي أسأليه منها تكسبي شوفته 😉
قعدوا البنات الي جنبي يضحكوا 🤭🤭
طلعت أنسام و البنات مشوا بياخدوا قهوة من المطبخ ..
شن سرعة الردود الي عندي هادي ! 🙃 و من وين جتني الجرأه نحكي معاها هكي !
و ليش مع حميده و مفيده لساني يتعقد !
و كأن كان عندي أحساس داخلي بالقوه أستمديته من مغيره ..
طلعت من المكتب لقيت راجل مقعمز ع طاولة مكتب أنسام يهذرز عليها و هي تضحك ..
خشيت للمطبخ قتلي حنان شفتيه الي برا مقعمز مع أنسام 😍 ؟
قتلها ايه شكون هذا ؟
قتلي هذا خو مغيره أسمه الأزهر .. متزوج و مطلق و أكبر من مغيره لكن دماغه مش متع خدمه ..
قتلها ايه ايه 🙄 بس هما ليش أسماءهم غريبين هكي !!
قتلي مش عارفه 🤭
قلت في خاطري الأسماء أسماء تاريخيه و هما أكبر منحرفين 🤗
قعدنا مقعمزين نشربوا في قهوة و خش الأزهر هو و أنسام بياخدوا قهوة .. خاش و يحكي ع حفلة أليسا الي حضرها في الأمارات .. و كيف صور معاها .. و أنسام تضحك و تاخد و تعطي معاه من غير رسميات ..
و في داخلي نقول التفاهة تنبع منه نبع 🥴 ..
طلعت خشيت للمكتب .. أنا مش عارفه ليش يعطوا في مرتبات هنا !
لا في خدمه لا شي .. في اليوم ممكن تطبعي رساله وحده بس 🤷🏻♀️
جت قعمزت معاي حنان ..
قتلي شكله مغيره عنده نيابه اليوم هذا علاش الأزهر جى ..
انصدمت 😳😳 قتلها نيابة شنو !
قتلي هنا في المكتب هذا كان تخدم معانا بنيه ماتت منتحره ..
حطيت إيدي على قلبي و قلت أعوذ بالله من الشيطان الرجيم 😰
قتلها ماتت هنا 👇🏻في المكتب هذا ؟ ..
قتلي لا لا توفت في حوشهم .. البنت الله يرحمها كانت علاقة مع مغيره .. و مره مره تجي معاها أختها تقرا كلية الطب ..
الباين إن مغيره دار علاقه حتى مع أختها بعدين ..
قتلها لا لا لا 😰😰 ...
قتلي هذا المسموع أحنا ما شفنا شي بي عيوننا .. لكن البنت الي توفت كان واضح انها على علاقه مع مغيره لان نشوفوا في هلبا مواقف هنا في الشركه .......
قتلها هو مقر شركه و لا مقر (.............) ...
قتلي هما حالتهم الماديه كويسه و عندهم هلبا شركات .. و البنت الحلوه الي تجي تخدم هنا يركبوها لي مكتب مغيره طول ..
قتلها ليش ؟ ...
قتلي كان عجباته يخليها تخدم معاه فوق لين يجيبها للطريق .. و كان ما عجباتاش يخليها تخدم معانا هنا ..
قعدت مصدومه 😰😰 ...
قتلي معليشي انتي جيتي تخدمي هنا عن طريق شكون ؟
قتلها مغيره خو سلفة أختي ..
قتلي معناها حطي في بطنك بطيخه صيفي .. أمورك متهنيه و مش ح يتكلم عليك حد ..
قتلها و ليش يتكلموا عليا ؟؟ ...
قتلي الموظفين كلهم هنا يعرفوا أنه نسواني و متع بنات .. و أي وحده تخش مكتبه و تعطل تبدا عليها الدوه ..
قتلها حنان أنتي صدمتيني 😰😰 ..
قتلي طول ما أنتي تخدمي هنا سكري ع اوذانك و فمك .. و الي تشوفيه بعيونك ما تقولي عليه لي حد ..
قتلها و شن جابرك تخدمي هنا ! ....
قتلي ما وصل فيا حد تشوفي في شكلي كيف .. و ظروف الحياة صعبه .. و مرتباتهم ممتازه و عندهم هلبا ميزات ..
كانت هي تحكي و أنا مصدومه في عالمي الجديد 😰 ..
قتلها و ليش النيابه تحقق مع مغيره ؟؟
قتلي لأن البنت انتحرت لما عرفت ان أختها علاقه مع مغيره ..
قتلها و أختها ليش اتدير هكي !!
قتلي عادي تتسلى و هدايا و الي تطلبه تاخده ..
طلعت حنان باش ترد على مكالمه ..
و لسان حالي يقول أنتي يا مزنه بتلفتي نظر رجل زي هذا ؟ ...
بنت انتحرت ع خاطره .. نهت حياتها .. خلت حسره في قلب أمها .. عاشت سكرات الموت المهم ترتاح منه ..
و هو يبوس في أنسام 🤢 .. لا عنده ظمير لا أحساس بالمسؤوليه لا شي .. قداش مقرف ..
نبي نبطل خدمه .. معاش نبي نخدم هنا .. ايه أحسن حاجة هادي نديرها ..
ح نروح و نقول لي حسن معاش نبي نخدم هنا ..
خش أستاذ صلاح قالي في ورقه عند السكرتيره سجلي فيها أسمك و وقعي ..
قتله حاضر ..
مشيت لي أنسام لقيت حنان عندها سجلت أسمها و وقعت حتى هي ..
كتبت أسمي و وقعت و طلعت أنا و حنان .. قتلها أول مره نوقع حضور ..
قتلي لا مش توقيع حضور هذا 😄 ..
قتلها شن هو ؟؟ 😳
قتلي عيد الأضحى مزال عليها 10 أيام .. هما كل عيد يعطوا لي كل موظف خروف ..
قتلها يخصموا من المرتب ؟
قتلي لا ..
قتلها بجد ! 😳
قتلي ايه بجد .. لان عندهم شركه تجيب في أضاحي العيد للدوله و هما يعطوا للموظفين ..
قتلها معناها صح عندهم أمتيازات ..
قتلي هلبا أمتيازاتهم .. تو تشوفي بعينك 😉 ..
جى حسن و روحت معاه ..
قتله حسن أنا معاش نبي نخدم ..
قالي علاش ؟ ....
قتله ما نفهم في شي .. كلهم عندهم لغه و شهادات الا انا 🥺💔
قالي عادي تو تتعلمي بشويه بشويه ..
قتله بديت مقصره مع رقيه ونروح تاعبه و انا مش واخده ع الطلوع هلبا ..
قالي تو تتعودي عادي ..
قتله به نشوفوا خدمه في مكان تاني مش شرط هنا ....
قالي هنا اقارب اختك .. يعني انا متهني عليك هنا لكن مكان تاني لا فكيني منه ..
بعدها بدا طول الطريق يقولي لازم تروحي قبل العيد و كيف بنعيد بروحي و العيد غالي السنه هادي مش عارف كيف بنلحق عليه و عليا ديون معاش عرفت كيف نقسم روحي و السياره تبي خدمت مطور و و و ... 🤦🏻♀️
و كل ما تاخدي خطوه في الأتجاه الصح 👌🏻 تردك الظروف و الحياة الصعبه ..
و في داخلي نقول أنا و الله ما عاد نبي نخدم هنا 😔💔
قعدت نمشي لي خدمتي عادي و ما تلاقيتش مع مغيره أبداً .. و دورة الكمبيوتر تبدا بعد عطلة العيد ..
قبل العيد بي ثلاثه أيام طلبوا من كل الموظفين يمشوا لمقر الشركه التاني و يستلموا الأضاحي .. كلمت حسن و قتله امشي استلم الأضحيه ..
قالي هيا به أهو بنمشي 😍 ..
في الطريق يتصل بيا حسن و يقولي وين المكان ؟
اتصلت بي حنان و سألتها .. قتلي في وادي الربيع مشى خوي لانه يعرف المكان تو نتصل بيه و نسأل ع النعته .. كلمت حسن و قتله راهو المكان في وادي الربيع و تو تقولي البنيه ع النعته بالزبط ..
مشى يومي كله و انا نتصل بين حنان و حسن و ناخد النعته من هنا و نعطي النعته من هنا ..
هذا كله باش ناخدوا الأضحيه ..
و وصل حسن و خدا أضحيته و يكلم فيا يقولي أهو جاي 😀..
و لما وصل و نزل الخروف من السياره و حطه في الجنان قعد يربط فيه ..
طلعت امي تشوف فيه .. قالت لي حسن و ان شاءالله هذا كله و الخروف مستورد مش وطني ! 😏 ....
قاللها حسن كله يضحي يا حاجة 😄 و المستورد ياكل من الطبيعه غادي و الله أنظف من هنا بمليون مره .. هنا ياكلوا في شكاير النايلون و بقايا السيجار و الذره ..
قتله أمي باهي به ..
مش عارفه ليش أمهاتنا مش مقتنعين بفروقات حياة بناتهم ! 🤔
هادي حياتها مستريحه .. و هادي تخدم باش تلحق ع مصاريف الدنيا .. و هادي راجلها ما يبيهاش تخدم برغم ظروفه الصعبه .. و و و و ..
ليش يبونا كلنا زي بعضنا !!
ليش يقارنوا فينا ببعض أصلاً 🤷🏻♀️ ..
في يوم العيد نضت الصبح بكري نجهز في كل شي في الجنان ..
جى حسن من صلاة العيد .. و جايب معاه خضره كامله و صناديق مشروب ..
و غير حوايجه باش يذبح ..
رقيه تشوف للخروف 👀 و تخش تجري تهرب ..
و لما ذبح حسن توقف تتفرج ع راس الخروف 😳 و تشوف لي لسانه و فجأه تجري و تعيط 😭 .. ناخدها في حضني و نبوس شعراتها ..
كان عماد مقعمز في كروسته و يضحك عليها ..
أول مره نحس أن ليا دور .. أول مره نحس أن فرحت بنتي بي ضحية العيد ..
أول مره نحس أني نعطي ..
انا و امي بدينا نديروا في العصبان .. و حسن يشوي هو و عماد ..
خلاص معاش مكاني بين حميده و مفيده .. كل يوم بديت نتأكد أني مستحيل نرجع نعيش عندهم ..
هكي حياتي تمام أنا ..
بديت مقتدره .. بديت نعطي .. ايه هكي أنا مرغوب فيا توا حتى من أمي 🤷🏻♀️💔
———————————-
جايبين فطورهم سفنز .. شوفيهم كيف متناسيين تماماً أنهم في عزاء ..
لازم تعرفي أنك قيد النسيان .. لازم تعرفي أن مش ح يحزن عليك حد الا أمك كل ما تتفكرك ح تبكي .. أما باقي الناس ح تجف دمعتهم عليك ..
و فجأه 🤚🏻 و بدون أي مقدمات ح تلقي الناس كلها تحكي بالدين و تقولك الحزن ثلاثه أيام بس 🤚🏻 .. باش يعطوا مبررات لنفسهم يخشوا صالات و يمشوا أعراس ..
ما فهمتش علاش حسن و أمي ما يبوش يقدموا بلاغ بقتلي ..
كيف مقتنعين أني منتحره !!
زعمه خايفين من دوة الناس ؟
به و حقي ؟؟
—————————يتبع ♥️🌺
