مات_الكلام38
سكرت الخط و بنتي فرحانه بي أدواتها المدرسيه .. و أنا عقلي عند عمتي غزاله ..
خدت مني قلبي ..
قعدت رقيه تلعب بي الطين و انا نسفرلها في كراساتها و نديرلها في ورقة الأسم 🤪 و مره مره نحس بمغص قوي ..
أتصل حسن .. ردت عليه رقيه .. قاللها أنا تحت نستنى فيك ..
أعطيتها شنطتها و حاجاتها و طلعت رقيه روحت .. طبست نشوف من الروشن لقيته عنده سياره .. أستغربت و مشيت نبي نسكر باب الشقه لقيته يطق .. قلت هادي أكيد رقيه نست حاجة ..
فتحت الباب .. لقيتها ناديه .. قتلي سامحيني و راس وخيتي غير أمي شارقه بيك ..
قتلها كيف شارقه بيا ! 😳
قتلي تعالي شوفيها شويه .. قربت منها .. فتحت أيديها الزوز و قتلي تعالي ..
مشيتلها و كأني طفله في عمر رقيه ..
قتلي أقعدي عندنا الليله .. ضحكت و قتلها حاضر به ..
قتلي روحتي و أنتي واكله كبدي يا حايره ..
تعالي نحكيلك ..
حطيت راسي ع رجليها .. و صغار ناديه داروا عليها دوره يبو يسمعوا القصه ..
بدت تظفرلي في شعري و تقول : ...
سبع صبايا 👌🏻في قصبايا أنلود أنلود وناكلهم 👏🏻
هذا يا حنّه يا منّه زمان كان في راجل عنده سبعه صبايا ..مرته ماتت و خلتهم لي بوهم يربيهم و يدير باله منهم و كانوا هدوكا الصبايا سمحات ..
وفي يوم من الأيام جى هداكا الراجل لي بنياته و قاللهم بنمشي للحج .. و مشى جابلهم حطب و ماكله و شراب تسدهم لين يروح ..
ربط هداكا الكلب قدام حويشه و وصى بنياته ما يفتحوا الباب لي حد مهما يكون ..
و في يوم يا حنّه استاقظ هداكا الغول سمعنا و سلمنا ياالله في الخلى يدور شن بياكل و هو سامع من دوة الماس ان في سبع صبايا سمحات بروحهم في هداكا الحويش و ناض الغول ماشي لي حوش الصبايا و هو يغني
سبع صبايا في قصبايا أنلود أنلود ونأكلهم ...
لين نخلع الغول من هداكا الكلب حشاكم الي رد عليه و قاله ..
سيدي وصاني عليهن والله والله ما تذوقهن ...
رد عليه الغرل و قاله ..
يا كيدي على ركبي.. يا نبيح الكلب علي ..
بدا الغول يخمم كيف بيخش للصبايا السمحان و ياكلهن من غير ما الكلب يديرله حاجة ..
ناض الغول تاني يوم و هو لابس قفطان و رداء و مشى طق ع البنيات و قاللهم انا خالتكم ..
قالوله البنيات لا ما نفتحن الباب هكي بابانا وصى ..
قاللهم انا بوكم بعتني و انا خالتكم باش نتطمن عليكم ..
بدا هداكا الكلب ينبح حشاكم و ردوا البنيات من وراء الباب و قالوا للغول الي يحسابوه خالتهم تعالي في الليل باتي عندنا ..
حت البنت الصغيره لي وخياتها و قالتلهم راهو هادي مش خالتنا .. ضربوها اخواتها و ذبحوا الكلب ... و رموه في الخلى ..
رجع الغول في الليل و هو يغني ..
سبع صبايا في قصبايا نلود نلود و ناكلهن 👌🏻
المره هادي لقى الملب ميت و ملوح في الشارع .. رد عليه الملب و هو ميت و قاله ..
سيدي وصاني عليهن والله والله ما تذوقهن ..
خاف الغول و قال للبنات من وراء الباب احرقوا الكلب قبل ما نجيكم ..
خدت البنت الصغيرة ودينات الكلب قصتهم و دستهم في الحوش داخل و مشوا اخواتها حرقوه ......
بدا كل ما يجي الغول يسمعه الكلب و يرد عليه
سيدي وصاني عليهن والله والله ما تذوقهن ..
لين مشوا البنات و حفروا حفرة كبيره و ردموا فيها ركاد الكلب حشاكم ..
روح بوهم من الحج و حكتله البنت صغيره كل شي ..
مشى بوهم حفر حفرة قدام باب الحوش و غطاها بالحصيره و القش ..
جى الغول يغني فرحان بدفن رماد الكلب .. سبع صبايا في قصبايا نلود نلود و ناكلهن ...
🤷🏻♀️
الغول كان يبي ياكل الصبايا لكن خاف من حارسهم الكلب .. و كل وحدة فينا عندها حارس .. بوك .. خوك .. راجلك .. امك ..
خلاهم هما يتخلصوا منه بي إيديهم لين يلقى الساحه فاضيه و يخش يلتهمك ..
هكي شيطانك 👌🏻 يتمكن من داخلك من ضعف ايمانك و تفكيرك و قلبك ..مش من جسدك .. كل مره حيلة لين تطيعيه ..
بس لو فكرتي شويه بس ح يطيح قرينك في نفس الحفره ..
و أعطاني أمي غزاله درس بحكايتها مش ح ننساه طول عمري 👌🏻
♥️🌺
خداني النوم و فقت من مغص في معدتي لقيت ناديه مغطيتني و خالتي غزاله 🌺 في جنبي تسبح 📿
شن ندير أنا في حوش الناس 🥺 وين أمي ؟
وين حوشنا ؟
و أخواتي ؟
عاودني المغص تاني .. تحشمت انوض من فراشي .. قعدت في مكاني لين جى الصبح .. نسمع في حركة ناديه في المطبخ و نشم في ريحة القهوة ....
طبست علينا في الدار لقتني فايقه .. خشت بي سفرة القهوة ..
قعدنا مقعمزين نهدرزوا لين جت الساعه 10:00 قتلهم بنروح أنا ..
نضت روحت الحوش .. ما نبيش نشوف تليفوني .. ما نبيش نشوف المكالمات ..
بنجهز روحي بنمشي لي مدرسة رقيه .. أول يوم في المدرسه ..
جهزت روحي و طلعت .. رجع المغص تاني 🤢 زعمه نمشي نعاين !
لا لا أكيد برده ..
مشيت لي مدرسة رقيه .. قعدت واقفه في الساحه لين رجليا وجعوني و مره مره نحس بمغص و دوخه .. لين نشوف فيها خاشه هي و بوها للمدرسه 🥺♥️
وخرت ع الحيط و أنا واقفه بعيده .. طفلتي 🥺 .. ليش بديت بعيده !
بديت برانيه ..
طلعت برا الحلقه ..
خش بيها حسن من غير ما يشوفني .. قلبي يبكي .. حسن فيه شي متغير ..
مش من عوايده يلبس هكي ..
وقفت رقيه في الطابور .. حسن جنبها ..
لحضات و هو يكلم في أبلتها و باس رقيه و طلع من المدرسه ..
مشيت نجري للطابور .. نشوف فيها خايفه و وحيدة في الطابور ..
قربت منها .. حطيت إيدي ع شعرها الي كان مسرح بطريقه مهمله ..
قامت راسها و قتلي ماما 🥺 قالتها بعيون تائهة .. بعيون خايفه ..
شديت إيدها و قعدت واقفه جنبها .. لين دخلوهم للفصول .. خشيت قعمزت معاها هي و بنيه في جنبها .. لحضات و حسيت روحي ننزف قتلها ما تخافيش به 😉 أنا بنروح توا و بابا بيجيبك بعدين نديروا الواجب مع بعض باهي ؟
هزت راسها و قتلي به 🥺
نضت وقفت بوستها و مشيت .. نمشي و نشد في الحيط ..
أنا ننزف .. ووووه شن بيروح بيا للحوش .. شن الي قاعد يصير هذا !
خديت تاكسي و طول الطريق نحس بألم في ظهري و بطني ..
وصلت العماره .. هادي سيارة مغيره .. شن جابه هنا ؟
أكيد لأني ما رديتش 🤦🏻♀️ ..
كيف بنخش العماره توا ما نبيشي يشوفني .. بس لازم ننزل من التاكسي .. نزلت خشيت الشقه لقيت روحي دم ..
اوووووووه 😰 أنا بروحي ..
نحس بضعف في قلبي .. طق باب الحوش .. هذا أكيد هو ..
خديت التليفون و اتصلت بيه .. رد عليا و قالي به الي تفكرتي و الله ..
قتله روح مغيره .. روح لانك بديت تتصرف و كأنك واحد من عيلتي .. مش معدل لا على جيران لا سمعتي لا شي .. روح مغيره و الزم حدودك معاي.. ااااه 🤢 بطني ..
قالي خيرك ؟
قتله تعبانه و بنرقد ..
قالي أهو نازل انا و بنقعد في السياره تحت .. بس وين كنتي ؟
قتله كنت في مدرسة رقيه ..
سكت و قالي انا ح نقعد تحت لين نشوفك و نتطمن .. خشيت الفراش و تغطيت ..
كل شوي يزيد الألم ..
نضت خشيت الحمام و خديت معاي التليفون .. كل شوي نغسل وجهي بالميه ما نبيش ندوخ و نفقد الوعي .. قعمزت في الدوش و النزيف زي الميه ..
نحس في روحي بنغيب ع الوعي .. بندوخ ..
اتصل مغيره .. قالي مشيت انا ما تبي شي ؟
قتله أنا ننزف .. أنا ننزف مغيره ..
أنا خايفه ما نبيش نموت ..
قالي انا راجع في الطريق أفتحيلي الباب ..
نضت فتحت الباب و الدم ينزل مع رجليا .. رحعت للحمام و أول ما وصلت دخت و قعمزت ع الارض ..
شن يصير معاي هذا ..
خش مغيره و سكر الباب .. لقاني مقعمزه ع ارضية الحمام و ننزف ..
خاف و قالي نوضي بسرعه نرفعك المستشفى .. قتله لا لا 🤚🏻 ما فيا شي ..
كلم جارتي تجي تقعد معاي و انت روح .. قالي المره الي فاتت سكرتي راسك و ما تبيش تمشي للمستشفى ..
توا ح نرفعك يعني ح نرفعك ..
قتله اطلع مغيره .. اطلع و خليني بروحي ..
بديت نحس بضعف .. كنت بنفقد الوعي خلاص .. ريحة الدم تخوف فيا من الموت .. صورة رقيه بين عيوني ..
قعمز ع الارض مقابلني .. مدلي إيده .. عيونه حنينات هلبا .. هو تعلق روحي راهو و الله تعلق روحي 🤷🏻♀️♥️
شد إيدي و قالي مزنه أنا نعرف .. 🥺♥️
كنت ساندة راسي ع الحيط و مغمضه عيوني .. فتحت عيوني ..
نبضات قلبي متسارعه ..
قالي نعرف 🥺♥️
سألته بعيوني شنو تعرف ؟ من غير ما نحرك فمي بكل ..
قالي لما خشيتي الحمام و سكرتي بالمفتاح و انا نطق عليك .. خفت عليك و طلعت للجنان بنخشلك من الروشن ..
لقيتك تبزعي في الدم على رجليك و قمتي الكيسه في شنطتك ..
رجعت وقفت قدام الباب كسرته و خشيت ..
غمضت عيوني و ابتسمت أبتسامة محارب قاتل باش يوصل و تمكن منه خصيمه 🤷🏻♀️
هزيت بي راسي اوكى اوكى ..
قتله معناها شن تبي فيا توا ؟
ضغط على إيدي و قالي بس أنا نحبك 🥺♥️ بكل شي نحبك .. بضعفك و بحيلتك نحبك .. بغبائك نحبك و مستحيل نكسر بخاطرك بكل ..
اوووووف قداش بتخسري يا مزنه 🤦🏻♀️💔
أستسلمت و فقدت الوعي ..
فقت و هو يصب عليا في اميه و يقولي فيقي .. جابلي عبايه و قالي تقدري تنزلي بروحك ؟
هزيت بي راسي ايه ..
نزلنا من العماره و ركبنا السياره و رفعني المستشفى ..
بعد الكشف قتلي الدكتوره أجهاض ..
🤷🏻♀️💔
قعدت في المستشفى لليل .. خش مغيره و قالي عندك عقد زواج في الحوش ؟
قتله لا ..
طلع مغيره .. و مش عارفه ليش حسيت إني معاش نبي نشوفه او معاش عندي وجه نشوفه .. و صوت داخلي يقولي تعدلي يا مزنه تعدلي ..
نبي نكلم أمي و أخواتي و نقوللهم أنا في المستشفى بالك يعطفوا عليا شويه ..
كلمت مسره و قتلها أنا في المستشفى تعبت شويه أمس ..
قتلي أحنا طالعين ناخدوا في حاجات عرس بنت خالتك .. تو نخطموا توا نشوفوك ..
No name ♥️🌺
