مات_الكلام 27
مقعمزه نستنى في تليفون حسن .. اتصل رقم دولي ..
هذا أكيد مغيره 😠 .. رديت عليه نعم ؟
قالي لا لا لا مستحيل انتي في ليبيا ؟ 😨
قتله روحت و خليك أنت هايم مع الي زيك ..
سكرت عليه الخط .. عاود يتصل تاني ..
هالحقير التافه 😠 الله يلعنك ..
مكالمه وراء مكالمه .. بديت نسكر عليه و نستنى في تليفون من حسن ..
بعد أكثر من 3 ساعات اتصل بيا رقم ..
رديت .. قالي حسن حسن معاك ..
قتله الف الحمدلله ع السلامه 😰
قالي كيف طلعت و ركبت تاكسي و هذا رقم صاحب التاكسي .. عندك 10 دينار نخلصه لما نوصل ؟؟
قتله تعالي للشقه و تو نعطيك ..
قالي شن اتديري غادي ؟
قتله تعالى و تو نفهمك ..
شديت رقيه و قتلها ردي بالك تقولي لي بابا ماما كانت مهناش 👌🏻 قوليله كنا نرقدوا احنا الزوز عند ابله بشرى ..
هزت راسها به 🥺 و لسان حالها يقولي يا ماما ليش تعلمي فيا الكذب و بعدين تضربيني عليه !
🤷🏻♀️💔
جى حسن و أعطيته 10 دينار و نزل خلص التاكسي و ركب ..
و طول خداني في حضنه انا و رقيه ..
فرحة رقيه بي بوها خلتني صغيره قدام نفسي و أستحقرتني هلبا 👌🏻 ..
قعمزنا و قالي كيف ترقدوا هنا ؟
قتله في حوش بشرى نرقدوا ..
قالي علاش شن في ؟ .... قتله ما تشغلش بالك بعدين نحكوا ..
قعدنا في حضنه و يبوس على راسي و يقولي تعرفي .. قعدوا يجروا وراي و ضربولي السياره .. وقفت انا طول لاني عارف روحي مش مداير شي .. نزلوني و كلبشوني و رفعوني معاهم للبحث الجنائي نحولي الكليبشات و حطوني في دار بروحي على طول بعتتلك رساله يا حبيبتي ..
كنتي انتي و رقيه بس بين عيوني 😍
تعرفوا 👌🏻 ......
وقتها بس عرفت بكاء القلوب .. تاريته بكاء العين ساهل و لعب صغار 🤷🏻♀️💔
كنت نبكي بالعبره و هو يقولي خلاص عاد اهو روحتلكم و الحمدلله طلعوا غالطين .. و الله يا مزنه 👌🏻 أول ما خشوا عليا فتشوني و خدوا التليفون .. قلت الحمدلله 🤲🏻 الي بعتت رساله لي مزنه 😁 .....
و يا مظالم عباد الله كيف نخلصها ! 👌🏻
و ذنوبك يا حسن كيف بنحصدها ! 👌🏻
🥺💔
خشيت غسلت وجهي .. نسمع قي تليفوني يرن 😳 مرات مغيره ..
طلعت نجري لقيت تليفوني في إيد حسن .. 😰😰 قالي غريب رقم دولي 🧐
أنا لين معاش قدرت نوقف 😰😰 رد حسن .. نسمع في صوت مغيره الو الو الو أنا حجزت في أول رحله ..
ضحك حسن و قاله يا خوي راك غالط و توصل بالسلامه يارب 😀
كان واضح ان مغيره مصدوم .. تسكر الخط .. و حسن يقول شكله ليبي و بيروح اليوم ..
رن الخط مره تانيه .. بيرد حسن قتله أعطيني الجهاز 😰😰
قالي لا لا هذا نفس الرقم خلي نرد عليه .. رد حسن و نسمع في مغيره يقوله منو انت ؟
قاله حسن يا خوي راك غالط و هذا هاتف العويله ......
سكر مغيره و أنا معاش قدرت نوقف من الموقف 😰💔
قلت لي حسن نوض خش الدوش .. قالي لا لا بنقعمز معاكم .. كنت خايفه مغيره يتصل تاني .. قتله نوض دوش و بعدها نقعمزوا مع بعض ..
قالي قبل ما انوض .. علاش طلعتي من حوش بوي و جيتي هنا !! ..
قتله مممممماهو 😰 خفت بصراحه نقعد بروحي معاهم 😰😰
قالي و علاش ما مشيتيش حوش بوك ؟ .. كيف تقعدي هنا في شقه حتى بساط ما فيهاش ؟
قتله خش دوش و بعدين نحكيلك ..
خش حسن الدوش .. و مشيت نجري خديت التليفون ..
نتصل بي مغيره ؟ او لا !!! ... 😰
لا مش ح نتصل 🤨 أصلاً أحسن شي حسن رد عليه خلي يموت بالقهرة ..
به مرات يديرلي حاجة ! 😰
لا لا لا ما أعتقدش مغيره يدير هكي ..
خلي نتصل بي أمي نقوللها و نخلي روحي عاديه و نتصنع الفرحه ..
كان عندي أحساس أن الكل يعرف إني وراء حبسة حسن ..
اتصلت بي أمي قلتلها و قتلي تو نكلم وحده من أخواتك تجيبني ...
سكرت الخط و أنا خايفه و متوتره 😰 ..
طلع حسن من الدوش .. قالي ما عنديش ملابس هنا ؟
قتله لا لا 😰
قالي أعطيني أي حاجة نلفها عليا نصلي بيها ..
أعطيته شرشاف لفه على بطنه و وقف يصلي ..
هذا كيف بتأذيه !! كيف بتضريه !! ها !! قولي يا مزنه ؟؟ كيف بتأذي شخص يصلي ؟؟ كيف بتأذي أنسان ما يفوتاش فرض !!
كيف بتتغلبي عليه !!
كيف بتقهريه !!
كان واقف يصلي و أنا بين الحضور و الغياب .. بين السماء و الأرض .. في المكان و مش في المكان .. ملموسه و مخفيه ..
توا انا صح سافرت تركيا و قعدت مع مغيره و طلعت شريت حاجات و روحت ؟؟ أو كان حلم ؟؟ نحس إن في شي في ذاكرتي ..
في كنترول يحذف افعالي السيئه و يحسسني بتفاهتها و سطحيتها .. و يثبت أفعال الي حواليه السيئه و يضخمها ..
ما فهمتي شي صح ؟
ما علينا 🤷🏻♀️
——————————
تعالي ... نوضي أوقفي معاي ..
تخايلي معاي لحضة دخولي للشقه ...
تعالي .. تعالي .. ما تخافيش ..
الشقه كان فيها دار وحده بس .. و صاله و حمام و مطبخ ..
المطبخ مقابل باب الشقه الرئيسي ..
في صالون في الصاله ..
لما أنا خشيت كان بساط الصاله ملفوف كله و مهناش .. شبشب رقيه ع الباب ملوح ..
شكون الي خش الشقه و لف البساط و خداه ؟؟ و ليش خداه ؟؟ أكيد بيكون فيه دم ع البساط ..
تعالي .. تعالي خشي للمطبخ ..
شوفي روشن المطبخ كيف عالي .. تحت الروشن في أسطوانة غاز ..
الروشن عالي هلبا و ما فيش كرسي في المطبخ .. يعني 👌🏻 لو أنا أشنقت روحي كان ح يكون في كرسي ركبت عليه و بعدين دفيته 🤷🏻♀️
تعرفي 🥺
تعرفي أنا ليش نحكيلك ؟ 🥺
لأني خايفه عليك 🥺💔
خايفه ع بنتك 🥺💔
إنتي لو مش أم أخت ..
ما تكونيش سلبيه 🥺 طلعي الصوت المطموس في داخلك .. قولي هذا صح و هدا خطأ 🥺
——————————-
كمل حسن صلاته و تلفت لي قالي أعطيني تليفونك نكلم العيله .. رقيه تلعب عليه و فرحانه ...
أعطيته الجهاز ... اتصل بيهم و قاللهم جيبولي ملابس ..
تلفت لي قالي تعالي تعالي 😍 .. لفيت شعري ع رقبتي من جهة اليمين .. خفت يشوف رقبتي ..
قربت منه و حطني تحت ذراعه انا و رقيه .. ليش ما نحسش أنه راجلي ! 😰
ليش ما نحسش براحه و سكون معاه !! ..
ليش الأحساس الي حسيته مع مغيره ما نحسه معاه !!
كان بركان يغلي في داخلي .. و الله بركان حممه تحرق فيا أنا بس ..
قالي تعرفي لما كنت في الحجز شن نقول ؟
قتله شنو ؟ 🥺💔
قالي نقول يا ويلك يا حسن هذا ذنب مزنه البنت اليتيمه الي كسرت بي خاطرها و رجعتها حوش اماليك و انت عارف اخواتك كيف ..
سامحيني مزنه .. بس الحمدلله ربي خلاني نفيق على هلبا حاجات ..
قمت راسي و قتله شن قصدك ؟ 😳
قالي لأنك تمرمدتي معاي و عيشتك مش زي اخواتك 😉
قتله لا عادي 🥺♥️ و كل ما ينحي حسن شعري من رقبتي نرجعه طول و نتسبل بي اي شي .. مره نرجعه و نحك رجلي .. و مره نرجعه و نمسح خشمي ..
شدني من أيدي و قالي تعالي نخشوا الدار ...
يااارب يجي حد ياااارب 😰 قتله خلي نديرلك حاجة تاكلها .. قالي انتي معاي و تبيني ناكل ؟ لا لا لا ما خاطريش في ماكله بكل ..
طق باب الحوش .. قلت الحمدلله 🤦🏻♀️ مشت رقيه تفتح الباب و حسن خش الدار داخل ..
جت بشرى .. خشيت انا و اياها للمطبخ .. قتلي امسحي رقم جمال ردي بالك ..
قتلها مسحته من بكري 😰...
قتلي خلي نركب نطيب غذاء و نبعتلك .. قتلها لا اقعدي هنا لين تجي امي ..
قتلي به تمام ..
حسن ينادي فيا ... مشيتله في الدار ..
لقيته شاد عملة تركيه 💴 أنصدمت 😳 ...
قالي شنو هادي ؟؟
قتله ههههه 😅 هادي بنتك جايبتها من حوش بشرى ههههه
قالي عمله اجنبيه ؟
قتله ايه هههه هكي شكلها ..
نادى على رقيه و قاللها من وين جبتيها ؟ قتله نعرفهاش انا 🤪🤷🏻♀️
شدها من وذنها قاللها قتلك من وين جبتيها ؟ 😠
خافت رقيه 😰و انهارت بي البكاء طول ..
شديتها منه و قتله حسن خيرك عليها ؟ 🥺
قالي هادي سرقه و لو ما تعاقبت توا ح تقعد كل مره جايبتلك حاجة من حوش الناس ..
قتله انا تو نتصرف 🥺 ..
تلفت لي رقيه و قاللها انتي معاقبه 😠 و ما فيش لعب و لا طلوع و رقيه تبكي ...
و تعاقبت طفلتي على سوء تصرفي أنا 🤷🏻♀️
#مات_الكلام 🤷🏻♀️
قالي جيبيلي مصحف بنقرا شويه ما بين ما جو اماليا و جابولي حوايج ..
قتله ما فيش مصحف هنا .. قالي به ..
طلعت بحدا بشرى و انا مصاريني بتتقطع من الخوف و التوتر 😰😰
نسمع فيه يقول لي رقيه تعرفي شن قال رسولنا الكريم ؟ .... قال { وَاَلَّذِي نَفْسِي بِيَدِهِ لَوْ كَانَتْ فَاطِمَة بِنْت مُحَمَّدٍ , لَقَطَعْت يَدَهَا }
يعني حرام ناخدوا حاجة من حوش حد ...
بشرى لاهية في التليفون و أنا نفكر في كلام حسن 😰 شكون الي لازم يعرف الحرام من الحلال ! ... أنا و لا رقيه ؟ 🤷🏻♀️
طق الباب و جت أمي و مسره .. سلموا عليا و خشوا .. وجوههم لا تبشر بي الخير 🤦🏻♀️ ..
خشينا الصاله .. ما فيش وين نقعمزوا .. قتلي امي كيف كنتي قاعده فيها الشقه ؟
قتلها كنت عند جارتي بشرى .. قتلي أهااا عند جارتك بشرى 😒
كانت أمي حاسه أن في شي غلط .. بس كالعاده 🤷🏻♀️ أحنا ديما نداووا بالكي 👌🏻 قبل العسل ..
مشت بشرى جابت بساط و منادير ... فرشناهم في الصاله .. و قعمزنا .. دقايق و جت أم حسن و حميده و مفيده و صغارهم ..
أعوذوا بالله 🤦🏻♀️ قداش وجودهم ينقص في العمر ......
خشيت لي حسن أعطيته حوايج .. لبس و طلع سلم عليهم و قعدنا مقعمزين كلنا في الصاله .. بدا حسن يحكي كيف يجروا وراه و كيف شدوه ..
و حميده تقوله الليله هديكا ما ننساهاش للصبح ما رقدناش ........
الأجواء مريحه ما فيش من شاك فيا .. في عز الهذرزه تليفوني يرن .. نضت رديت .. لقيته مغيره .. خشيت المطبخ .. هما كلهم يهدرزوا ما فيش من مركز معاي ..
قتله نعم ؟؟ 😠 شن تبي متصل ؟
قالي منو معاك في الحوش ؟ 😠
قتله ما ليكش علاقه ..
قالي و رحمة أمي يا مزنه يطلع راجلك معاك نقتلك .. و الله نقتلك ..
قتله أنت بروحك قلتها 🤚🏻 راجلك .. يعني راااااجلي ...
قالي انا ما كنتش في الغرفه افهمي .. كان فيها صديقي و لما ركبت لقيت معاه بنت و .......................
سكرت الخط و ما نبيش نسمع أعذار 😰 خايفه نصدقه و أنا نعرف إنه كذاب 😰
عاود أتصل تاني .. رديت لاني كنت خايفه نطلع جنب حسن و يرد عليه ..
قتله عندي زحمه في الحوش .. تفضى الدنيا نحكوا ...
قالي لا لا لا .. راجلك معاك او لا ؟ 😠
قتله لا ..
قالي كيف رد عليا ؟؟
قتله جى يشوف في رقيه بس ..
تغيرت نبرة صوت مغيره 🥺 قالي مزنه خلينا نحكوا و نتفاهموا 🥺♥️ أنا ما نبيش نخسرك ... قتله مش وقته عندي ناس ..
قالي نستنى لين يروحوا الناس و نجيك ..
قتله وين تجيني هبلت انت ؟
قالي به نستنى تليفونك ..
قتله تمام و سكرت الخط ..
تلفتت 😳 لقيت أمي واقفه 😰 و على طول ضربتني كف .. بمجرد ما قمت راسي لقيت حميده تشوفلي ..
تمنيت وقتها نموت .. تمنيت الارض تبلعني .. تمنيت ما روحتش ليبيا .. تمنيت عشت باقي حياتي مشرده ..
قالت حميده بناخد طاسة ميه امي عندها دواء .. خدت اميه و طلعت ..
و أنا كنت واقفه 😰 أيدي ع خدي مش مستوعبه الكف ..
أمي واقفه قدامي .. قدمت خطوه تفلت عليا و طلعت ..
نخنقت .. الحبل الي التف ع رقبتي كان كل يوم يضيق الخناق عليا أكثر ..
بننهار بي البكاء .. جروح قلبي تنزف .. أنا أصلا مش سعيده و لا مرتاحه و لا فخوره بي الي درته و ندير فيه .. ليش تضييق الخناق عليا ! 😰
تعرفوا 👌🏻 أنا كل ما طفلتي تغلط ح نحضنها 🥺♥️ ايه ح نحضنها ايه .. و لو كانت بي صغارها و صغار صغارها ..
ح نحتوي أمواج البحر الهائج .. ح نوقف قدام زئير الأسود و نحضنك .. هادي أرضك و هادي تصدعاتك ح نمرر راحة أيدي ع خدك بلطف و نداويها ..
{{ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ }}
🤷🏻♀️♥️
No name ♥️🌺
