رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 14🔥
———————-
تعرفي ليش نحكيلك ؟؟
نبيك تعرفي أن ما فيش شر مطلق .. ما فيش شر مطلق .. ما فيش شر مطلق ..
شفتي الحيره الي أنتي فيها توا ! .. و عاجزه قدامها ! .. و مش قادره تحطي اللوم عليا أو على حسن أو مغيره ؟ ..
أوقفي قدام كل قصه تسمعيها من الناس .. و ما تحكمي ع حد 🤚🏻..
و كل ما تسمعي مصيبه زي مصيبتي قولي {{ ( رَبِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ }}
و خلي التفاصيل للسطحيين و غادري المكان ..
————————————
نضت خديت شنطتي و خشيت الحمام .. سكرت الباب و قعدت نعد في الفلوس ..
وصلت لي الألف و انا نعد 😳😳
معناها هادوا فوق من الألف .. خلي نطلع ونعدهم كويس في الحوش ..
طلعت للمكتب و لقيت حنان مقعمزه .. قتلها أستاذ صلاح أعطاني جهاز تليفون .. في رأيك عادي ناخده أو لا ؟؟
قتلي ع حسب هو ليش أعطاهولك ..
قتلها قال باش نرد ع الايميلات ..
قتلي معناها عادي .. لان حتى انا زمان كنت في مكان انسام و اعطوني جهاز و شفره و يعبولي في رصيد ..
حسيت براحه لما سمعت منها هكي .. قتلها و الله 🙂
قتلي ايه عادي .. تو يعطوك ايميل الشركة و الباسوورد و تبدي تبعتي في ايميلات و تردي عليهم ..
قتلها يعني نركب شفرتي و لا يعطوني شفره ؟
قتلي لا ركبي شفرتك ..
تحشمت نطلع تليفوني قدامها ..
و خليتها تطلع و نحيت شفرتي طول و ركبتها .. و أول ما فتحت الجهاز وصلتني رساله ..
( اركبي نبيك )
أها هذا مغيره ..
تفاجأت 😳😳 و تجاهلت الرساله ..
قعمزت فتحت اللابتوب و حنان تعلم فيا كيف نستعمل النت ..
قتلي جربي توا ابحتي ع اي شي ..
كتبت في البحث ( كيف يوالف النسر صاحبه )
طلعت حنان و خلتني و قتلها جيبيلي قهوة معاك .. و طلعولي نتائج البحث هلبا ..
فجأه وقف عليا مغيره ..
معاش عرفت نتصرف .. كيف انحي الصفحه هادي ما نبيشي يقرا شي ..
و ما عرفتش نحول الصفحه ..
قرب ع شاشة الكمبيوتر و بدا يقرا .. و بسرعه هائله مسح كلامي في البحث و كتب النسر الذهبي .. و كانوا صوابعه و هو يكتب و كأنه يعزف .. سريع و حركة فنيه ..
و قالي توا أقري 😉
قتله كنت نجرب بس 😏..
نزل راسه و عيونه في الكمبيوتر و قالي والفتك لدرجة لو ما جيتي اليوم كنت عرفت مكان حوشكم و جيتك ..
قعدت ساكته و أنا متوتره و خايفه ..
خشت حنان .. و عدل مغيره وقفته و قالي تعالي نبيك فوق ..
طلع و طلعت وراه .. و أنسام بتموت من الغيره .. و نظراتها تخوف ..
ركبت معاه ..
خشينا المكتب و سكر الباب ..
قالي ما تخلينيش كل شويه ننزل و نخش مكتبك .. عيب في حقي حتى قدام الموظفين ..
قتله ليش تجي مكتبي ؟
سكت و نزل راسه تحت و هو متضايق من ردي .. قالي نبيك تركبي فوق في مكتبي هنا تقعدي تخدمي ..
قتله وقتها ح نسيبها الشركه مره وحده ..
قالي به به خلاص 🤚🏻 خليك مع أستاذ صلاح .. و أنا آسف ع أي شي صدر مني ..
قتله نقدر ننزل مكتبي ؟
شاورلي بي أيده ع الباب ..
طلعت و نزلت للمكتب و الدموع في عيني ..
كان خاطري نقوله 🥺♥️ أن قبلاتك تأثيرها أقوى من تأثير معاشرة زوجي 🤷🏻♀️💔
أحساسي في ثواني كان فمه يلاعب فمي ما عشتاش قبل حتى لو جمعتي عدد معاشرتي زوجي كلهم ..
شي مخزي صح ؟؟؟
باش تعرفي أن الأنسان ممكن يختبر كل شي في الحياة حتى لو كان عكس مبادءه و أفكاره ..
قعمزت في المكتب و اتصلت بي حسن .. قتله اعطوني مرتبي و نقدروا نأجروا حوش ..
كانت فرحته بمثابة فرحة زوجة اتصل زوجها يبشرها برحلة سفر للخارج ..
جى روح بيا و معاه رقيه .. و أول ما ركبت السياره خديتها في حضني بقوه ..
و نزلوا دموعي .. نزلوا من قلبي قبل عيني ..
نزلوا على أمي الي لزتني من الحوش ..
و على راجلي الي مش قادر يوكلني ..
على قلبي الي تعلق بي مغيره ..
على طفلتي الي جعانه و ريحة ملابسها بول و العيله الي كانت عندها مش مهتمين بيها ..
نبكي على روحي ..
قعد يقولي حسن خلاص أهي هانت .. قالي نحطك في الحوش و نطلع ندور على أيجار ..
قتله مستحيل .. ح نقعد معاك في السياره ..
خديت الشنطه و قعدت نغير في حوايج رقيه .. و قتله جعانه البنت لازم تاكل ..
قالي عندي دينار بس في جيبي ..
كرهته الساعه هديكا .. كرهته و كرهة اليوم الي خديته فيه ..
قتله وقفني على أي محل ..
نزلت للمحل و شريت لي بنتي زبادي و حليب و جبنه و كيكة و عصير و ميه ..
و ركبنا السياره بديت نوكل فيها ..
كانت تاكل بي نهم .. برغبه .. بجوع ..
و في داخلي نقول شكراً مغيره .. شكراً ..
تلقي روحك أنتي الأم .. أنتي الي توكلي من لحمك و دمك .. أنتي الي تحسي .. أنتي الي تنجرحي لمجرد ان طفلك ياكل برغبه ..
و انتي و انتي و انتي ..
——————————-
يوم الي صارت الجريمه .. و أنا مروحه في الطريق للشقه ..
اتصلت امي .. تعيط و تقولي الشرطه جت تدور فيك هنا .. شن في ؟ شن صاير ؟ ..
شرطة شنو !!
مزال ما عرفتش شكون الي مقدم فيا بلاغ ..
و ليش مشوا حوش بوي و ما جوش للشقه ؟؟
لأنهم لو جو للشقه ما كنتش صارت الجريمه ..
———————————-
قعدنا ندوروا بالسياره لليل .. تعبت خلاص و حسن كل مره يتصل يدور في ايجار .. و الحوش الي نشوفوه يطلع يبي شهور مقدم ..
روحنا حوشهم .. طريق حوشهم زي الطريق للزنزانه ..
مرعبه .. و كل ما تقربي من شارعهم كل ما في احتمال تصابي بي جلطه قلبيه من الخوف ..
وصلنا الحوش ..
اها 😳😳 هادي سيارة مفيده 😳😳..
قالي ايه شكلها هنا .. قتله لا مش ح ننزل .. قالي انزلي استعودي من الشيطان ..
قتله اختك هادي ما عندهاش حوش ؟
ما عندهاش راجل ؟
ما عندهاش صغار ؟
24 ساعه جايه تسم فينا و تروح ترقد متهنيه ..
قالي انزلي و ما يكلمك حد ..
يومها 👌🏻 و رحمة بوي قاربت ع التبول في ملابسي من الخوف ..
خشيت لقيتهم في الصاله ..
ما تكلمتش حتى حرف .. خشيت طول للدار انا و بنتي ..
كل وحده فينا تعيش حتى في خن .. لكن كرامتك محفوظه .. مدايريلك قدر ع خاطر راجلك ..
يحترموك ع خاطره ..
يودوك ع خاطره ..
كلمته مسموعه ..
أما زي حالي 🤷🏻♀️💔 يفرج الله و خلاص ..
نسمع فيهم يبكوا برا 😳 ...
شن في !!
حطيت رقيه و قربت من الباب نسمع فيهم ..
حسن يقوللهم ندور في ايجار ..
مفيده تبكي .. و امه تبكي ..
طبست من الباب نشوف ..
لقيتهم يحضنوا فيه و يبكوا ..
أنا مصدومه 😳😳
مفيده تعيط و تقوله لا ما نبوش نخسروك و الحوش هذا حوشك و مش لازم تطلع و ما نبوش تفارقنا و عيننا حيه ..
شن الي نشوف فيه هذا 😱 !!
تلفتت مفيده و لقتني واقفه .. جتني تعصر في دموعها بالسيف ..
حضنتني و قتلي نبوا بنت خونا تتربى بيننا و ما تسيبوش الحوش ..
دفيتها 😠 و خشيت الدار و سكرتها ..
دمي بيفور من الغضب ..
هيا خش حسن هيا ..
رقيه تبي تطلع من الدار ... و انا ما نبيهاش تطلع جنبهم ..
تعيط تبي تطلع .. ما تزيدينيش يا بنتي ارجوك .. و في داخلي نقول لو تعرفي شن يديروا في امك بس ....
خش حسن .. قالي تعالي تعشي معانا ..
قتله كيف يعني ؟
قالي مدايرين عشاء على خاطرنا و حبال سوء و طاحوا في بير و ما تسكريش راسك خلاص ..
قتله بجد تحكي !! 😳
شدني من ايدي و قالي يا ودي غير هيا تعالي ..
نحيتله ايده بقوة و قتله امشي انت تعشى معاهم صحتين ..
طلع حسن هو و رقيه ..
شكلهم يتعشوا 😰 ..
بطني ادير في صوت من الجوع .. بالك حسن يجيبلي صونيه معاه ..
و انا متكيه ع المندار و متغطيه .. يجيك أحساس أن أعداءك انتصروا عليك .. و اقرب الناس ليك راضيين فيك عادي ..
يا رب ما يقتنعش بكلامهم يارب ..
يا رب ما ينحيش فكرة الايجار من راسه يارب ..
الصبح نضت جهزت روحي و طلعت معاي رقيه .. قالي بترفعيها معاك ؟
قتله ايه مش ح نخليها لي مرت صاحبك ..
في الطريق قتله بتدور على ايجار ؟
قالي علاش عاد توا الأيجار ؟ خلاص خلي نمشوا أمورنا في الحوش هنا و خلاص ..
قتله صدقتهم ؟؟ 😳
يكذبوا عليك راه .. يمثلوا عليك راه ..
و أجرلي حوش و انت امشي كل يوم لي اماليك من شدك ؟
قالي امشي خدمتك و لما تروحي نتفاهموا ..
و هادي تاني طعنة في قلبي بعد طعنة أمي ..
حسيت وقتها أن كلهم مش حاسين بيا .. كلهم مش هامهم حالي ..
نزلت للشركه و بنتي معاي .. خشيت للمكتب و قعدت حنان تلعب على رقيه ..
عندي دوخه من الصبح 😰..
قتلها حنان نبي حوش ايجار تعرفي ؟
قتلي خلي نسألك خوتي .. و اتصلت بي خوتها طول ...
و انا عندي شوية ورق يبو طباعه طبعتهم ..
الساعه 12:00 قالي أستاذ صلاح جيبيلي الختم من مغيره بنختم بيه قبل ما نطلع ..
ركبت و لما قربت من مكتبه لقيته مفتوح و في معاه حد في المكتب ..
نسمع في مغيره يقول للشخص الي معاه .. ( فيها شي مميز .. مش عارف ليش نحس فيها مكسوره .. فيها شي مخليني نفكر فيها ديما يا راجل )
رد عليه صاحبه : عادي عادي زيها زي غيرها ..
قاطعه مغيره لا لا لا لا 🤚🏻 هادي مش زي غيرها ......
يقصدني أنا زعمه !!
حسيت بدوخه قويه .. أستندت ع الحيط و نزلت بالشويه لين قعمزت ع الارض ..
حسوا بيا و طلع مغيره .. شد أيدي يقولي خيرك ؟؟
وجهي اصفررررر و فمي لين أبيض ..
دارلي من عطره باش نفيق و شدني من ايدي و قعمزني ع الصالون ..
صاحبه جاب شيشة ميه .. شربت اميه .. و انا نحاول نتفكر امته اخر مره كليت فيها ..
ايه اخر مره كانت في لمة اخته ..
قالي كلمي اي حد يروح بيك .. قتله لا ح نكون كويسه عادي ..
قتله أستاذ صلاح يبي الختم .. قالي تو انزله انا ..
كانت نظرة عيونه 🥺🥺أحن من نظرة عيون أمي 😒 لما قالت حوش بوها و هي بنت مش و هي مرت راجل ..
كانت عيونه أحن 🥺🥺 من عيون حسن 😠 لما قالي ما فيش ايجار و نرجعوا حوش اهلي خير ..
نزلت من الدروج و هو يشوفلي من فوق .. و خشيت المكتب ..
قعمزت جنب حنان و قتلها عندي دوخه غريبه ..
قتلي بالك حامل 😁 ..
نعم !! 😳😳 حامل شنو ؟ 😰😰 حي عليك يا مزنه 🤦🏻♀️🤦🏻♀️
جى العامل التونسي الي في المطبخ و قالي جهزتلك فطور تحب نجيبهولك هنا و لا تجي للمطبخ ؟
قتله حنان جيبه هنا ..
و عرفت أن مغيره الي طلب منه يديرلي فطور 🥺🥺 ...
به كيف طاوعه قلبه حسن يتعشى مبارح من غير ما يفكر فيا !! 😰😰
و معاش تعرفي شنو الصح و شنو الغلط ..
بس الي نعرفه ان الشخص الصح تصرفاته غلط والشخص الغلط تصرفاته صح ..
🤷🏻♀️🤷🏻♀️💔💔
يتبع ♥️🌺
