رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 3🔥
و رسمت وجه آخر للقدر .. رسمت طريق تانيه .. طريق كلها خضراء .. فيها ورد .. قوس قزح .. عصافير .. شجرة تفاح .. صوت الميه في النهر .. نشم في ريحة التراب المبلل بالمطر ..
كل شي رسمته في مخيلتي .. لين نادتني السكرتيره و قتلي عبي الطلب هذا ..
عبيته و خليت رقم تليفوني و طلعت أنا و مسره .. يارب يقبلوني ..
يارب .. يارب يقبلوني ...
قلبي ينتفض .. راسي دايخ ..
الله يا مزنه شن صايرلك 🤦🏻♀️ ..
طول الطريق سرحانه .. كيف كح .. كيف خش .. كيف وقف ع السكرتيره ..
الناس هادوا عايشين معانا في نفس الكوكب ؟؟
يومياتهم زينا ؟؟ ..
ياكل في عصبان هذا ؟؟
لا لا .. مش في نفس الزمن احنا .. و لا نفس الدوله ..
وصلت للحوش .. ما خاطريش نطيب .. اااه قصدي نتيب 🥴🤪 ..
قعمزت ع سريري .. أنا علاش تزوجت ؟
انتي تعرفي شن معناها زواج ؟
طريق اللاّ عودة ..
بس أنا ما أخترتش ..
حتى لو يا مزنه .. انتي بتخدمي مش بتفسدي حياتك ..
قعدت ع سريري لين جى حسن ..
قالي اليوم قلت خلي نروح بكري باش نطلعوا .. قلت خلي نغيرلهم جوهم مدام الوالده مهناش .........
و قداش ما النيات تغلب 👌🏻💚 .. في الوقت الي انا فكري كله مع شخص شفته لحضات و حتى ما انتبهلي 🤷🏻♀️ .. نفس الوقت كان حسن فكره معاي و بيرضيني لان اخته ما عزمتنيش ..
و كل 👌🏻 ....
كل ما تفكري تذنبي .. او تتصرفي غلط .. ربي يفيقك و يمنعك عن طريق لفته طيبه من اي شخص 🤷🏻♀️♥️
أستغفرت و نضت لبسنا و طلعنا ..
كانت السياره كل شويه يوقف باش يصبلها ميه .. و من وقتها بديت نقارن 💔 ...
سيارة الشخص الي شفته اليوم في الشركه و سيارة حسن ..
وقفنا خذينا فشار 🍿 .. و بعدها مشينا لحوش بوي .. خشيت سلمت على عماد ..
قتله كيف حالك توا ؟
قالي الحمدلله بخير .. ياريتني مكانك يا عماد 🥺 .. ياريتني انا الي مقعده ..
قتلي أمي بكري موده كانت في المزين تدير في شعرها ..
قتلها به !! 🙄
قتلي تلاقت مع حماتك غادي قالتلها عندهم طهور اليوم و زمزامات ..
قتلها مستحيل 😳 ..
قتلي خيرهم مش عازمينك ؟ شن بتحشميهم كان بتمشي ؟
قعدت ساكته 😳😳 .. ليش ما عزمونيش ؟
ليش يعاملوا فيا هكي ؟
علاش ينغصوا في عيشتي أكثر من هي مغصوصه 🤦🏻♀️🤦🏻♀️
قعمزت هذرزت و خش حسن سلم على عماد و نضنا طلعنا بنكملوا دهواري ..
و هو يعاند في هديكا السياره ..
----------
الدنيا مغرب .. تشمي في ريحة البصله ؟
لو ذفنوني من أول يوم كان اليوم ح يكون فرق السوء متعي ..
بس أنا قاعده في ثلاجة الموتى ..
ايييه وين هديكا الراحه .. ايييييه وين هديكا اللمه .. ايييييه وين هذاكا الضحك و الزرادي ..
ليش تبكي ؟
نشوف فيك من بكري حاطه أيدك على قلبك و تبكي ..
و لا نقولك .. أبكي أبكي .. البكاء غسيل الروح ..
اسسسسسسس 🤫🤫
أسمعي .. أسمعي 👂🏻
يحكوا عليا 👀
سمعتيهم ؟ اشبح منو قالت راجلها ارتاح منها ..
😂😂 هذا و انا مازال ما حصلوش أذن الدفن ليا ...
يلا ما علينا 💁🏻♀️ ..
----------
روحنا الحوش .. قتله اليوم اختك مدايره طهور ولدها بي الزمزامات .. ليش انا مش معزومه ؟
شنو الي مدايراته انا !!
ليش يعاملوا فيا هكي ؟؟
قالي يبو يديروا فتنه بيني و بينك .. و انا ما بنقوللها اعزمي مرتي بالسيف ..
سكتت و نضت خشيت الدوش .. طلعت لبست و جى حسن قرب مني ..
حسيت بنفور غريب .. و كأن الي حط أيده عليا هذا من الجن .. بملامح مشعوذ .. بهيئة ساحر .. ب
كانت اللحضات الي بنقوم بواجبي گ زوجه أشبه بشعور شاه تنتظر ذبحها و سلخها ..
رقد حسن .. و أنا عيوني في السقف جامده .. غمضي عيونك يا مزنه ..
غمضيهم 💆🏻♀️ ...
تخايلي خشته للشركه ..
شمي .. شمي ريحته ..
اسمعي .. أسمعي صوت كندرته ع الدروج ..
منو الي كان يعاشر فيا ؟؟
منو ؟؟
علاش ما جاش نصيبي هكي !
اوووف 💔😔
----------
أمممممممم فتحوا قرآن 🤔 .. سورة البقره 💚 نحس في روحي أول مرة نسمعها ..
{ ثُمَّ قَسَتْ قُلُوبُكُم مِّن بَعْدِ ذَٰلِكَ فَهِيَ كَالْحِجَارَةِ أَوْ أَشَدُّ قَسْوَةً ۚ وَإِنَّ مِنَ الْحِجَارَةِ لَمَا يَتَفَجَّرُ مِنْهُ الْأَنْهَارُ ۚ وَإِنَّ مِنْهَا لَمَا يَشَّقَّقُ فَيَخْرُجُ مِنْهُ الْمَاءُ ۚ وَإِنَّ مِنْهَا لَمَا يَهْبِطُ مِنْ خَشْيَةِ اللَّهِ }
سامعتيها الآيه هادي قبل ؟؟
و لا زيني حتى أنتي لاهية في هالدنيا ؟ ..
خدتنا الهذرزه و أنتي لازم تساعديني نعرف من قتلني ..
----------
ليله كانت طويله .. نضت الصبح و حسيت بحرارة رُقيه مرتفعه ..
حسن طلع يخدم على سيارته .. بروحي في الحوش .. و عزوزتي مزال ما روحتش من حوش بنتها ..
قعدت ندير في كمادات .. و ما كلمتش حسن .. قلت كان زادت تعبت نكلمه ..
مع الضهريات زادت الحرارة ارتفعت .. اتصلت بيه و قتله رُقيه حرارتها مرتفعه ..
جى حسن و طلعنا .. قالي نرفعوها لمستشفى الجلاء ..
مشينا و كان رقمنا 148 .. النساوين كلهم واقفين بي صغارهم .. هذا يعيط و هذا يرجع و كل حاله أسوء من الي قبلها ..
دورنا مزال هلبا .. حسن نزل و انا قعدت .. تعبت من الوقوف خلاص 😩
كل مره نغير نوقف على رجل و نريح رجل .. الحراره زادت ..
خشيت نسأل في أما رقم واصلين ؟ .. قالولي رقم 23 ..لان كيف بدت القائمة هادي ..
23 شنو 😰 و انا بنتي بتنحرق .. وقفت نستنى تاني .. فاتت ساعه و ساعتين و ثلاثه ..
رجليا يبسوا خلاص من الوقوف ..
و النساوين يهذرزوا .. قالوا شكله الدكتور طالع مهناش لانهم ما دخلوش حاله من بكري ..
قعمزت ع الارض تحت .. اتصلت بي حسن قتله هيا نمشوا لي عيادة ..
قالي تحتي 20 دينار بس ع الاقل ناخدوا بيهم الدواء ..
🤷🏻♀️💔
شاده بنتي في حضني و مقعمزه .. الي في جنبي قعمزت حتى هي .. و الي في جنبها قعمزت ..
و كل وحده تهدرز على أحوالها الا أنا في صراع مع داخلي ..
كل شويه حسن يجيبلي شيشة ميه و ينزل تحت .. تخطم ممرضه نترجوها تشوف الدكتور و هي تتعامل معانا و كأننا بشر من الدرجة الثالثه ..
أعصابي بتنهار .. و الدكتور كل شويه يطلع و آخر همه الاطفال المرضى ..
وصل فيا الساعه 6:30 العشيه 👌🏻 لان اغلبهم طلعوا بصغارهم للعيادات ..
خشيت عاينتها و اعطاني دواء و قالي كان ما نزلتش حرارتها رجعيها هنا تاني .. و طلب علينا تحاليل نديروها برا ..
طلعت و حسن يقولي ناخد الدواء و لا ندير التحليل ؟ قتله خود الدواء قبل ..
خدينا الدواء و روح بيا و طلع يخدم باش يلقط حق التحليل ..
ضغط .. ضغط .. ضغط .. بيفجرلي راسي خلاص ..
البنت بتموت مني و هو مش قادر على شي .. دواء امه مستحيل ينقص و لا تعطي فيه في فلوس ..
نسمع في صوت الباب نفتح .. طلعت بنشوف لقيت ام حسن و مفيده و حميده اخوات حسن .. خشيت داري و لهيت بي رُقيه ..
نسمع في صوتهم 😳 .. مفيده تقول لي حميده وووووك الحوش يغم القلب الله لا تغيبك يا اميمتي .. ترد عليها أختها لين في ريحه من الغمّان ..
مش عارفه ليش نتوتر لما نسمع صوتهم او نشوفهم .. حتى من نبضات قلبي تتسارع من الخوف ..
اتصلت بي حسن و قتله امك روحت .. تعالى خود منها فلوس .. قالي به اهو جاي ..
فتحت عليا حميده الباب .. حميده هادي في عمر أمي و عندها نظره تخوف ..
قتلي نوضي اغسلي حوايج امي ..
قتلها بنتي مريضه .. اغسليهم انتي ..
قتلي نعم !!!!!!!!!
قلت في خاطري شكون الي تكلمت توا ؟ انا الي رديت عليها هكي ؟؟ 😰 شن درتي في روحك يا مزنه 😰
قتلها بنتي مريضه ..
جت شدتني من أيدي و تفنص فيا و تقولي انتي الي ملزومه بي أمي مش احنا ..
و تزيد تخش مفيده تقوللها خيرها هادي ؟
قتلها ترد عليا في الكلام ..
طلعوا من الدار و أنا نحس بالذل .. علاش خدوني من حوش بوي ؟؟
السؤال الي يدور في ذهن هلبااا بنات ..
بالحق علاش جوا خطبوني و تزوجت و جابوني عندهم ؟ .. خلوني في حوشنا خير ..
مقعمزه ع السرير و ندير في كمادات لي رُقيه ..
نتأمل فيها .. نتلمس في ايديها و خدودها الي كانوا زي النار ..
أنا آسفه يا ماما 💔 آسفه لأني جبتك ع الدنيا هادي باش تتبهدلي .. آسفه لأني نخلي فيك تتعذبي و تحسي بي الألم و أنا مش قادره نديرلك شي .. 😔💔
و جى حسن .. و خش بيطلب فلوس من أمه .. نسمع فيها تقوله احلف انهم لي بنتك ..
و هو يحلف و يقوللها و الله من الصبح و انا بيها في الجلاء .. و أمه تقوله مش مسامحاتك كان بتعطيهم لي مرتك ..
على فكره 👌🏻 هادي وحده من الناس الي قتلوني ...
جى حسن و قالي هيا نمشوا للتحليل .. و مع كل هذا كنت نقول الف حمد ليك و شكر يا رب ♥️♥️ ربي سخرلي من يعطيني ندير تحليل لي بنتي ♥️
مشينا درنا التحليل و قعدت نستنى لين طلعت النتيجه و قالي حسن فضلوا مزال فلوس شن رايك نمشوا لي عياده ..
قتله هيا ياريت ..
مشينا عياده و شاف الدكتور تحليلها و قال لازم ترقد في المستشفى طول ..
كان الخبر صدمه بالنسبه ليا .. ليش شن في دكتور ؟ 😰
قال ع الاقل لين تنزل الحراره ..
قال نديرلكم تحويل للجلاء ..
طلعنا من العياده و مشينا للجلاء و ما بوش يقبلونا و قالوا ما فيش مكان .. و على هذا الحال من مستشفى لي مستشفى .. للساعه 9:00 الصبح
و لما ما حصلناش كيف نرقدوها كلمتني موده و قتلي تو نجي نعطيك فلوس ..
حسيت وقتها زي من قامني من بير ..
و على طول قتلها تو نجيك انا .. و قلت لي حسن هيا نمشوا لي حوش موده بتعطيني فلوس .. و اتجهنا لي حوش موده ..
و نزلت خديت منها فلوس و ركبت السياره ..
هنا بس حسيت إن حسن ما فيشي فايده 👌🏻 .. أنا ما نبي منك شي .. معاش نبي حوش بروحي .. معاش نبي ذهب .. معاش نبي لبس .. نبي دواء لي طفلتي بس 😔💔
----------
هيا نديروا أتفاق 😊 ...
معاش تبكي عليا .. عيونك منفوخات هلبا ..
شكلهم حتى اليوم ما حصلوش تصريح الدفن ..
تعرفي ..
نحس إن يوم الي نكملك حكايتي ح تعطينا النيابه أذن الدفن 🤔 ..
تعرفي ليش ؟؟
ربي يبيني نتفكر شن كنت ندير .. لان لو ندفنت ح تبرد روحي وخلاص
يتبع
