رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 16🔥
فرشت الصاله بس .. هو بساط واحد أصلاً 💁🏻♀️ .. قعمزت أنا و رقيه نشوفوا لي بعض 🤭 ..
خديتها من أيدها و نزلنا للشارع .. مشينا لي محل مواد غذائيه و خدينا كل الي يلزمنا و روحنا شقتنا ...
قعمزنا كلينا جبنه و تن و عصير .. و رقيه تاكل و تجري في الشقه فرحانه 😄
تشاور ع الروشن 👈🏻 ماما ماما اازلدبذيطسءلنمم...
نرد عليها ..ايه صح ..
ترجع تجري و تضحك و بعدها تقولي ماما ماما 🤭 اتنككورازلدبطظءظط ...
نقوللها ايه صح 😘
و بالرغم تلعثم طفلتي في الكلام لكن ترجمته في داخلي و كأنها تسألني هذا حوشنا ؟ بنعيشوا هنا ؟؟
خدينا كوره من محل الغذائيه و قعدت تلعب بيها رقيه ..
سفرة الأكل المره هادي غير .. ماهو أنا أكتشفت أن في أنواع للأكل 🤷🏻♀️
أكل بي كرامه و راحه ..
و أكل لي سد الجوع و خلاص ..
و أكل روتيني ..
و أكل من نتاج أيدك 👌🏻 ما يمن عليك حد بيه .. النوع هذا حتى لو كان خبزه و زيت زيتون ليه طعم رهيب ..
قعمزت نخمم في كل شي .. تلفتت لي التليفون .. خديت فتحته ..
اتصل حسن طول ..
ما بيتش نرد .. خفت .. ترددت ..
اتصل تاني .. ما رديتش ..
اتصلت امي .. ما رديتش ..
اتصلت موده ....
أممممممم ما شاءالله كلهم تفكروني فجأه 🤦🏻♀️
عاود اتصل حسن .. رديت : نعم ؟؟؟
يعيط يقولي تهربي مني يا مزنه ..
قتله أهدأ .. أهدأ و تكلم بالشويه ..
عاود يعيط و يقولي انتي وين ؟
سكرت عليه الخط ..
عاود اتصل ..
رديت : نعم !!
قالي انتي وين ؟
قتله ما ليكش علاقه بيا أنا وين .. و من بكره ح نرفع قضية طلاق .. خاطرك ينتهي الموضوع بسرعه اللهم بارك .. ما خاطركش عادي عندي نفس طويل نتحمل سنين المهم نتطلق منك ..
فجأه و أنا نحكي خطر في بالي موضوع الدوخه 😰 أنا مرات نكون حامل 🤦🏻♀️
يقولي مستحيل نطلقك انا مستحيل ..
قتله الي عندي قلته و معاش تتصل بيا ..
سكرت الخط و أنا نخمم في موضوع الحمل .. مش وقته بكل ..
حسن اتصال وراء اتصال ...
اتصلت أمي .. رديت عليها نعم !!!
قتلي أنتي وين راجلك يدور فيك ؟؟
قتلها أها نسيتي شن قلتيلي آخر مره ؟؟
قتلي امشي حوش وحده من أخواتك و تو نجيك غادي نتفاهموا ..
قتلها لا لا لا لا نخاف نحشمك قدام نساباتك المحترمين .. ما نمشي حوش حد و ما فيش حد ليه علاقه بيا ..
سكرت الخط و أنا نتسائل 🤔🤔
ليش أهالينا ديما ضامنين ردود فعلنا ؟؟
و كأنهم حاطيننا في قفص و حتى لو خلوه مفتوح واثقين أننا مش ح نطلعوا منه ..
ليش يفيقوا بس في ردات الفعل القويه ..
ليش لما تخسريني بس تفكري كيف ترجعيني !
ليش مش قبلها ؟
أحنا 👌🏻 ما نعرفوش نتحملوا المسؤوليه بهدووووء و سكينه 💆🏻♀️ بي ركيزه بي أحتواء ..
لا لا .. نخافوا من المجتمع .. من بوها .. خوتها الاولاد ..
بعتتلي أمي رساله ( هاربه من راجلك يا كلبه اخواتك بيتطلقوا في جرتك )
🤷🏻♀️🤷🏻♀️ هي تفضلي هي 💁🏻♀️
مفاهيم تخليك تتصرفي مكاوره فيهم لا أكثر و لا أقل ..
به انتي خايفه على بناتك يتطلقوا ! تو نوريك أنا ... و هذا حالنا .. عنف لفظي رهيب .. عنف أجتماعي رهيب ..
لا لا لا لا راجلك مدامه ما يضربش فيك أنتي تدلعي .. عاد شن فيها كان عشتي هذا كله .. غير أنتي خاطرك في المياعه ..
🤷🏻♀️.......🤦🏻♀️
قداش أحنا لاهيين في بعضنا ..
حذفت التليفون و اتكيت مستريحه .. الصاله صغيره ممكن كبرها 4x4 فيها روشن ع اليسار و روشن مقابلني ..
الروشن الي ع اليسار يطل ع برج ايڤل 😍 و شوارع باريس الي كلها ورد و أمطار ..
الروشن الي مقابلني يفتح على برج الساعه ( اليزابيث ) 😍 في لندن .. أسمعي .. أسمعي صوت القطار 😍😍
اااااااه شقتي الصغيره ♥️ مش عارفه لو كانت ملكي كيف 😄
اتكيت انا و رقيه ..
تصدقي و تآمني بالله 👌🏻 إني رقدت يومها و أنا مبتسمه ☺️ و حتى ننتبه لنفسي و نعدل عضلات فمي نرجع نبتسم تاني ..
تاني يوم الصبح فقت لقيت اتصالات و رسائل من عائلتي الحبيبه ..
و لأني ما نبيش شي يضايقني قررت ما نقرا شي ..
اتصلت بي مغيره ..
صباح الخير أستاذ مغيره ..
رد عليا : صباح الورد كيف حالك توا ؟
قتله الحمدلله .. قالي أنا في أجتماع في الوزاره نطلع نكلمك ..
قتله تمام به ..
سكر الخط ..
بعتلي رساله ( طمنيني عليك لان زحمه جنبي )
بعتتله ( كنت نبي نعتذر ع الخدمة اليوم لأن عندي ظرف )
بعتلي ( تمام .. نطلع من هنا نكلمك )
بدأ المنطق عندي يفسر في معطيات جديه 👌🏻 .. هو مهتم بيا بدليل سكر الخط و بعتلي رساله .. ليش يتصرف هكي لو انا مجرد نزوه !!
في مواقف صادقه 👌🏻 هي الي تخليك تطلقي العنان لي نفسك ..
قعدت متكيه في مكاني مكسده لا عندي شي نصمه و لا وراي غذاء ..
بعد نص ساعه اتصل بيا مغيره .. صوته يدل ان في زحمه جنبه و كيف طالع من الأجتماع ..
قالي شن في مريضه ؟
قتله لا .. بس عندي ظرف ...
قالي مستحقه شي ؟ ناقصك شي ؟
سرحت في الكلمة 🥺🥺 قتله لا لا ..
الكلمه الي أول مره نسمعها في حياتي .. الكلمة الي تحسسك بي الأكتفاء ♥️
قالي اليوم عادي خودي راحتك .. لكن بكره لازم تجي نطمن عليك و على أمانتي ..
قتله أمانة شنو ؟
قالي يومها في الليل أعطيتك أمانه ..
بلعت ريقي 🥺♥️ و قريب سكرت عليه الخط ..
قالي استريحي توا و ضروري بكره تجي خدمتك ..
سكرت الخط و أنا و الله ما نتذكر حتى أسمي 🥺♥️
ياريتني ما تزوجت .. ياريتني أعطيت لنفسي فرص نعيش و نشوف و نختار ..
ياريتني كملت قرايتي ..
ياريت و ياريت و ياريت 😔💔
تلفتت لي رقيه 😍 أنتي قاعده مننيه .. نووووضي .. هيا نووووووضي
تتكسل و تقيم في أيدياتها و الشويربات متطرمين 😄😄
نووووووووضي .. هيااا نوووووووووضي ...
😳😳😳😳 هذا شنو الي سمعته توا 🌬 حي شكله تنوير 😂😂 هكي ايديروا في وجه ماما .. و بدينا نلعبوا في الفراش ..
فتحتلها أغنية حمود .. حمود .. قوم أصحى من النوم ..
دفتني بي رجلها مزال خاطرها ترقد 😄 قتلها حي 😱 زعلتي ع خاطر قتلك حمود 😂
ممكن أنا اليوم بس كيف أنتبهت أن عندي طاقة
حب و أيجابيه و أهتمام نعطيها بنتي 🤷🏻♀️♥️
حتى العطاء يبي راحه .. يبي راحه .. يبي راحه ..
نضنا غيرنا الحفاظ 🤭🤭 و نزلنا للمحل.. خدينا مواد تنظيف و ركبنا شقتنا ..
بديت انظف في المطبخ و الحمام .. ونظفت باقي الشقه ..
قعمزت نشوف للتليفون من بعيد 😶 .. الله أعلم شن فيك من بلاوي 🤔 بس مش ح نقرا الرسايل و لا ح نشوف المكالمات ..
فات اليوم و انا مره نلعب مع رقيه و مره نبني بي مخيلتي حياتي المستقبليه ..
الصبح نضت جهزت روحي بنمشي للخدمه .. خديت رقيه و طلعت .. المسافه من الشقه للطريق الرئيسي مشوار 🥵 و رقيه رزينه سلامتها .. قلبي بيوقف خلاص لكن مرتاحه مرتاحه 🤚🏻😁
خديت تاكسي و مشيت للخدمه و خايفه نشوف يمين و يسار مرات نلقى حسن واقف يستنى فيا .. نزلت الشركه و أول ما خشيت قمت راسي فوق لي مكتب مغيره لقيته واقف يضحك و يدير لي رقيه 👋🏻 و يبعت في بوسات 😘 ضحكت 🤭 و نزلت راسي و خشيت للمكتب ..
جت حنان خدت رقيه و قتلي وينك امس ؟؟
قتلها ماهو سكننا في الشقه و قعدت انظف فيها و نرتب في الأثاث ههه 🤥
قتلي أخي المكتب من غيرك تعودت عليك ..
كلمني مغيره ع تليفون المكتب و قالي أركبي نبيك ..
ركبت لقيته مقعمز هو و ضيف عنده ..
وقفته و ثقته في نفسه و كلامه مع ضيفه 🥺♥️
اخخخخ لو شفتيه يلي تلومي فيا عليه ..
حالي من حالك يا زليخا لما قلتي { فَذَلِكُنَّ الَّذِي لُمْتُنَّنِي فِيهِ }
🤷🏻♀️♥️
قعدت مقعمزه و جت أنسام جابت معاها اوراق لي مغيره و هي متضايقه مني ..
نزل الضيف و مغيره قال لي انسام انزلي معاه .. وقتها وقفت تشبحلي و الشرر كله في عيونها ..
سكر مغيره المكتب و قعمز ..
قالي مروه اختي امس اتصلت بيا تسأل عليك جيتي او لا .. و قالتلي اول ما تجي كلمني طول ..
شن في ؟
تنهدت 😔 و قتله بصراحه عندي مشاكل مع راجلي و طلعت خديت حوش بروحي هذا علاش هما يسألوا عليا ...
قالي أنتي متزوجة ؟ 😳😳
توترت و قتله ايه 🥺 ..
قالي تعرفي انا ما نعرفش حتى شن علاقتك بي مروة اختي أو شن صلة القرابه .. كلمتني قالتلي شغلها معاك و وافقت و خلاص 🤷🏻♂️
قتله مروه أختك سلفة مسره أختي ..
قالي ايه ايه فهمت ..
أنتي خوك مقعد ؟ و بوك زمان توفى في حادث ؟ ..
قتله ايه ..
قرب مني و قالي مزنه تبي أي شي أنا خوك و حط أيده ع صدره ..
تبي تقعمزي الفتره هادي في الحوش على راحتك .. و لو كنتي خايفه من حد يجيك هنا أنا نقدر ننقلك فرع تاني .. أنتي قولي شن تبي و أنا حاضر 🥺♥️ ...
اخخخخخخ 🤦🏻♀️ قداش تمنيت وقتها نبكي ..
قداش مشاعرنا هشه و يأثر فينا الدعم العاطفي ..
ممكن احنا و الله ما نبو الحرام و لا الحريه و الله ما نبو الذهب و لا نبو السفر ..
نبو رحم تقعد أوصاله طول العمر تغدي أرواحنا مهما عثرنا 👌🏻♥️
يتبع ♥️🌺
