♥️🌺 النهاية ♥️🌺
مات_الكلام ♥️🌺 النهاية ♥️🌺
كلمتني المحاميه و قتلي ضروري تمشي تفتحي محضر و غدوه تجيبيلي إفاده ..
قتلها به ..
ناديه تصبر فيا .. قتلي ما كنتش نحساب إنك منفصله على راجلك 😰
قتلها مشاكل الفتره هادي بس .. و نجري ع الطلاق ...
قعدت جنبي لين هديت و روحت .. كلمني مغيره قالي استاحشتك 🥺♥️
قتله محتاجاتك انا هلبا ..
قالي نجيك ؟ ..
قتله نستنى فيك ..
جى للشقه و أول ما خش خداني في حضنه .. قعدت ليله كامله في حضنه من غير ما يصير بيننا شي .. الصبح و هو طالع قالي حتى الليله ح نجيك ...أعطيته نسخه من مفتاح الشقه ..
اتصلت بيا أمي و قتلي الشرطه جت قدام الحوش .. شن في ؟ شنو الي صاير ؟
قتلها ما نعرفش 😳
أستغربت .. زعمه أمالي حسن !! ....
اتصلت بيا مسره .. قتلي خطيبة مغيره فاتحة فيك محضر إنك تهددي فيها بي التليفون و بالرسايل و توزعي في رقمها ..
قتلها أنا ما نعرفهاش بكل أصلاً ..
قتلي تحسابي روحك تقدريهم الناس هادوا ؟
سكرت الخط و أنا نحس إن الناس كلهم عليا ..
كلمت مودة قتلها مشيت نعزي في زميلتي توفت بحادث الله يرحمها و تلاقيت أنا و مروه أخت مغيره و ما بتش تسلم عليا و واخدين مني موقف هذا علاش أكيد خطيبته دارت هكي لأن واصلتها دوة .......
قتلي تو نمشيلهم انا و نوقفهم عند حدهم .. اتصلت بي مغيره و حكيتله كل شي ..
تضايق و قالي مزنه أنا نحبك و عيوني ليك و مش ح نرخي بيك بكل و مش ح ينقصك شي اوراقي خوك في ألمانيا و عمليته و مل شي منظم .. لكن أرجوك ما نبيش مشاكل مع عيلتي و خطيبتي ..
خليك بعيده مزنه ..
أنصدمت 😰😰 ايه .. بعيده ..
أنا مفروض نقعد بعيدة ..
بعد شنو ؟
علاش البنت هي الي تدفع ثمن أخطاءها و الرجل لا ؟
سكرت الخط و لي أول مره نفيق على روحي ..
طلعت مشيت للمركز فتحت محضر و روحت لقيت حسن و رقيه تحت العماره ..
مش عارفه ليش نظرتي لي حسن جديدة المرك هادي ..
خديت بنتي في حضني و تفاجأت .. قالي حسن بنتك تبكي تبيك و من امس ما كلت شي ..
و مشى خلاني ..
خديتها في حضني و ركبت بيها للشقه .. قتلها استاحشتي ماما ؟
هزت بي راسها ايه 🥺 ..
خشيت درتلها بطاطا مقليه و قعمزت تاكل في حضني ..
جت ناديه و قعدنا نهدرزوا و حكيتلها على أنسام و كيف توفت ..
تلفتت لقيت رقيه تشبحلي 😧 قتلها شن في ؟؟
قتلي شكون مات ؟
قتلها 😨 ههادي زميلتي في العمل مشت عند ربي 😰😰
قتلي حتى عبدو مشى عند ربي ..
قتلها من عبدو ؟
قتلي يسكن بحدانا ماهو هو ولد صفي 🥺
شديتها من إيدها .. قتلها يسكن بحدا حوش بابا و يقرا معاك ؟
قتلي ايه ..
قتلها عبدو الي حناه الحاجة خيريه ؟ قتلي ايه 🥺 ...
قتلها كيف مشى لي ربي ؟ ..........
قتلي بوه ديما يضرب فيه .. هو هكي يقولي 😢 .. قتلها ايه !!
قتلي مشى لي ربي .. ماهو بوه يقوله موت ترفعك ....
قتلها شكون قالك الكلام هذا ؟
قتلي عمتي تقول موت ترفعك انتي بنت أمك .. عبدو ربط روحه في شجرة كرموس ..
أنصدمت 😨 ...
خديتها في حضني و قتلها معاش تسمعيهم شن يقولوا به ؟
هزت راسها به 🥺 ...
وقتها نحساب روحي نهيت الموضوع بحضن و نصيحه بس ..
كملت هذرزتي مع ناديه ..
كلمتني أمي تسأل على رقيه .. قتلها سامحيني ع الشرطه الي جوك ..
قتلي ان شاءالله تفيقي على عقلك بس ..
قتلها نهاية الشهر نسلم الشقه و نجي نقعد عندكم ...
قتلي بتمشي عرس بنت خالتك ؟ ..
قتلها ايه .. اهي رقيه هنا و بناخد نحنيها انا و ناديه جارتي ..
قلت لي رقيه هيا خشي للحمام ( أكرمكم الله ) قبل ما نبدوا بالحنه ..
ناضت خشت و هي فرحانه بالحنه ..
حنيتها و رقدت .. روحت ناديه و انا رقدت جنب رقيه و مغيره يتصل و سكرت الجهاز ..
تاني يوم نضت الصبح نحيت الحنه و انا نلاعب فيها و هي فرحانه ..
و اول ما فتحت الجهاز اخوات حسن يتصلوا بيا .. رديت عليهم و كلمة مني كامة منهم ..
رقيه واقفه تشبحلي 🥺 قعدت تعيط و تخبط و تقولي خلاص خلاص ..
سكرت عليهم ..
و مشيت خديتها في حضني ..
قتلي بياخدني بابا ! 🥺
قتلها لا .. هادي عمتك الي تحكي ..
لكن ح يجي بابا ياخدك شويه يشوفك و بعدين تجي باهي ؟
قتلي لا نبيش نمشي غادي 🥺😢 .. من غير ما نسأل علاش قتلها لا لازم بابا يشوفك ..
كلمت حسن قتله عرس بنت خالتي بنمشي نأجر بدلة صدرة لي رقيه للربيع ..
اول ما توصل للعماره اركب خودها لاني بنطلع انا ...
قالي به ..
وصيت رقيه قتلها ما تفتحي لي حد و أهو المفتاح ع الطاوله لين يجيك بابا باهي ؟
قعدت ساكته تشبحلي 🥺 ..
بوستها و أعطيتها كيس شيبس و طلعت ..
بدا مغيره يتصل بيا مره .. حميده مره .. أخت مغيره مره ..
سكرت الجهاز ..
مشيت خديت البدله و ركبت تاكسي روحت ..
دخلت المفتاح .. فتحت الباب .. طقه وحدة بس و نفتح ..
غريبه شكلها رقيه بعد ما رفعها بوها سكرت الباب زعمه ! ...
قعمزت في الصالون برا و نحط في ذهب الصدرة ع الطاوله نشوف فيه ..
فتحت جهازي ..
وصلتني رساله ..من حسن .. ( جيت طقيت ع الباب و روحت ) ..
شن يقول هذا !!
يكذب عليا !!
و لا بعتها قبل ما ياخد رقيه !!
اتصلت بيه .. قتله جيت هنا ؟
قالي جيت و ما فتحلي حد .. و قاعد قريب ..
قتله رقيه وين معناها ! ..
قالي مش معاك ؟ ..
قتله لا خليتها في الحوش نحسابك خديتها ..
قالي انا جاي ..
سكرت الخط و انا ندعي عليه .. هالكذاب هذا خدا بنتي و بيفوته عليا .. تي كان ما خداهاش شكون الي مسكر الباب بي طقه وحده !!
سمعت حركة في المطبخ .. ما عدلتش نحساب صوت كيس او ريح ضربت حاجة ..
جى حسن و طول فتحت الباب و بديت نعارك فيه ..
و هو يحلف ان ما فيش حد فتحله الباب ..
سمعت صوت تاني في المطبخ ..
خليت حسن واقف و مشيت المطبخ ..
خشيت شفت آخرتي ..
شفت مصيري ..
شفت عذابي ..
شفت مفردات الألم كلها ..
كانت رقيه مربوطه بحبل في رقبتها من الروشن و جنبها كرسي ..
قعدت واقفه جامده في مكاني ..
هادي تجرب صح ؟ ..
خش حسن .. و ع طول قال لا إله الا الله ..
مشالها يجري يفك في الحبل من رقبتها .. وجهها ابيض .. فمها ابيض .. عيونها مفتوحات .. في عرق في جبهتها بارز هلبا ..
حسن ينفخ في فمها .. يضغط ع صدرها .. قامها و طلع بيها يجري ..
انا جامده في مكاني ..
مفروض نعيط ؟
نخبط على وجهي ؟
ننهار ؟
نبكي ؟
اطلعي اجري وراء راجلك مزنه ..
طلعت نجري و نزلت من العماره ركبت من الخلف في سيارة مع حسن ....
رقيه راقده ...
ايه ايه راقده ..
وقفت قدام العنايه .. وجهي ابيض .. قلبي يقولي هذا اليوم الي خايفه منه .. هذا اليوم الي ما تبيش و لا وحدة فينا تواجهه ..
قلبي سخون .. قلبي يحرق .. اووووووووف ..
دقايق و نفتح باب العنايه .. طلعت الممرضه كيس كناسه و اعطتهولي ..
قتلها شن هذا ؟
قتلي ملابس بنتك ..
أنا و حسن بس واقفين .. العنايه جمعتنا .. طلع الدكتور قال لي حسن البقاء و الدوام لله ..
وقتها بس طلعت مني عيطه .. ندور في مكاني و نخبط و نعيط ..
حسن شادني .. و انا نبي نجري .. نبي نهرب .. نبي نعيط اكثر ..
على علو صوتي لاااااااااااااااااااااااااااا نخبط على وجهي .. نريش في شعري ..
لين لقيت روحي في حوش بوي .. كلهم يعيطوا .. كلهم يخبطوا ..
حميده تنقز و تعيط .. مفيده تنذب ..
يا وجع أرواحنا آمته بس تستكين 🤷🏻♀️💔
...............
حسن .. يا حسن طلعني في سيارتك التاكسي دهورني .. و الناس توقفك و انت تقولي عندي توصيله بناخد حقها في فراشي 😉.. و أنا نقولك ضيعة عليك ال 10 دينار 😆
حسن هات سوريتك نخيطهالك ..
حسن حولي دينار رصيد .. توا معقوله يا حسن مطلعني باش تشريلي حلوة صوف 🍭 و لا سبول 🍿 الناس تمشي مطعم و انا ناكل في سبول مندي 🤨 قالي أمالا هاتيهم هي 😜 ..
حسن كيف بنقابل أمي و نقوللها أنا حامل 😰 ..
قالي عادي قولي لي وحدة من اخواتك و تو تقوللها 🤪 ... قتله لا لا حتى اخواتي نتحشم .. وووووه ياريتني ما تزوجت 🤦🏻♀️
مزنه نوضي .. نوضي اليوم عيد الأضحى وراك بطن و مصارين و عصبان 😆
يا رومانسيتك يا حسن 🤦🏻♀️
نوضي يا عصبانتي 😆 شوفي الرومانسيه 😉
أسمع حسن ..
يا روحه ..
أنا جعانه بنموت بنخش المطبخ لكن أمك معسكره في الصاله شاده التوكة ..
قالي تعالي عندي ليك عشاء مليح 😘 قتله نوض نبي ناكل .. مشى للمطبخ دارلي سندوتشات جاي بيهم وراء ضهره و خش بيهم للدار ..
خيرها السياره تخض ؟ .. ما تقوليش بتوقف ؟ ووووووك ديما محشمتنا في الطريق ..
قالي هذا بدل ما تنزلي ادفي معاي 😆
أسمعي مزنه أهو بنرفعك عرس حوش عمتك لكن يمين الله يشم ريحتك ذكر و لا يشوفك نحول خيمة العرس لي عزاء ..
حسن حسن حسن شوف رقيه بدت تمشي 😍 .. قال أريتها تمشي على قلب بوها ♥️
🤷🏻♀️
تاريته الحب 👌🏻 راحه .. روتين .. فطيرة و شاهي .. نوم .. بساطه ..
أما الشغف و العشق و الهيام كلها أوهام ..ضريبتها غاليه .. غاليه هلبا ..
ااااه يا وجع روحي ..
خلاص يا مزنه !!
ارتحتي ؟
هيا بري عيشي حياتك توا زي ما تبي ..
خداها ربي ..
و كأنه يقولي أهي الساحه فاضية توا ..
لا محاميه ..
لا حضانه ....
لا خديتيها من مدرسة ..
لا خداها هو من مدرسة ...
لا تخليها عند بشرى ..........
لا تخليها عند ناديه .............
لا تشدي التليفون تهدرزي مع مغيره و تنسي روحك و بنتك تسمع و تتراهقي ...
رقيه قالتلنا امشوا اتطلقوا و كل واحد فيكم يبدا حياة جديدة .. و أنا حياتي مع طيور الجنة عند الله عز و جل ..
مش ذنبي جيت طفلتكم .. مش ذنبي جيت نتاج معاشرة زوجيه ..
كنت رصاصه في بيت النار 👌🏻 في سلاح تلعبوا بيه أنتو الزوز 👌🏻 الطلقه هادي قتلتكم انتو .. و أنا حيه ..
قالوا ناس زمان من دار الشر 👌🏻 يموت بالغدار 👌🏻
........................
جتني مسره .. قتلي تمشي للمغسله ؟
هزيت براسي الثقيل .. بقلبي المجهد المتعب .. بعيوني المنفوخات ..
نضت و غسلت وجهي و لبست عبايتي ..
طلعت ركبت مع مسره و راجلها ..
وصلنا للمغسله .. ما أصعبها .. ما أحرها .. ما أوعرها ..
خشيت .. متهالكة .. ميته نمشي على رجليا .. لكن ربي يقولي عيشي كل لحضه و لحضتها 👌🏻
خشيت .. لقيت أمرأه في عمر أمي .. قتلي بتغسليها أنتي و لا أنا ؟
ما قدرتش ننطق بحرف .. ملامح وجهي بائسه .. ردت عليها مسره .. أمها تغسلها ..
رقيه مننيه .. هيا نوضي نغسلك زي غسل يوم ولادتك .. هداكا نحينا بيه أوساخ و دماء رحمي .. لأنك جيتي لي دنيا وسخه .. و هذا لانك بتمشي لله عز و جل نظيفه .. سبحان الحي الذي لا يموت 👌🏻 ربي حبيبي و كأنه يقولنا جيتوها الدنيا بالدم .. بالصراخ .. بتمزق أرحامنا .. بي آلام مخاضنا .. لانها وسخه .. لانها كلها مشقه و تعب و صراخ ..
و نمشوا للآخره مغسلين .. بالطيب .. بالكافور .. بالقماش الأبيض ..
🤷🏻♀️💔
اللهم نفسي فأعني عليها 😔♥️
وقفت جنبي المرأة توري فيا كيف نغسل .. جامده ما تكلمتش بكل .. مره مره تنزل دمعه خجوله من وجه شاحب .. كملت تغسيل ..
حطيت إيدي ع شعرها .. فرقته من النص .. واقفه نظفر فيه و كل ما يزيد قلبي ينعصر .. على مهلك مزنه .. كان بتكملي بياخدوا يذفنوها .. أزفة الآزفة خلاص 🤷🏻♀️ ..
قمتها خليتها في حضني .. حضنتها حضن مفارق 👌🏻 .. حضن مودع .. وداعا يا جسد جى من خلايا جسدي ..
خدتها مني المرأه و بدت في التكفين .... ريحة الكافور ماليه الدنيا ..
طلعنا بيها .. حسن واقف .. ركب مع رقيه في السياره من الخلف .. وصلنا قدام الخيمه .. نزلت و دخلوا رقيه يقروا عليها ..
لحضات و مشت مني لمنزلها الدائم .. هادي دار النوم الي كان خاطرك فيها رقيه ..
🤷🏻♀️🤷🏻♀️
قلبي أنا 💔🥺
بعد الجنازه روحوا أهل حسن داروا عزاء في حوشهم ..
فاتت أيام العزاء .. ما نكلمش في حد .. تبكشت ..ما ناكلش .. ما نرقدش ..
فضت الدنيا .. قلت لي عماد .. أنا نبي نسافر .. قالي وين ؟
قتله أي مكان .. معاش نبي نقعد هنا في ليبيا .. نسافر معاك اندير عمليتك .. نبي نكمل قرايتي .. نبي نحاضر و نوعي الناس ع أصول التربيه .. نبي نبني نفسي بنفسي ..
نبي ندور في كل مكان و نحكي تجربتي .. نبي نوجه الناس ..
شد في إيدي و قالي حتى أنا نبي نكمل قرايتي .. نبي نخدم و ما نخليكش مستحقه شي .. نبي ندور معاك الدنيا كلها و توعي الناس ..
فاتت أيام و جهزت نفسي للسفر أنا و عماد و طلعنا متجهين للمطار .. لقيت مغيره واقف في المطار .. شكله بيسافر ..
حياته عاديه 🤷🏻♀️ ما تغير شي .
خليت عماد في الصاله الداخليه و مشيت بناخد اميه ..
لحقني و هو ينادي فيا مزنه .. مزنه ....
انت قاعد حي ؟؟ ..
موت .. امشي موت ..
امشي موت مغيره ..
علاش قاعد عايش ..
أمشي امرض به .. خيركم ما تمرضوش ! ..
علاش قاعد تتنفس مش مخنوق ..
قاعد تضحك .. تاكل .. تستفرغ .. تسافر .. تحب ..
امشي موت ..
الأشكال الي زيك لازم تموت ..
و مشيت خليته يشبحلي بعيون دامعه 🥺 ..
ركبنا الطياره ..
وداعاً ليبيا .. وداعاً امي البكر .. وداعاً بلادي .. لفضتيني محن .. حروب .. فقر .. قلة .. ظلم .. واسطات .. حواجز .. صعوبات .. أغراءات .. رشاوي .. جهل ..
قتلتي فيا طموحي .. حريتي .. مساواتي .. حقوقي ......
سافرنا ألمانيا .. و دار عمليته عماد .. و سافرنا تركيا أستقرينا فيها و قعدت ندور ع شغل ..
مقعمزه ع الكورنيش نكتب .. نجهز لي محاضرة بكره ..
رقيه رقيه .. شوفي آيه 👈🏻 هوينا آيه هي و رائد تشري غزل البنات عاشت عندها مبدأ 👌🏻
شوفي شوفي ماريا 👈🏻 هي و سيف الأسلام يصوروا ع البحر عاشت عندها قضيه 👌🏻
هداكا بوسيفي 👈🏻 يشري في ورده لي مرته 🤪عاش عنده رجله 👌🏻
اووووف كيف جوا كلهم هنا 🤔 ! يخطموا من جنب بعض كلهم لكن ما يعرفوش بعض ..
عمي الصادق هوينا 👈🏻 يلعب مع نزار الصغير .. عاش صادق و ربي قال { لننصرنكم و لو بعد حين } ...
رقيه شوووووفي 🤭 نور مدايرين معاها لقاء صحفي 😍 بدت مصممه كبيره ..
كلهم ..........
عاشوا على مبدأ 👌🏻 ما سيبوش صلاتهم في عز المحن ..
هي معادلة بسيطه .. أعتبري نفسك كل ما تطلعي تقري .. تخدمي .. تشري .. و تجاهدي نفسك في هالدنيا تروحي حوشك كلك شوك مغروس في جسمك .. مش ح يتنحى الا بصلاتك 👌🏻
أما أنا 🤚🏻 نغرس الشوك فيا لين عمى بصيرتي و قلبي و عيوني ...
أكتبي نهايتك بي إيدك مزنه .. أمسكي أنتي القلم المره هادي ..
مش نادرة الي ح تكتبها النهاية المره هادي .. أعقدي أيديك نادره 🤚🏻 و أوقفي أقري كلمات غيرك و أحكمي و تفرجي 😉 ...
أنا مزنه .. هديت كل حصون ممرات حياتي .. حصن صلاتي 🤚🏻 حصن شهادتي 🤚🏻 حصن كياني و شخصيتي 🤚🏻 حصن خدمتي و قرش الحلال 🤚🏻 خفت و مواجهتش ..
لا لا لا هذا كلام نادره ☝🏻... اطلعي مني نادره اطلعي مني ..
خلي نعاودوا ..
أنا مزنه .. كبرت لا خديت شهادتي لا تخرجت لا فكرت في مستقبلي .. ما كنتش قويه .. فرحت بي الزواج گ فكره 🤚🏻 فكره بس .. شفت منه الجانب الوردي الي نحرمنا منه في طفولتنا .. ما كبرناش عندنا ديار نوم ورديه و العاب و فراش مخملي .. ما كبرناش عندنا خصوصيه ..
اكتشفت إنه حمل بوزن ثقيل على كاهلي .. وزن ما يعادلاش الا صلاتك 🤚🏻 و قربك من ربي .. الثقل هذا ربي بس يعادله و يخفف وزنه .. كنت نحساب الحب الشغف .. الفلوس امتلاك .. كل شي هو الي يعادل الثقل .. أحتسبي الأجر حتى في اللقمه الي تقدميها لي زوجك و صغارك ..
أنا خسرت .. ما نبيكش تخسري 🥺💔 ..
أنا مشيت غلط .. ما نبيكش تغلطي 🥺💔..
أنا ضعت .. ما نبيكش تضيعي 🥺💔....
و كلنا دفننا فلذات اكبادنا 👌🏻 أنا ذفنتها تحت التراب بس أنتي ذفنتيها بالحياة ..
الله يرحمك رقيه ♥️🌺 الله يرحمك ( غزاله العيله ♥️🌺 )
أنا نادرة عطاءاتي كلها حب ♥️🌺 زرعته بنفسي في نفسي .. ما علمهولي حد 🤚🏻 تجردت من بقايا ماضي طفولة كل ليبي و ليبيه و ربيت نفسي بنفسي من جديد ..
غيرت كل قوانين الي فتحت عليها عيوني .. بحثت .. قريت .. تثقفت .. عرفت الصح من الغلط و هدمت بيه أصنام معتقداتنا الوهميه ..
أساس حوشك 👌🏻 في قرآنك .. و في قلبك .. في حبك و أحتوائك و حنانك بس ..
🤷🏻♀️
إن أخطأت فمن نفسي و إن أصبت فمن الله ♥️🌺
No name ♥️🌺
