فـي صمتـها نــاي

البارت السادس عشر

             #فـي_صمتـها_نـاي
   
              #الـجــزء_الـاول

          #البارت_السادس عشر

          #للكـاتبة_زهراء_المظفر   
_____________________________ 

قبل لاتبدون بالبارت لا تنسون تصلون ع النبي

اللهم صلِ على محمد وال محمد💙✨

_____________________________

قراءة ممتعة...
_________

11/11/2013

فتحت عيوني بكل بطئ واحاول استوعب اني وين ..

جان ضوه الغرفه الصادر من الشباك خافت ..

درت وجهي ع حازم جان نايم وغاط بسابع نومه ..

ابتسمت ابتسامه خفيفه ورفعت الغطى عني بكل هدوء ..

تحسبت من الغرفه امشي ع اطراف اصابعي وبكل حذر  .. طلعت منها واني احاول ما اطلع اي صوت حتى لا يكعد حازم

سديت باب الغرفه وفتحت حياة جديده الي اتمنى تكون احسن من الي راح وعشته قبل رحت للمطبخ وضليت ادور بين الاغراض واستكشف بيهن

اخذتلي فره بالبيت ..امشي واحجي بيني وبين نفسي ..هاي الصوره احول مكانها هنا احلى
والقنفات اغير ترتيبهن وحتى الصبغ اخليه يسوي غير الوان ، يصير بيتنه يجنن

رحت للمطبخ مره ثانية مقرره اسوي احلى ريوك ..

طلعت الي موجود وبديت اشتغل وارتب بالسفره

عبس وجهي من تذكرت كل الي صار امس وشلون بليله وضحاها تغير كلشي وصارت اشياء مستحيل جنت اصدك راح تصير باقل من 24 ساعه ..
كل الاحداث امس صارت بسرعه يعني اني جنت ببغداد اسولف وي عمي عن اهلي واليوم اني بالنجف ومتزوجه هم ، سبحانك اللهي يامغير الاحوال من حال الى حال  ...

وتبسمت من تذكرت دخلة حازم عليه وهو يشوفني خايفه منه واتراجف كدامه بعد الي صار..

حجه وياي وفهمني واعتذر مني حسيت بأمان غريب يمه حجاياته جانن ينطني شعور عجيب بالامان يمكن حبيته او ما ادري اذا هو هذا الحب لو مجرد ارتياح نفسي لشخص معين

ادري ماصار اعرفه غير ساعات معدوده بس من الاخير ليش لحتى ما احبه !!
اذا شخص موفر الي الحاجات الي جنت مفتقدتهن من اهتمام وحجايه حلوه وفارق العمر الي بينه مخليه يتصرف وياي مثل بنته ليش ما احبه بهالسرعه بس كون ما اتندم واعض اصبعي ندم ..!

كملت الريوك الي جان عباره عن بيض وطماطه وزيتون واكيد وياهن جاي رتبتهن بترتيب حلو يفتح النفس رغم بساطة الاكل واخذته اله ..

جان توه فاتح عينه ابتسم بوجهي وكال ..

ـ صباح الخير يعروسه شنو الي كعدج من الصبح