فـي صمتـها نــاي

مشهد الجزء الثاني

             #في_صمتها_ناي

               #الجزء_الثاني

          #للكاتبة_زهراء_المظفر

_________________________

" مشهد من احداث الجزء الثاني

اللهم صلِ على محمد وال محمد💙✨

_____________________________

انسد الخط بوجهي .. ملامحي متجمده و مابدرت مني اي كلمه .. اصلا هي ما انطتني مجال ادافع عن نفسي راسا سدت الخط

اصابع ايدي تتراجف ودموع عيوني بدت تهطل على خدودي ..

مابين فرحة اللقاء وغصة الفراق الي دامت سنة كامله ..

واخيرا راح التقي بـ يوسفي مثل لقاء يوسف بـ يعقوبه

كلبي دكاته مثل الطبل ..مشاعري تلخبطت ما اعرف افرح ، اهلهل ، اركص واصفك لو اضوج واتعصب ؟

كل ضيمي وقهري الي عشته سنه كامله واني ادور عليه ، سكنت بالسوك وعرفت كل ناسه واني ادور على ريحه منه تدليني عليه !!

خلصت ايامي وعمري انفنى بالجحيم مابين شماته وظلم واستغلال من اقرب الناس من الي دمي يمشي بأوردتهم !!

سنه كامله ادور واني اعاني كدامكم جنتوا تكدرون تخففون عني هالهم  وانتم تعرفون مكانه ، ما انقهرتوا عليه ما رف الكم جفن على حالي

بجيت ، انجنيت ، توسلت بالرايح والجاي ، اليسوى والمايسوى بس لحتى الكه خيط يدليني على مكانه ما اشفقتوا على حالي !؟

شهد المفروض اكثر وحده تحس بيه
شلون انطاها كلبها تسكت كل هالمده شلووون ؟؟

راح اتخبل ولكم يا عقل يبقه بيه وكل هالمصايب تطيح فوك راسي !!

امراضي الي تهدد حياتي كلها صارت بيه من بعد فقدانك يروحي .. بس راح اجيلك وغلاتك ما اتأخر عنك بعد ولا دقيقه

وجهت انظاري لشاشة التلفون الساعه ب3 ونص الفجر ..

كمت على حيلي فتحت الضوه ، امشي بخطوات متراجفه وما مستوعبه ..

حيرتي حيره .. تساؤلات براسي ما لكيت الهن جواب لهاي اللحظة .!!

طلعت علاگه نايلون سوده من الجرار .. خليت بيها دشداشه وحده وكم شغله بعد وياها وسديت العلاگه

لفيت حجابي على راسي وسحبت العبايه من  الكنتور ..

طلعت جنطه مال ايد عندي حجمها متوسط لا جبيره ولا صغيره ..

اخذت بطانة الجنطه بأيدي وفتكت الخياط شوي

جبت كل فلوسي وخليتهن كدامي  رتبتهن وخليتهن بداخل حجاب من حجاباتي ولفتيهن عدل صارن رزمه تقريبا بمثل حجم كارتون العصير الازرق ابو الربع ..