فـي صمتـها نــاي

الرابع والعشرون

#في_صمتها_ناي

#البارت_الرابع _والعشرون

#للكاتبة_زهراء_المظفر

_____________________________

الاكثر تفاعل للبارت السابق
ـ مبروك 💙💌

Aala_Ayad
_____________________________

قبل لاتبدون بالبارت لا تنسون تصلون ع النبي

اللهم صلِ على محمد وال محمد💙✨

الي تكول البارت قصير اموتها 2500 كلمة 😂💔
_____________________________

*
يمه بروحتج ذلتني الايام
غريب بين اهلي وناسي ضليت
يتيم البيت بعدج حالته تصير
التموت امه يتيم وانتي ام بيت
ياريت وترد وياج الايام
ياريت ترد صدك مو كون ياريت
اختلف لكن بعد مارحتي الحال
مصيبه بصفي واخرى تكلي الك جيت
شنو نفع الحياة البعدج تكون
لذلك اندفن يمج تمنيت
تحت رجلج اتوسد وانسى الهموم
حتى اضمن صدك للجنه طبيت

احلفج بيه يمه ردي للبيت !💔💔

2009/8/2

الساعه ب 3 وربع الظهر .. الشمس عموديه علينه والجو حار يصهر الواحد صهر وخصوصا بالمقبره يصير الجو حار اكثر ماعرف اذا هالحر من الشمس لو من القهر والجمره المشتعله بداخلي وجاي تجويني وتحركني بنارها ولهيبها

امشي بخطوات يائسه ، تعبانه ، منتظره جحيمها القادم ، خطوات مايحس بيها الا عاش مثل هاليوم ..

كضيت القطعه الحديده الموجودة بباب المنشأه (سيارة كبيرة الحجم لنقل المسافرين )

استندت عليها .. شددت قبضة ايدي بـأحكام عليها ورفعت روحي حتى اصعد ، السياره عاليه كلش وما اكدر اصعد بدون مساعدة هالحديده ، حتى بالرغم من طولي ..

تمشيت ببمر السياره والعيون كلها عليه ، الي يباوع بنظرة شفقه والي يبجي وياي ومحترك دمه مثلي والي يتشمت بيك حتى بالموت !!

مقعدي جان بنهايته السياره يم خواتي كلنه متجمعات بأخر 6 كراسي وكاعدات سوه ..

باوعت لوجه كل وحده منهم .. دموعنه الممزوجات بذرات من التراب المتطاير واحنه نركض حتى نستقبل قبر امي بأحظانه جانت تجري ع خدودنه وكل ما اشوف وحده منهن دموعي تزيد اكثر

كعدت يم اختي الجبيره ليلى ودفنت راسي بحظنها .. شهكتي بجتهن كلهن وياي

ماجنت مصدكه انو امي ماتت وبعد ما راح ترجع ، ما راح تشتكيلي بعد من ظلم ابوي الها
ما تسويلي ظفيرتي وتشدلي الشريط الابيض عليها ، لان اني لهسه ما اعرف اسويها

بس هاليوم من شفت قبرها وهي نايمه جوه هالكومه من الطابوگ صدكت هي بعد ما راح ترجع ويانه عافتني