فـي صمتـها نــاي

البارت الاول /الجزء 2

             #فـي_صمتـها_نـاي
   
              #الـجــزء_الـثانـي

               #البارت_الاول

          #للكـاتبة_زهراء_المظفر         

_____________________________

قبل لاتبدون بالبارت لا تنسون تصلون ع النبي

اللهم صلِ على محمد وال محمد💙✨

_____________________________

في صيف عام 2017
و بأحد ازقة محافظة النجف الاشرف ..

بنص طارمة البيت المتوسطة الحجم ..
رجليه حافيات يتمشن على خيوط الزولية

(الفراش الي نفرشه ع الارض بوقت الشتاء ما اعرف شنو تسمونه يمكم )

  حانيه ظهري وبأيدي الصونده والمكناسة .. جاي اغسل بزوالي البيت ..

خلص الشتا واجالنه الصيف ، الجو بدة يتحول ويصير من بارد ثلج للحار المصهر ..

الجو بالعراق عباره عن فصلين بس .. شتا بارد وصيف يطلع علينه الشمس هيه واطفالها توصل درجة حرارتها لأكثر من ال50

متعوده كل ما اشيل فراشات الشتا اغسلهن بالاول وبعدين اضمهن ..

رفعت راسي اتطمن على يوسف الي بده يركض ومايعرف شي اسمه كعده ابد
وين ما اروح يجي وراي واني هم ما اتطمن اذا ما شفته كدام عيني

صحيح متعبني ومخليني ليل ونهار بس اركض وراه وكل شغلي اسويه مرتين لان مايخلي شي بمكانه ابد

مع ذلك بس شوفته عندي تسوى الدنيا ومابيها ، رب العالمين عوضني عن كلشي بجية يوسف لهالدنيا

ضحكته وصوته بهالبيت رجعتني للحياة وعرفت معناها ، اذا قبل جان عادي عندي تنتهي حياتي لان ماعندي احد متعلقه بي ، بس هسه اني متشبثه ومثبته ايدي بهالدنيا لخاطر ابني ..

انضربت اشعة الشمس على عيوني ومنعتني من النظر .. عكرت جفن عيني الي بده يدمع ونزلت راسي اكمل شغلي ..

عين ع الشغل وعين ع يوسف الي كل يوم بس اريد اطلعه بالحديقه حتى يتشمس شوي مايقبل

اليوم لان شغلي كله بالحديقه  عرس وياي ومايبقل يدخل ..

اخاف عليه يتمرض لان الجو من يبدي يختلف يمرض الواحد وخصوصا الاطفال بسرعه يتمرضون

رفعت ظهري وسندت ثنين ايديه وره ظهري .. لفيت جسمي يمنى ويسرى بمحاوله مني حتى ينفتحن عظام ظهري الي تشنج ..

حنيت ظهري وسحبت الصونده بأيدي وبديت ارش ع الزولية حتى يطلع منها كل التايد الي بيها ..

هاي اخر وحده واكبرهن مال الاستقبال انشلع كلبي اليوم من الصبح وهسه راح يأذن الظهر واني بس اغسل بيهن ..