السلام عليكم
قدري المؤلم
عطر الورد
البارت الخامس
رياض،،،،، بعد ماعفت ريام يم ابو كرار طلعت من المكتب ورحت توجهت الغرفه الاجتماع لكيت أمير وزياد منتضرين بس أمير مزعوج علئ ساعه ينفجر عاد ماخليتهه إله اول مادخلت حاجيته واني أكله ها أمير باشا شبيك أعصابك لا تنفجر بوجوهنه ويوصل طشارنه لجمبر جبار ابو جاي من سمع بلجمبر فك النونه وهو يكول يمعود ارد اكمل واطلع وراي شغل ومافارغ لسوالفكم وهسه يله بدون بعد حجي كلمن يقدملي أوراق المشروع خليني ادرس الموضوع وهم علمود اني الاشرف عن هاي العماره وانتو استلمو خريطه المول عليكم عاد كعدنا وناقشنه أمورنا واتفقنه علئ الخطوات الجايه وانتهه الاجتماع أمير ترخص وكال راح اروح اناقش وي الوالد بعض النقط طلع أمير واني وزياد كلمن راح لمكتبه،،
ريام،،،،،،، ابو كرار من خلال طريقه تعامله الحمد لله احس التوتر خف من يمي وبديت اخذ وانطي بلحجي وياه وهو كال اترخص اعوفج تاخذين راحتج بالمكتب وشوفين شنو نقص بي بعد بكيفج والشغله الاحلئ بهاي الوضيفه مكتبي معزول مومختلط وي باقي الموضفين مكتبي خاص قريب من المدير كعدت بالمكتب وطلعت من جنطتي ورقه وقلم وسجلت أشياء بسيطه ناقصته جاي اكتب وحسيت حركه قريبه داخل مكتب رفعت راسي شفت ولد ملامحه حاده واعيونه تخوف ماادري هنه هيج لو هو جاي يخزر بيه ضل يباوع علي بعدين عافني وفات لمكتب المدير اني هم ماهتميتله بس احس نضراته تخوف مدري اني لأن ماعندي اختلاط اخاف من أقل موقف يواجهني بقيت كاعده وساكته شوي وخابرني رياض كال إذا ماعندج شي تعالي هنا يمي علئ مايخلص الدوام حتئ ارجعج نهيت المكالمه وشلت جنطتي ردت اطلع بعدين اذكرت لازم استأذن من المدير وانطي خبر ترددت ادك الباب بعدين اجرأت دكيت الباب وبعده اجاني صوت المدير وهو يكول اتفضل دخلت لكيت هذه الولد يناقش وفارش أوراقه ومخبوص رفع رأسه مثل التفاجئه ورجع نزل راسه بعده حجيت واستأذنت من ابو كرار وطلعت اول ماسديت الباب وردت اروح انصدمت من سمعت صوت حاد وهو يكول اي بلخير حجي طلعت جايب موضفه وجنك كلش مقتنع وانته بعدك ماشايف من شغله شي ان شاء الله ماتطلعها مثل دنيا من طلعتهه حراميه وموخوش أدميه كلامه جان جارح وعبالك يحجي بحركت كلب اني من سمعته ضجت من طريقه كلامه عفتهم يحجون واني طلعت امشي بس المشكله مااندل مكتب رياض طلعت موبايلي وخابرته وهو كالي تعالى اني هم بطابق الجوه بس فوتي علئ ايدج اليمنه اول مكتب راح اطلعلج صدك مثل ماكال بس فتت لكيته واكف دخلت لمكتبه كلش مرتب وذوقه حلو ومرتب كعدت وهو خطيه حار شيجيب وضل يلح خاف جوعانه خاف محتاجه شي واني اجاوبه لا تسلم ماتقصر بعدين ضل هو يشتغل واني كاعده منتضره شوكت يخلص شغله حتئ نروح بقه حوالي ساعه وخلص كلشي ولملم غراضه وطلعنه سوه يمشي واني امشي وراه شال موبايله وخابر علئ واحد سمعته يكله زياد اني خلصت بعد كلشي وراح اطلع بعد وباجر أن شاء الله علئ اتفاقنه نروح لمكان المول نهه مكالمته وطلعنه من الشركه ورحنه بتجاه الكراج وصل السيارته ردنه نصعد واشوفلك نفس هذه الولد يمه من اشوفه اخرط العافيه اعيونه بيه خزره تموت هو شافنه وصاح علئ رياض هاابو شباب وين فالت رياض جاوبه يمعود شغل وخلصته تفتر وراي شتريد مني جنك ذيب البساتين،،،
