Isla Ng Mors

Si Kapitan Aurelio ay isang manlalayag na pirata na sumunod sa yapak ng kaniyang namayapa nang ama. Bata pa lamang ay tila hinihikayat na siya ng karagatan. Hindi maikakailang kaalon na niya ang malansang katubigan at gayon na rin ang maalat na hanging tila kalasa ng kaniyang mga luha't pawis.

Kinikilala niya pati ang panganib kaya nang mahagip ng kaniyang matalas na tainga ang bali-balitang mayroon daw nakapaloob na kayamanan sa islang pinangingilagan ng karamihan, napagpasiyahan niyang kaibiganin muli ang panibagong panganib na susuungin. Ipinagkibit-balikat niya ang mga agam-agam sa isipan sa pagnanais na maging pinakamakapangyarihan na titingalain ng lahat.

Umalis siyang dala ang pangako sa sariling uuwi siyang ligtas na may limpak-limpak na ginto't salapi. Subalit, papaano niya tatakasan ang nakaambang delubyo na naghihintay sa kaniya sa parang? Higit sa lahat, hindi mawari ng Kapitan kung paano niya lalabanan ang tuksong dulot ng isang misteryosong nilalang na kanilang natagpuan.