أنا نهاية قصتك (باللهجة الجزائرية)

♡ بارت 25 ♡

[ نضال ]

لحقنا للسبيطار .. مسحت نيرة دموعها ، تاع الصح قسمتلي قلبي ..
رحنا عند الطبيب .. دارلها راديو ودارلها فحوصات تاع ارتجاج المخ ، كيما مثلا لازم تمشي في خط مستقيم ، وحمد لله كلش خرج بيان ومكانش لازم علينا نزيدو سكانار ..

خرجنا من السبيطار .. صونا التليفون ديالي ، لقيتها يما ، سور اليوم تقلب عليا الحالة بالعياط .. خليت نيرة تدخل للطونوبيل وانا بعدت شوية باش نهدر براحتي ..

نضال : اه يما ؟

يما (بالعياط) : وين راكم وواش راكم ديرو ؟ كشما درت للطفلة نضال ؟

نضال : يما اتهدني تعيشي ، ماكاين والو ، ديتها من لتم باسك ماحملتش نشوف باباها يديرلها هكاك

يما : ياا ربي واش هاذ المصيبة .. راكم فالدار ؟ وحدكم ؟

نضال : يما وش بيك ! ماديريش فيا كونفيونص ؟ حا ناكلها مثلا ؟ ماناش فالدار وماناش راجعين للدار الليلة !

يما : نضاا....

كوبيت ، تقلقت من هدرتها ، وش حا ندير لنيرة يعني ؟ راني سور بلي علابالها بلي نحبها ومستحيل نمسها ولا نديرلها اي حاجة !
بقيت نستغفر لا نزيد نتقلق ونعيط على نيرة وهي ديجا في حالة ..

بقيت نخمم وين رايحين نباتو كي قلت ليما بلي مارايحينش نجو للدار .. واش الهبال هذا لي طاح عليا ! ما عنديش وين نروح ! وباش نرجع للدار مانرجعش باسك يما رايحة تاكلي راسي بالعياط ، مالا نخليها تتكالما الليلة هاذي ومن بعد نرجع ..

جا في بالي سعيد .. عيطتلو ..

سعيد : وااش يا خو وين راكم ؟ يماك راها قريب تهبل ! علاش كوبيتلها فوجهها !

نضال : اااووف سعيد ماشي عيطتلك باش تعاونني تجي نتا تان تزيد عليا .. شوف اسمعني مليح واش راك رايح دير ..

[ نيرة ]

كنت مزالني فالطونوبيل حاكمة فراسي باسك صح كان يوجع فيا بعد الضربة لي ديتها .. حايبة نرجع عند طاطا صليحة برك ، مانيش حايبة نزيد نخمم فبابا وفكل حاجة صراتلي .. حايبة نريح برك .. عييت ..

رجع نضال للطونوبيل بعدما هدر فالتليفون بزاف ..

نيرة : وش كنت دير ؟

نضال : ماتقلقيش روحك ..

ديمارا ، وانا ماحبيتش نزيد معاه الهدرة باسك صح كنت عيانة .. النهار هذا كان طويل وماحبش يخلاص ..

مشينا بزاف بالطونوبيل .. خرجنا شوية من الولاية ، والغريب انو ماخفتش وماتقلقتش ، استغربت من روحي كيفاش دايرة فيه كونفيونص لهاذ الدرجة !

بعد ساعة طريق وحنا ساكتين والظلام داير حالة برا .. لحقنا لواحد البلاصة كي الاوتيل صغير ، يعني ديار من ثلاثة تاع الايتاجات قدام بعضهم ..