[ نضال ]
نيرة : نضال .. مانيش رايحة نرجع لدزاير ..
خزرت فيها ورمشت بعدم تصديق .. وش راهي تقول ؟ واقيل انا لي ماسمعتش مليح !
نضال : تتمسخري ياك ؟
نيرة (تنهدت) : لالا
بقيت نخزر فيها مشوكي منها ، حواجبي معقودين وعينيا يخزرو فعينيها وحدة بوحدة
نضال : وش بيك ؟ دوك برك كنتي لاباس بيك !
نيرة (دورت راسها) : مشي عليك ولا حتى على حاجة .. مانيش قادرة نرجع برك
نضال : مذابيك يعني تتفضلي وتفهميني علاش ؟
نيرة (خزرت فيا بالزربة) : وين نرجع نضال وين ؟ ياخي علابالك بلي ماعنديش وين نروح .. لهنا واخيرا لقيت دار وناس يحبوني ويعتبروني صح عايلتهم ، عشت مع بابا ومرتو المرار ، وين تحبني نرجع وانا بابا حاوزني من دارنا ؟
نضال : تجي عندنا ! دارنا هي دارك نيرة ! وياخي رايح نخطبك لالا ؟؟ مشي رانا رايحين نتزوجو ؟
نيرة : مانقدرش نرجع ! سمحلي نضال ، باباك ويماك نعزهم بزاف وخيرهم والله العظيم ما نقدر نرجعهولهم قاع ، بصح انا تحاوزت من داركم تان ، مانقدرش نرجع ، وزيد نتا راك خاطب بنت عمك ، شكون انا باش تحبس الخطبة هاذيا على جالي ؟ عمي مختار حايبك تتزوج بيها !
نضال : كيفاش هذا نتي شكون ؟ وديجا بابا عرف بلي زينب لي سرقت ماكيش نتي وتبهدلت معانا كامل وخلاص مستحيل بابا يزيد يدور من جهتها ! هو هكاك يعيط ويتقلق بزاف ماديريش زعافو في راسك ، غير عرف روحو غلط والله غير غضتيه ، رنا قاتلي كيفاش هدر عليك وبلي ظلمك !
نيرة : نضال تعيش راك مريض بلاما توجع راسك بيا وبمشاكلي ، نتا ارجع لداركم وانا نبقى لهنا مع خالتي وخياتي ، وبلاك يجي النهار لي نعاودو نتلاقاو فيه
نضال (عليت صوتي شوية) : ماكاين لا نهار لا والو ، نتيا ليا وحدي فهمتي ؟ نتيا رايحة تكوني مرتي انا راكي تسمعي ؟ انا نحبك وندير كل حاجة باش ماتزيديش تبعدي عليا ..
بقات تخزر فيا برك وعينيها يلمعو وبداو يتعمرو بالدموع .. دورت وجهها تم تم وخزرت للارض
نيرة : اسمحلي مانقدرش
وناضت وخرجت تجري وخلاتني .. خلاتني في عالم وحدوخر من التخمام ، وش بيها بصح ؟ ياخي عرفت بلي كذبت عليها وبلي مزالني نحبها ! علاش ماهيش حايبة ترجع معايا ؟ زعما كرهتني وفات الحال ؟
[ نيرة ]
دخلت للتولات ، خزرت للمراية ، غلقت عينيا باش مانبكيش خلاص عييت .. واخيرا لقيت عايلة ، واخيرا حسيت روحي بين ناسي وحبابي ، مانقدرش نروح ونخليهم ، حايبة نبقى معاهم .. بصح نضال ! نحبو وحايباتو ليا ، حايبة نبقى معاه ونعيش معاه ..
أنت تقرأ
أنا نهاية قصتك (باللهجة الجزائرية)
Romance**حائزة على المرتبة الثانية لافضل رواية جزائرية في مسابقة الملكة لعام 2021** 🥈 "سيء جدا ، ان تحمل هموما ليست مناسبة لسنك ، بينما من المفترض ان تعيش اجمل ايام حياتك" مختصر قصتي .. عانيت ومازلت ، بكيت ودموعي لا تزال على طرف عيني .. هل من نهاية لقصتي...
