أنا نهاية قصتك (باللهجة الجزائرية)

♡ بارت 1 ♡

[البطلة]
انا اسمي نيرة ، بلاك يجيكم غريب الاسم هذايا ، معناه النور والضياء .. في عمري 18 سنة ..
نوصفلكم روحي ، طويلة ، بلوندة بزاااف قريب العظم يبان ، شعري كحل فونصي كي الظلام وطويل لحتى اخر ظهري ، عينيا زروقا بحر من البعيد يبانو .. انا حجوبية ملتزمة ..

نحكيلكم شوية على الماضي تاعي .. بابا حسين ، كي طلع للافاك راح يقرا فلالمان ، ولتم تعرف على وحدة وسمها رولينا وحبها بزااااف وتزوج بيها مام سي كانت مسيحية .. وبيسك هي تان حباتو تزوجو وعقدو لتم وقعدو عايشين مع بعضاهم وجابو زوج بنات .. لي هوما مارية ختي ، كبيرة عليا بعام .. ونيرة لي هي انا .. غير قفلت عام بابا قرر يرجع لدزاير باسك ما صدقتلوش لتم ، ورولينا من كثرية لي كانت تحبو حبطت معاه لبلاد جديدة عليها وما تعرف فيها والو ..

جازو خمس سنين ، زادو جابو زوج بنات وحدوخرين ، لينة صغيرة عليا بعامين وريما صغيرة على لينة بعامين .. بابا فهاد الوقت تبدل فيهم بزاف ورجع انسان تاع زوخ وفوخ لي زعما قرا فالمانيا ، رولينا ما قدرتش تزيد تحمل المعيشة فدزاير ، وهي كانت موالفة لالمان وما ادراك ما لالمان ، وبابا مكانش مساعدها وتبدل عليها وما رجعش يحبها كيما كان وبدا يسمح فيها ويتبع النسا .. الوغ رولينا كرهت وطلبت الطلاق ، وبيسك هي عندها عقلية تاع لهيه قررت تقسم ولادها ، لي نوغمالمون هوما طروف منها ، مي هي وبكل قلب بارد قالت لبابا باش يخلي عندو الكبارات وهي تدي الصغارات ..
بمعنى ، مارية وانا نقعدو فدزاير مع بابا ولينة وريما يرجعو لالمانيا مع رولينا .. منقدرش نقولها يما باسك ما تستهلش هاد الكلمة ، راحت وخلاتني انا وختي وعمرها ولا سقسات علينا ولا حوست تعرف وش راهم بناتها ، من نهار خرجت فيه من دزاير كي كان عمري ست سنين ما زدت شفتها ، لا هي لا بناتها ، كرهي ليها يفوق كل حاجة فهاذ الدنيا ، على جال انانيتها شربت الويل وتعذبت في حياتي .. عمري ولا نسمحلها ..

بعد عام ملي راحت رولينا ، بابا تزوج بالشيطان كيما نسميها انا ومارية ، هدايات مرت بابا ، اسوء من فرعون ، الشر تاعها وحدو !! معلاباليش كيفاش مازلنا حيين للدوك معاها ، ربي سترنا وخلاص ..
وهوما زادو جابو طفل وطفلة .. انس عندو عشر سنين ، صديقي الصدوق ، مسكين بزاف ناس ملاح ويحبني وما يحبش عليا ويظل يدافع عليا حتى ياكل المخبط من يماه ، خي حيوانة وليدها وما رحماتوش .. الدوزيام ، امينة عندها ثمن سنين ، فوطوكوبي تاع يماها ، شريرة وتظل عقابنا انا ومارية ، الحاجة لي نديروها تروح تبيعها ..

هذي نبذة عليا وعلى الماضي تاعي .. الاحداث لي راني عايشتهم وراح نعيشهم رح تكتاشفوهم فحكايتي .. ♡

....

نضت على صوت الرافاي ، كانت الخمسة تاع الصباح ، كي العادة لازم نوض هاد الوقت ، تقول انا لي رح نوض السردوك .. قوانين الشيطان .. دورت وجهي لقيت مارية ناضت وبدات تحك عينيها من العيا ..