أنا نهاية قصتك (باللهجة الجزائرية)

♡ بارت 14 ♡

"لم تستطع البكاء ، لم تستطع ان تحزن كما يفعل الناس عادة .. ولهذا انهار جسدها بدلا من ذلك"

◇•◇•◇•◇•◇•◇•◇•◇•◇

****غدوة من ذاك****

[ نيرة ]

نضت الصباح .. رحت توضيت فالدوش لتم وسقسيت الفرملية تاع سجادة ، ورحت لبيتي صليت وبقيت نقرا القران من تيليفون تاعي ..

شحال من ساعة وانا هكاك ..
حتى لحقت الحداش .. حتى نشوف مارية داخلة عليا ورافدة ساشي صغير .. غير شفتها نضت عندها عنقتها وسلمت عليها ..

مارية : وش راكي ليوم ؟

نيرة : حمد لله .. كاشما قاتلك هدايات البارح ؟

مارية : ايه عيطت على لي درت الروطار .. والصباح قلتلها ني رايحة نخلص الماء والتريسينتي

نيرة : بصح بابا يكون فالدار ؟

مارية : لالا خلاص راح البارح فالليل ، مازادش الليلة تاع اليوم ..

نيرة : ايه .. وش كاين فالساشي ؟

مارية : البارح بابا شرا لانس وامينة شوكولا وكوكاو ، وانس حبيبي خلالك حقك وقالي ارسلي لنيرة ، مسكين حب يجي يشوفك بصح مكاش كيفاش ..

نيرة : ياا عمري على انوس الغالي .. ربي يخليه ..

قعدنا على السرير وبقيت ناكل ، وبدات تحكيلي على هدايات والمرض تاعها ، تخلعت !! يعني اكبر متغطرسة فالعالم ماهيش تقدر تنوض من الفراش ، اللهم لا شماتة ، بصح ربي هو الرزاق ، وقادر ينحي لاي واحد صحتو فاقل من ثانية .. وهي ما دارتش معانا قليل .. بينها بين مولاها ..
وزدت انا حكيتلها حكايتي من نهار دخلت فيه لدار احمد حتى البارح .. بقيت انا نحكي وهي تبكي مسكينة ، وتمسحلي على شعري .. حتى انا وبكيت معاها كلما نتفكر وش جوزت ..

مارية : ياا عمري نيرة ، سمحيلي بزاف ، مقدرتش نحميك كاخت كبيرة ، ما قدرتش نبعد عليك هاذ المعاناة كامل ..

نيرة : ونتي علاش ؟ باركاي ما تخرطي على راسي ، وخليني نقولك وش قررت .. بتت البارح كامل وانا نخمم ..

مارية : خيير ؟؟

نيرة : مارية ، الدار هاذيك مانيش رح نزيد نرجعلها ! ويونس منزيدش نرجع عندو ورح نشوف كيفاش نطلب الطلاق ..

خزرت فيا وعينيها وساعو ..

مارية : منك بصح نيرة ؟؟ وين حا تروحي يا طفلة ؟

نيرة : يا وسمك ، حايبتني نرجع عندو ؟ تحبي حتى يعيطولك ويقولولك نيرة ماتت ، والله مبقاش بزاف وتلقاوني ميتة على يدو .. عييت مارية والله عييت من معيشة الذل هاذيا ، علاش حنا ماناش كيما الناس ؟ ما عندناش الحق نعيشو ونقراو !!

مارية (تنهدت) : علابالي نيرة ، وعلاش انا كرهت الشي هذا ؟ مي وش تحبيني ندير !! يديا مكتفين !!