أنا نهاية قصتك (باللهجة الجزائرية)

♡ بارت 27 ♡

"ظننت انها مشاجرة بسيطة بيننا كالعادة .. لكنها كانت النهاية"

◇•◇•◇•◇•◇•◇•◇•◇

نضال : نيرة .. زينب عندها الحق .. انا جامي حبيتك ، لقيت طفلة معايا فالدار ، خليتك تتعلقي بيا وتحبيني باش نجوز الوقت برك من جهة ، ومن جهة غضتيني وقلت نطمعك ومن بعد نطيشك ، ودوك جات فرصة مليحة باسك مالقيتش كيفاش نبدالك الهدرة .. بلاما ننساو بلي نتي لي سرقتي دراهم بابا ، كامل فالدار تاكدنا .. انا امبوصيبل نحب وحدة كيما نتي ، مكاش كيفاش ! اذا نتي بهلولة ورحتي معايا وآمنتي بلي ممكن نتزوج وحدة كيفك مالا راكي تزيدي تاكديلي بلي نتي جايحة ونية .. انا نحب زينب وخلاص ! .. تقدري تخرجي ..

لوكان نجمع كامل الصدمات والألم لي عشتو في حياتي مايسواو والو قدام واش راني نحس دوكا .. شغل موس طعنتني فقلبي وقطعاتو ، شغل راني نعوم في دم معمر وجيعة وحسرة ..
بقيت نخزر فيه برك ، ماقدرتش اصلا نآمن ، قلت سور راهو يتمسخر بيا ، يلعب معايا ، ممكن كاميرا كاشي ؟
دورت راسي خزرت فسعيد ، لقيت راسو فالارض ويديه فجيوبو ومتكي على الباب .. وجهو مايعبرش على تمثيلية ولا تمسخير !

نيرة (خزرت فنضال) : نضال ؟ وش كاين ؟

نضال : الهدرة كامل لي قلتها تقوليلي واش كاين ؟ ماعندي ما نزيد فوق واش قتلك ..

حبط راسو وكمل يخدم .. وخلاني انا واقفة كي الشمعة ، الارض دارت بيا ، ماعرفتش واش ندير وواش نقول ، وش بيه ، واش كاين !
بداو عينيا يتعمرو بالدموع وبديت نرعش ..

نيرة (صوتي يرعش) : كشما صرا نضال ؟ كشما كذبو وقالولك عليا ؟ كشما درتلك ماشي بلعاني ؟ راني نهدر معاااك اخزر فياا ! تقولي هدرة هكدا وتسكت ؟ تقطعلي قلبي وتذلني وتكمل تخدم نورمال ؟ ما نعنيلك والو انا ؟ ما ضحكناش كيف كيف ؟ ما كليناش كيف كيف ؟ ما تمسخرناش كيف كيف ؟ (بديت نعيط) قووول ، اهدررر معايااا ، ولا زعما كي شفتني بلا يمات وبلا بابات تتمسخر بيا كيما حبيت ، عمبالك لقيتني فالزنقا ؟ انا تان عندي دارنا وعندي اختي وبابا مزالو عايش.....

غير لحقت لكلمة بابا الغصة والدموع خنقوني ، ماقدرتش نزيد نكمل ، طرطقت بالبكا وبقيت نشهق وانا مزيرة على يديا ، غاضتني عمري فوق ما تتصورو ، لعب بيا كيما حب وخلاني نحبو ونتعلق بيه ودوكا رايح يروح ويخليني ، وانا ماعنديش بابات يدافع عليا ولا يوقف معايا ويوريلو العين الحمرة .. هو اكثر واحد علابالو بابا كيفاش عامل مالا ما عندها حتى معنى نحمي كرامتي ب بابا ، باسك وجودو وعدمو كيف كيف ..

طلع راسو خزر فيا ، خزرت فيه مليييح ، كملت حكيت واش كان في قلبي غير بعينيا ، نبصم بالعشرة بلي لحقو كلش ، وفهم كلش من خزراتي برك .. خزرت فيه اخر خزرة ورفدت روحي وخرجت من لتم ، جزت على سعيد لي ما طلعش عينيه وما خزرش فيا .. ورجعت لدارنا ، مكسورة ، محقورة ، مهمومة ، مذلولة ، قلبي ينزف ويبكي ، يحكي حكايات عشتها مكاش لازم نعيشها فهاذ السن ، يحكي على جروحي لي مزال مابراتش وعمرها ولا رايحة تبرا ، يحكي على الملح لي زاد تحط فوق هاذ الجروح وخلاها تفيض بكل شعور ماشي مليح ، وتخليني نتحرق من الداخل ونعيش واش ما نتمناهش لعدويا ..