أنا نهاية قصتك (باللهجة الجزائرية)

♡ بارت 20 ♡

"انت هبة الله لقلبي الحزين"

◇•◇•◇•◇•◇•◇•◇•◇

[ نيرة ]

دخلت للتوالات (حشاكم) وفرغت وش من قبيل وانا حاكمة ، بكيت حتى شبعت ، وانا حاسة روحي ضعيفة قدامو ، علاش ماقدرتش نكمل نتجاهلو ، علاش نضت لعندو ومثلت القوة ومن بعد بينت بلي صح ضعيفة وبكيت قدامو ، علاش ما نقدرش نكمل فتمثيلية القوة لي نخلقها !! لهاذ الدرجة انا ضعيفة ؟ وجاست صغير يبكيني ؟ علاش حتى سلكتني شيماء منو باش طلقني !! عييت من كل حاجة !! حايبة نريح !!

غسلت وجهي ، ورجعت لعند شيماء نخمم فواش رايحة نقول لطاطا صليحة ، والمشكل لي حطني فيه نضال ..
دخلت للشمبرة لقيت شيماء تستنا فيا ..

شيماء (جات رح تنوض من بلاصتها) : وش راكي ؟

جريت لعندها باش تقعد هي فبلاصتها ..

نيرة : راني مليحة ..

شيماء : وش كاين ؟ وش بيه نضال ؟

نيرة : ماتقلقيش روحك ، قصة طويلة ..

شيماء : بالعقل برك وكلش يتصلح بيناتكم ، ياخي المشاكل فليكوبل دايمن كاينين ، ما تقلقيش روحك بزاف

تشوكيت من هدرتها ، وش بيها هاذي ، شكون قالها راني مع نضال ؟؟

نيرة : وشمن كوبل ؟

شيماء (مستغربة) : اا ، نتي ونضال !

نيرة (وسعت عينيا) : ربي يهديك يا شيماء ، ماكاين لا كوبل لا دلاع !!

شيماء : كيفاش هذا ؟؟ يخزر فيك هكاك وتخزري فيه هكاك وماكمش كيف كيف ؟

نيرة : كاش خزرت فيه يا ربي ؟ وش بيك ؟

شيماء : حايبة تقوليلي بلي ما تحبيهش ؟

ياااا وش راها تقووول !! وش الهبال هذا ؟؟ انا نحب نضال ؟ انا نحبو ؟ انا .. انا .. لالاااا لالا ما نحبوش ، علاش نحبو اصلا !!

نيرة : انعلي الشيطان ، وشنو نحبو هاذي تاني ؟ جابلي ربي راكي تشوفي الفيلمات تاع الترك بزاف ، شفتيني كنت نحاوز فيه لالا ؟ علاش كشما قلت باش نبان هكدا ؟

شيماء : ايه جوستومون ، كنتي تحاوزي فيه ، بصح عينيك كانو يهدرو حاجة وحدخرا ..

نيرة : شيماء ؟ وش بيك يا طفلة ؟

شيماء (خزرت للباب) : هاوليك نضال رجع

درت نجري ورايا وقلبي خبط والسخانة طلعتلي كيما من قبيل كي شفتو جا .. مي دوك ماكاين حتى واحد فالباب !! خزرت فشيماء لقيتها تتبسم

شيماء : شفتي عينيك كاش لمعو نيرة ؟ تتمسخري بيا ما تحبيهش ! قلبك قريب يخرج من بلاصتو

جيت رايحة نهدر ماحبتش الهدرة تخرج من فمي ، ايا دوكا شيماء حركتلي المشاعر تاعي ومانيش رايحة نقدر نخمم فحاجة وحدخرا ، ماكفانيش هم المشكل لي راني فيه وزيد دوك الجياحة تاع نحبو تان .. يااا ربي وصبرني برك ..