أنا نهاية قصتك (باللهجة الجزائرية)

♡ بارت 7 ♡

"من اجبركِ على ان تكوني قاسية في حديثك ، وعيناكِ تشبهان الفردوس ؟"

◇•◇•◇•◇•◇•◇•◇•◇•◇

[ نيرة ]

فطنت الصباح كلش فيا يسطر .. تفكرت وش صرا الليلة لي جازت والرعب لي عشتو .. عذاب هدايات ومكانش هكدا !

دخلت للدوش غسلت روحي وبقيت نمسح لحمي ونبكي ، متقززة من روحي ، قريب نحيت الجلد كامل .. بكيت حتى شبعت ، كي عادتي يعني ، ولبست قشي وخرجت .. لقيتو قاعد فالسرير يتبسم معايا ، حيوااان .. وزدت عفتو كثر ما راني عايفاتو كي عرفت بلي يشرب !! لالا ولاعبها مسلم زعما ، ياخي الرجال يعرفو الدين غير فتعدد الزوجات ..

جزت عليه بلاما نقيمو .. ورحت فرشت سجادتي وصليت .. غير كملت لقيتو ديجا كمل الدوش وكان قاعد يستنا فيا ..

المهم ..
ستقهوينا وفرزت انا الطابلة .. وبديت الميناج كيما البارح .. ظهري تقسم وما رجعتش نحس بيه اطلاقا ..

زدت وراها عاونت فالغذا وتغذينا وحدنا بلا الرجال .. بعد المواعن ، طلعت لبيتي وتكسلت ، مي السطر محبش يحبس ، نضت شربت الدوا وستنيت نص ساعة مي والو ، كان غير يزيد .. يا ربي وش حا ندير دوكا انا !! ليمن نشكي انا دوك !!

فرشت السجادة وقعدت عليها .. وبديت نقرا القران وانا نسيي ننسا الوجع لي كنت نحس بيه .. وكي العادة هاذ الطريقة تنفعني ، باسك من صغري نلهي روحي بالقران كي تكون كاش حاجة توجع فيا ..

.....

جازو ثلاث سوايع ..
وانا فهاذيك البوزيسيون .. نضت ورفدت كلش وانا مزالني نتوجع ، تكسلت على السرير وانا نتلوا وحدي ، مكاش شكون يعاونني ..

حتى يتفتح الباب كي العسكر ..
لقيتها رحمة ، باينة من وجهها ماهيش ناوية على خير ..

رحمة : واش نتيا !! عمبالك دار باباك لهنا ودايرلك خديمات !! ملييييحة !! نتي راقدة وحنا نخدمو الشغل .. هايا نوضي ازربي

نيرة (بديت نعرق بالوجع) : تت..تعيشي .. مانيش قا..قادرة نوض ..

رحمة : ايااا باركااي من لعب الذراري هذايا دوكاا ، نوضي قلتلك تعاونينا

نيرة (بقيت نعصر على روحي باش ما نعيطش) : تت..تت..تعيشي ، والله ماني قادرة ن..ن..نوض

تنهدت بالفور وقدمت لعندي جبدتني من ذراعي ، وانا من قوة الجبدة طلقت العيطة لي راني من الصباح شايدتها ..

رحمة (تعيط) : بلعيييي !! يا كلبة وش بيييك !! هبلتي تعيطي هكداااا !!

نيرة (طحت فالارض) : والله ماني ناجمة نوض .. تعيشي ، والله ما قدرت .. (عاودت عيطت)

مع العيطة تاعي ، ويجيني كف مخي تزلزل معاه .. ونحس بيها جبدتني من ذراعي وبدات تكركر فيا للتحت وانا نعيط لربي لي خلقني .. مفهمتش السطر هذاك منين جاي اصلا ، لا من ظهري لا من وسطي ، لي كنت عارفاتو اني كنت نتقطع بالوجع ..