أنا نهاية قصتك (باللهجة الجزائرية)

♡ بارت 2 ♡

[البطل]

انا اسمي نضال ، عمري 24 سنة .. طويل وسمر وعينيا نوازات ، من صغري نحب السبور على هذا الكور تاعي خادمو بيان قاع .. قريت télécommunication في معهد ، ودوك راني نخدم فشركة اتصالات ، عندي عامين وانا نخدم فيها باسك داخل للمسيد صغير بعام .. عندي صاحبي لي كي خويا قريت معاه فلافاك ورانا نخدمو كيف كيف وسمو سعيد ، وصاحبي دوزيام وسمو منير كبير عليا بعام تعرفت عليه فالليسي ودوك راهو يقرا اختصاص تاع جراح قلب فالسبيطار ..

نحكيلكم على فاميلتي .. بابا مختار ، عسكري متقاعد ، يعني فالدار من صغرنا عايشين شغل كازيرنة (قاعدة عسكرية) ، عندنا قوانين بزااف لازم نتبعوهم ، وكلينا الضرب تاع التعذيب كي كنا صغار ، على هذا خرجنا قاسحين وقلبنا جامد .. سورتو انا ، جاي ما نحلب حتى واحد ، ونمشي سيريو وما نضحكش بزاف .. مع الحكاية تزيدو تفهمو شخصيتي ..
يما صليحة ، ربة بيت كيما نقولو ، عاشت الجحيم هي تان مع القواعد تاع بابا ، بصح قاع هكاك ويحبو بعضاهم بزااف ..
خويا الكبير بهاء الدين ، عندو 26 سنة ، يشبهلي ، لي يشوفو يعرفو بلي خويا بصح عينيه خضورا .. قرا هندسة معمارية ، ودوك راهو يخدم فشركة كبيرة تاع ديكور .. شخصيتو تان كيما انا ، مي تقدرو تقولو هو خير مني ..
ختي الصغيرة رنا ، عندها 20 سنة ، خمرية وعينيها نوازات وشعرها ماغون ، تشبه ليما فوجهها .. مزالها تقرا فلافاك chirurgie dentaire ، هاذ العام كملت عامها الزاوج وداو لفاكونص .. حنينة بزاف وحنا نحبوها ومفشينها .. التربية القاسية تاع بابا خلاتها تكون عاقلة ومكمشة بزاف من صغرها ومنطوية على هذا معندهاش صحابات قاع ..

هاذي نبذة عليا وعلى فاميلتي ، مزال تزيدو تكتشفو حياتنا مع الحكاية ..

......

Wattpad: dy_ja_lu
صليت الفجر ولبست قشي باسك عندنا ممنوع تدور بالبيجاما فالدار ماعدا ليما ورنا .. حبطت للتحت على الثمنية ، وقت القهوة .. لقيت الطابلة كي العادة ، معمرة ، هاذي قهوة ، هاذا خبز ، هذا معجون ، هاذا كرواسون ..

نضال (هدرت وانا نقعد في بلاصتي) : صباح الخير

يما وبابا : صباح الخير

نضال : وين راهم لخرين ؟

يما : بهاء مزال ما يحبط ورنا راحت تزيدلنا السكر باسك كمل

نضال : خرجت ؟

يما : ايه ، محبيتش نوضكم نتوما

بابا : مهيش خدمة هاذيا .. روح الحقها نضال

نضال : اوك بابا

نضت من بلاصتي بلاما نسيي نناقشو اصلا وخرجت نشوف ختي .. بروحها رح تكون عند عمي صالح لي قدامنا برك ..

دخلت لقيتها تجيب السكر ، رحت ليها يديا فجيوبي ..

نضال : ختيتو

رنا قفزت من بلاصتها كي البهلولة تقول شي شافت جن ..

نضال : شفتي جن ؟