أنا نهاية قصتك (باللهجة الجزائرية)

♡ بارت 21 ♡

"الارتباك الذي اعيشه بكل مرة اراك بها بشكل لا افهمه ، يسعدني .."

◇•◇•◇•◇•◇•◇•◇•◇•◇

انا هكاك فتخمامي لي ماحبش يحبس كلما نخزر فعينيه ، حتى سمعت وش ماكنتش نستنا ..!!

نضال : نيرة .. تعيشي ما قدرتش نتحكم فروحي كي شفتك مع الياس ، حسي بيا .. نحبك نيرة ..

طلعت راسي خزرت فيه وعينيا وساعو قريب يخرجو من بلاصتهم ، وبدا قلبي يخبط يخبط ويزيد يخبط حسيتو رايح يخرج من صدري ، وطلعتلي السخااانة لراسي ووجهي حمااار وخضاار وصفااار وتلون بقاع الالوان ، ماعرفتش وش ندير ولا وش نقول ، بقيت فاتحة فمي نسيي ننطق مي والو ، كلمة ماحبت تخرج ! اخر حاجة كنت نستناه يقولها ! حاسة بكمية احراج وغرابة سيطرت على الجو بيناتنا .. هو بقا كالم ويخزر فيا برك !! وانا ماعرفت روحي لا راني فرحانة ولا راني خايفة ولا متوترة ، الملايير تاع المشاعر لي كنت نحس بيها فذيك الدقيقة ..

نضال : مانيش نستنا فيك تجاوبيني ولا تقوليلي حتى حاجة .. ومانيش رايح نلعب ولا نتمسخر ، اذا نعنيلك غير شوية وعندي بلاصة يا لوكان صغيرة فقلبك رايح نهدر مع يما وبابا ونخطبوك من باباك !!

هااااا ؟!!!! وش رااني نسمع !! نكذب وذنيا دوكا ولا وشنو ؟؟ وش نهار الصدمات هذا ! ماكفاش اعترفلي وزيد يقولي نخطبك !!

نيرة (بقيت نهدر بالعقل من الحشمة) : نضال .. انا .. انا قريب نرجع مطلقة .. ونتا خاطب !

حسيتو حس بيا بلي مانيش رافضاتو ، تنهد وقربلي وقعد على حافة السرير ، وبقا يخزر فيا بوحد الخزرات ذوبوني ! ياا يماا عينيه يقطرو بكل المشاعر اللي حركتلي قلبي ودغدغتني فكرشي ..

نضال : والمطلقة نرموها ؟ المطلقة مرا ، كيفها كيما السيليباتير ، العكس هي نورمالمون تكون قدوة لغيرها ، مرا حبت تخلص روحها من الذل والحقرة تاع راجلها ، ما سكتتش للاهانة وقررت تعيش حياتها كيما تحبها هي !! نتيا بالنسبة ليا اكثر طفلة قوية شفتها فحياتي ! كل حاجة فيك تعجبني ، عقالتك ، رزناتك ، ضحكتك ، البراءة لي فيك ، القوة تاعك لي تحديتي بيها بزااف ناس ، باباك ومرتو ، يونس وعايلتو ، والمجتمع قااع كيما راه ! نيرة ، فعينيا نتيا كل حاجة ! وحايب نكمل معاك حياتي ! باسك عارف مانلقاش وحدة كيفك لي تصبر وقلبها كبير وقاسح !

هو يهدر ، كلمة ورا كلمة ، وانا قلبي يذوب ، اول مرة واحد يهدر معايا هكدا ، اول مرة واحد يحسسني بلي انا انسانة مليحة ، بعد 18 سنة من كل انواع المعاناة ، جا نضال وبدلي كل حاجة فحياتي وعرفني على شعور جديد عمري ولا جربتو ولا تخيلت نجربو ، الحب ، خلاني نعرف بلي الحب ينبع من المواقف لي يقدمهملك الطرف لاخر ، بلي الحب مايعنيش حياة حلوة وتاع افلام وحتى واحد من المتحابين مايغلط ، العكس ، يغلط بصح مايقدرش يكمل يعيش بلا النص لاخر تاعو ويجي ويعترف بالخطا تاعو ويصلحو .. نضال دخل حياتي وعصف بيها رياح الحب والامل .. دوك باش عرفت ولا خليني نقول تاكدت بلي ايه صح ، انا نحب نضال ..