أنا نهاية قصتك (باللهجة الجزائرية)

♡ بارت 17 ♡

****غدوة من ذاك****

[ نيرة ]

نضنا الصباح كامل بكري مع 6 باسك قالو بلي البحر يكون فارغ وشباب ، صلينا ستقهوينا ولبسنا ، وانا وطاطا ورنا رحنا للكوزينة نعمرو السلات بالماكلة لي وجدناها فالليل ، وخرجو نضال وبهاء كلش للطونوبيل ، زادو الباراصول والكراسا والطابلة .. وديمارينا للابلاج .. كنت انا قدام طاطا ورنا من اللور ونضال قدام بهاء لي كان يسوق ..

رنا : شحااال راني متحمسة ! بهاء راك تسالني تريكو لي كنت حايب تشريه

بهاء : قولي والله غير رح تجيبيهولي !

رنا : والله !!

بهاء : هامليك الخيات تاع الصح ..

ضحكنا كامل عليه وكملنا نقصرو ..

ط.صليحة : غير نلحقو لازم نيرة تشري مايو تاع حجاب ..

نضال : ايه صح ، غير نحلقو تروح معاك ، وحنا نسقمو قعدتنا فالرمل ..

ط.صليحة : ايه ..

.....

مسافة الطريق وحنا لحقنا .. حبطنا عند لابلاج ، كانت فارغة ، فيها زوج ولا ثلاثة عايلات برك ، كانت قريب 9 تاع الصباح .. بقيت غير نخزر فالبحر ونتبسم من الوذن للوذن وانا الفرحة ماشي واسعتني ، اول مرة نكون بهاذ القرب للشط ، بقا الهوا يضربني وانا غير نخزر ومتبسمة وقلبي يخبط بالفرحة ..

نضال (همسلي) : عجبك ؟

نيرة (خزرت فيه وتبسمت) : هااايل !!

ضحك بالعقل وراح يعاون بهاء باش يخرجو الصوالح من الطونوبيل ..

بهاء : هايا روحو نتوما ..

ط.صليحة : ايه هايا نيرة ..

رحنا انا وطاطا باش نشريو ، وهوما راحو للرمل ، حطو كلش وسقمو الحالة ، ونحاو قشهم ، نضال وبهاء بقاو غير بليشورت تاع البحر ورنا بقات غير بالمايو تاع الحجاب وبقاو قاعدين يتصورو ويتمهبلو بيدما نرجعو .. الحانوت كان برك قدام الشط مالا كنت نخزر فيهم من البعيد ونضحك ..

......

شوية ورجعنا .. ورحت انا للطونوبيل بدلت ورجعت عندهم .. غير لحقت عيني طاحت ديراكت على نضال ، ياااا بابااا رح نطييح ، وااش هاذ الكور ! تقول شي منحوت ! شديت روحي بالسيف لا نفتح فمي ونبقا باهتة فيه ، بقيت نخزر فيه بطرف عين برك .. بهاء تان الكور تاعو شباب ومخدوم ، مالا علاش عيني راحت لنضال ؟؟ يااا ربي استغفر الله راني بديت ننحرف ! غض البصر يا نييرة !

رنا : هايا جماعة ، هايا ندخلو ..

ط.صليحة : اصبرو دقيقة ..

نضال : وشنو ؟

ط.صليحة : خالتك حورية قاتلك حايبة يجيو معانا

بهاء : علابالها ؟