أنا نهاية قصتك (باللهجة الجزائرية)

♡ بارت 42 والاخير ♡

"مهما حدث ومهما جرى سأظل انا نهاية قصتك"

◇•◇•◇•◇•◇•◇•◇•◇

****بعد 4 شهور****

[ نيرة ]

جازو 4 اشهر كاملة ، الوقت هذا كامل جوزتو فالدار برك ، نضال كيف كيف كان لازم عليه يريح مليح بعد العملية ، كان يروح عند صاحبو الطبيب منير باش يفحصو ويشوفو ، وكان يشرب الدوا تاعو بيان سور ..
علاقتنا قعدت كيما هي ولا خليني نقول زادت قوات ، يعني مرات نضاربو ونعاودو نرجعو ..

مارية وسعيد راهم عايشين حياتهم لاباس بيهم ، يماه وخياتو بزاف ملاح معاها ويحبوها كيما وحدة منهم ، كل مرة تجي عندنا تقولي يا نيرة ربي عوضني على كل الهموم لي عشتهم وبعثلي عايلة كي السكر .. ياخي يقولك لي يصبر ينال ودايمن بعد العسر يجي اليسر ..

فهاذ الفترة تان ، بهاء قرر غير يتزوج يفتح atelier d'architecture بيسك هو قرا هندسة معمارية ، ومام خطيبتو اصالة رايحة تولي تخدم معاه .. وانا قررت فسبتمبر نبدا القراية وخيرت هندسة معمارية كيما بهاء باسك قالي مليحة بزاف ووعدني ندخل نخدم معاه فالاتوليي هذا كي يفتحو ان شاء الله وانا نكمل قرايتي ..

.........

نضت الصباح كي عادتي ، صليت ولبست وحبطت التحت ، ستقهوينا كامل كيف كيف ، رنا وبهاء كي العادة خرجو ، عمي مختار كيف كيف ..
ونضال راح حكم بلاصتو قدام التلفيزيون يشوف الاخبار ، مرات نحسو شيخ كبير كي راهو قاعد فالدار ..

وانا كي عادتي ، رحت خملت وسيقت وعاونت طاطا فالغذا .. حتى نسمعو لاصونات تاع الباب ، رحت نجري نفتح ، غير شفت شكون قلبي خبط ، ماتوقعتش نشوفها قااع ..

نيرة : شيماء !!

ايه شيماء مرت يونس لي راحت لتونس وهربت منو بعدما عرفت روحها اونسانت وخافت على وليدها منو ومازدتش سمعت عليها والو من هذاك النهار ..

شيماء : وش راكي نيرة ؟؟

نيرة (دنيت نسلم عليها) : الحمد لله عاش من شافك يا اختي

شيماء : يسلمك

خزرت لذراعتيها عينيا تعمرو بالدموع ، كانت رافدة بيبي صغير في عمرو يا ربي شهر ..

نيرة : وليدك ؟

شيماء (تبسمت) : ايه ، وسمو محمد نور

نيرة : يااا عمري .. (قربتلو) محمد نور وش راك يا البوقوص ؟

ضحكت انا وياها ودخلنا للصالون ، خزر فيها نضال تخلع هو تان ، ناض وقف ..

نضال : يااه شيماء !

شيماء : وش راك نضال خو ؟

نضال : حمد لله اختي ، ونتي وش راكي ؟ (خزر فالبيبي) وليدك ؟

شيماء (ضحكت) : الحمد لله لاباس ، وايه وليدي

نيرة : نضاال شفتو شحال شباب وكيوت ماشاء الله ، وسمو محمد نور