أنا نهاية قصتك (باللهجة الجزائرية)

♡ بارت 4 ♡

نيرة : احكيلي وش صرا ..

[مارية]

بعدما حبطت من عند نيرة ، رحت لبيتنا بكيت حتى شبعت وفرغت كامل وش كان فقلبي وسبيت رولينا مليح مليح ودعيت عليها ..

بعد قريب ربعين دقيقة ..
سمعت هدايات تعيط وحدها كي البهلولة ، رحت لعندها لقيتها كسرت المواعن كامل لي كانو فالكوزينة ، ما فهمتش وش بيهاا !! كل مرة تحكمها كريز هكدا !!

بقيت هكاك واقفة عند الباب نخزرلها وانا قلبي يخبط وجسمي بكلو يرعش ..
حتى شافتني وجات ليا رافدة فيدها الزجاج وضربتني لذراعي ، تالمون السطر محسيتش بالالم مع الاول ، بقيت غير نخزر فالدم يسيل من يدي كيما الروبيني ، محبش يحبس ..
وهي بقات واقفة تخزر فيا وشعرها منكوش فالسما ويديها معمرين من الدم تاعي ..

رفدت روحها وطلعت لبيتها ، وانا بقيت واقفة نخزر فحوايجي والارض لي تعمرو دمومات .. غير بديت نحس بالسطر ، فقت على روحي ونضت نجري فالكوزينة نحوس على حاجة نغطي بيها الجرح .. رفدت قماشة كانت لتم وزيرت بيها على ذراعي ، وبديت نتلوا بالسطر لي كنت نحس بيه ونبكي .. كي شفت بلي الدم محبش يحبس عرفت بلي جرح عميق ، رحت نجري لدار وحدة جارتنا هي فرملية ..

غير دخلت عندها تخلعت كي شافتني هكاك معمرة دم .. جات هي تان تجري وبدات تخيطلي الجرح وغطاتهولي وعقماتو ، وانا دموعي محبوش يحبسو .. يعني وش درت باش ديرلي هكدا الشيطان هاذيك !!

عنقتني جارتنا وبقات تسكت فيا وتكالميني .. وجابلتي الماكلة ، يااا يما شحال عندي ما كليتش كيما الناس .. فالدار ناكلو يا الخبز حافي ويابس مع كاس ماء ، ولا كي نكونو نطيبو انا ونيرة نسرقو شوية ناكلوه .. حتى الماكلة من برا وما عندناش باش نشريو ..

جوزت الوقت معاها ، ضحكت شوية ونحيت على خاطري ، حتى سقساتني على نيرة وش راها .. يااا يماا نسيت ختي مسكينة مرمية فالسطح .. كانو جازو قريب ربع سوايع ..

سلمت عليها وخرجت ..
رجعت للدار ، لقيت الدار غارقة فالدم ، ولالة مزالها فبيتها راقدة .. كلبة !!

طلعت نجري للسطح نشوف نيرة ، حتى نلقاها متغاشية ، رحت نجري سييت نوضها وبديت نرمي فوقها الماء ، والو ، محبتش تفطن ..

بديت نخاف ونتبانيكا ، خفت الا تكون صراتلها كاش حاجة فغيابي .. حبطت نجري قريب نطيح فالدرج وانا نبكي ونعيط .. حتى شفت باب الدار تفتحت ، ودخل بابا مع انس وامينة باسك كانو بايتين عند خالتهم ، وبابا كي العادة يخدم خارج الولاية ، ويرجع فلويكاند برك ..

انس كي شافني هكاك وشاف الدم فالارض بدا وجهو يكحال وعرف بلي خدايم يماه ، جا يجري لعندي وحكمني من يديا

انس : وو..وش صرا مارية ؟؟

مارية (بعدتو عليا ورحت لبابا) : بابا ، نيرة محبتش تنوض