أنا نهاية قصتك (باللهجة الجزائرية)

♡ بارت 12 ♡

[ نضال ]

رجعت لبيتي ونيرة في بالي .. مفهمتش وعلاش راني نخمم فيها دوكا !! راني مقنوط وكاره وهي تزيد عليا .. كل دقيقة تجيني بين عينيا ، ودوك راها لهنا فالدار قدامي .. عييت !

كنت قاعد فالبيت ، حتى تعيطلي يما باش نتعشا .. حبطت ، لقيت عمي لتم .. سلمت عليهم وقعدت قدام رنا لي كانت قدام نيرة ..

خزرت فيها ، لقيتها تاكل بالعقل وتتبسم لرنا مرة على مرة .. من خزرة عينيها تبان عيانة بزاف ، ورافدة هم كبير .. معلاباليش علاش راني نحس في روحي حاس بيها ، شغل راني نمر بفترة تاع تعب وارهاق ، وماعنديش ليمن نفضفض ولا نحكي كيما راني حاب باسك نعرف بلي واحد ما يفهمني ..

ط.زهرة : هاا يا طفلة .. وش قريتي فلافاك ؟

خزرت فيها وعقدت حواجبي ، كانت تسقسي فيها متبسمة ابتسامة تاع سخرية وعينيها يقطرو بالسم ..

نيرة (متوترة) : ما .. ما قريتش ..

تم تم طاطا زهرة ضحكت وحدها ، يعني حنا كامل بقينا نخزرو فيها وهي تضحك ، وش بيها هاذي ! تربح العيب مع الطفلة بلا سبة !

يما : ماشي دايمن لي يكون قاري ، يكون عندو نيفو

قالتها يما وتبسمت .. يااا بابااا ، المعاني تاع يما واعرين ، والله غير فنانة فالقصف .. خزرنا فيها كامل وتبسمنا .. ما عدا طاطا زهرة لي بقات تخزر فيما وتمص شفايفها .. وزينب وكرم كيف كيف بيان سور حا يجو مع يماهم ..

ع.فضيل (حب يبدل الجو) : اييه ، مالا قلتولي مختار راح للعاصمة ..

بهاء : ايه عندو لتم شغالات يقضيهم وغدوة يرجع ..

تبسم عمي معانا وكملنا ناكلو ، وانا نسيي نرمي خزرات لنيرة باش نشوف كيفاش راها بعد وش قالت طاطا زهرة .. تبسيمتها راحت وبقات غير تخلط فالماكلة وتلعبها تاكل .. ياخي هي حبت تتزوج وتحبس قرايتها ! علاش تقلقت ؟!

......

راحت نيرة بعدما وصلها بهاء .. وانا كنت فبيتي نكتب طلب الاستقالة تاعي باش ينحولي البوست تاع المدير ونبقا فالبوست تاعي برك .. خصنيش تصداع الراس ..

حتى دخلت يما ..

يما : السلام عليكم

نضال : اهلا يما ..

جازت على البيرو تاعي وخزرت فالورقة وتنهدت .. وراحت قعدت على السرير ..

يما : خلاص قررت ؟

نضال : ايه .. يما تعيشي مانيش حا نبدل رايي ..

يما : بصح علاش ؟

نضال : قتلك ياخي .. مانيش حايب تصداع الراس والمسؤولية ..

يما : طول عمرك كنت قد المسؤولية ، كنت نخرج نخليك مع رنا ما نخافش عليها معاك .. نتا اكثر واحد منضبط ومنظم فالدار .. تعيش وليدي اقبل بالبوست ، حا يزيدك هيبة كثر ، وتكون تجربة جديدة ليك باش تزيد من المهارة تاعك فالدومان هذا .. تعيش نضال