أنا نهاية قصتك (باللهجة الجزائرية)

♡ بارت 3 ♡

[نيرة]

فتحت عينيا ..
ماكنت شافية على حتى حاجة من غير الظلام .. درت براسي لقيت روحي فشمبرة تاع سبيطار .. وش راني ندير لهنا ؟! بديت نعقل فروحي ، حتى شفيت وش صرا وبلي الدراهم تسرقو ، اليوم اخرتي مع الشيطان !!

طبيبة : ااه فطنتي !!

فطنت من تخمامي على صوت الطبيبة ، درت ليها لقيتها دارتلي سيروم فيدي ..

طبيبة : ما تقلقيش روحك ، السكر حبطلك برك .. مي لازملك تاكلي باش تبراي ، راكي صفرة كامل .. حمد لله لي لقاوك ناس الخير وجابوك لهنا

خرجت الطبيبة وانا بقيت نخزر فيدي لي فيها السيروم ، هااهااهاا قاتلي لازم تاكلي .. الهدرة هاذيا قوليها لهدايات يا دكتورة ماشي ليا .. لوكان ماشي ناكلو ذيك اللقيمة كي يكون بابا فالدار والله ما نشوفوها قاع ..

انا هكاك حتى يدخلو عليا طفل وطفلة .. نظن هاذو هوما لي جابوني .. مقدرتش نشد روحي وطرطقت بالبكا كي شفتهم .. يعني البراني و يحن فيك .. وهدايات لوكان جا قلبها من الحجر لوكان راهو تحرك ، والله ما عندها قلب من الاساس !!

غير خرجت من السبيطار ، قعدت نخزر للسما ، نتمنى ربي يديلي روحي ونموت ونتهنا من وش راني عايشة خير .. معلاباليش وش رح ندير دوك !! اذا رجعت للدار معنتها خلاص ، هدايات رايحة يا تقتلني يا تقتلني اليوم !! مي وين عندي نروح !! عمتي الوحيدة لي كانت تحن فيا كي كنت صغيرة وتشريلي تزوجت و راحت تعيش فالماريكان ، ونشوفها مرة كل عامين ولا كثر .. والباقي تاع الفاميلية تاع بابا تبرات منا وماشي معتابرينا منهم اصلا ..

رجعت للدار نمشي ، باسك معنديش مامبا باش نركب البوس .. ضربت قريب ساعة وربع وانا نمشي ، رجليا ما رجعتش نحس بيهم ..

لحقت للدار وبقيت واقفة عند الباب نخزر فيه .. في قاع الاحوال انا داخلة داخلة ، وداية المخبط داية !!

فتحت الباب ودخلت .. لقيت مارية تسيق ..

نيرة (بالعقل) : خلات عليا

مارية (خايفة) : وعلاش ؟ (دارت يدها على فمها) وين راهو القضيان ؟

نيرة : واحد سرقلي الدراهم

مارية حسيت الهدرة تلفتلها ، والدم نشف فيها .. هي تان علابالها وش راهو يستنا فيا !!
هي ما جات رح تهدر ، حتى نسمعو هدايات تهدر وهي واقفة ورايا

هدايات : القضيان وينو ؟

نيرة (درت لعندها وبلعت ريقي) : وو..وو..واحد سر..سرقلي الدر..الدرا..الدرااهم

خزرت فيا وطلعت حواجبها ودارت يديها على وسطها ..

هدايات : نعطيك الدراهم باش تشري تروحي تصرفيهم وتجي تحكيلي الخرطي تاعك ؟

نيرة (قلبي بدا يخبط) : و..ووالله .. والله ماني نكذب !!

هدايات (نسفت بالقاوي) : تبعيني