· · • • • ✤ • • • · ·
𝗖𝗛𝗘𝗙 𝗛𝗘𝗔𝗥𝗧 𝗕. 𝗥𝗢𝗞𝗘𝗡
Iniwan mo na nga ako
Luhaan at nagdurugo
Balat - sibuyas kong puso
Tinadtad mo sobrang pino
Ngayon aking iluluto
Putaheng paborito mo
Karne akin nang hiniwa
Kasabay ng mga luha
Hinugasan ang gulay
Kamay ko'y wala nang buhay
Ginayat na isa isa
Pantay - pantay, walang sobra
Binuksan ko na ang kalan
Kawali ay isinalang
Pinainit nang bahagya
Naglagay na nang mantika
Inilagay ang sibuyas
Bawang, luya at kamatis
Ginisa hanggang maluto
Bakit mo ako niloko
Sinunod ko na ang karne
Na prinito nang kaunti
Isinunod ko ang gulay
Buhay ko'y wala ng kulay
Binuhos ko na ang sarsa
Nasaan ka na nga kaya
Ikaw ba ay masaya na
Ako narito nagluluksa
Hinalo ko nang bahagya
Hinintay na kumulo siya
Tinakpan upang madali
Tayo bat nga ba kay dali
Habang hinihintay ko na
Kumulo ang kaldereta
Aking na ngang inalala
Nakaraang lumipas na
Muli bat ako naloko
Lugaw naging champorado
Dati nilaga ang gusto
Bakit ngayon na ay prito
Ilang saglit ang nagdaan
Kumulo ang nakasalang
Akin na itong tinikman
Bakit hindi malasahan
Pinatay ko na ang kalan
Nagsalin sa lalagyan
Kahit hindi malasahan
Sila'y aking hinainan
Bakas sa kanilang mukha
Masarap ang caldereta
Muling nagtungo sa kusina
Tinikman ang caldereta
'Di malasahan talaga
Sa' king panlasa'y nawala
Ang lasa ng caldereta
Na sa'kiy nagbigay saya
Ngayon aking tatanggalin
Caldereta sa listahan
Akin na ding lilimutin
Kung pano ito lutuuin
Upang hindi maalala
Ang panahong lumipas na
Ang dating tayong dalawa
Ngayon susunugin ko na.
· · • • • ✤ • • • · ·
BINABASA MO ANG
Tagalog Poems Compilation
PuisiHalina't buksan ang aking aklat na naglalaman ng iba't ibang uri ng tula. Ang iba dito ay tumutukoy sa iyong sarili, sa lipunan, sa kaisipan at buhay na maaaring magbukas ng iyong kaisipan at magpalawak ang iyong pananaw tungkol sa uri at kalagayan...
