السلام عليكم
13- الفحش من القول
وهو الكلام البذيء الذي يستقبح ذكره بين الناس لأنه ينفر ويزيل المودة بين الاخرين
القول البذيء
حتى لو شقا حتى لو ميانة
الإنسان كلش هيبة ومكرم عند الله جل وعلا ما اقبل عليك الكلام البذيء انو تتلفظ الألفاظ القبيحة
شوفوا القران الكريم
ما يگول عن الفضلات مثل ما نگول احنه
يسميهة غائط
شوفوا المقاربة بين الزوج والزوجة ما يعبر عنها صريح ولا بلفظ واحد حتى
فأذا لامستم النساء
قاربتم
وغيره وغيره
كل ألفاظ القران راقية
هنا رب الجلالة يريد يعلمنا
انو ماارضالكم تتلفظون بالألفاظ الي يستقبح ذكرهة
بينما احنه تجين للبنات كل كلمة تشمئز منهة النفس يتلفظوهة بينهم
الفشار والسب
وين الي تلگينه وقور حتى بكلامه ويه صديقه
كل الكلام الراقي والحلو
شبيهة يعني أن اكون راقية بكلامي؟!
14- الغدر والخيانة حتى مع غير المسلمين في أي حال من الاحوال لا يجوز يحرم
حتى الي مو مسلم مايسمحلنه نغشه ونغدر بيه
تجين تلگينه يبوگ بأموال الدائرة الحكومية لو تبوگ من الي تشتغل عدهة تگليلهة ليش
تگلچ لأن هي مو خوش وحدة وظالمتني
لأن الحكومة حرامية
حتى لو
هذا ما يبررلچ
ولا يبررلك تسرق
مهما فعلوا من قباحة بعدالته
هم تكليف واني الي تكليف
همة من يخلون بأداء واجبهم من يتخلون عن مبادئهم خو اني مو هم اتخله عن مبادئي
هنا شنو فرقي عنهم
اذا اني كلمن يسيء وكلمن يفعل القبيح أسوي مثله هنا معناهة صرت أشر واحد لأن راح أجمع صفاتهم كلهم
15- الحسد معناه تمني زوال النعم عن المسلمين مما فيه صلاح متى يكون الحسد حرام اذا أظهره بقول او فعل يعني يقول اتمنى فلان يموت حتى آخذ مكانه او يرسب في الامتحان حتى أكون انا الاول
او اي حركة تدل علىً هذه النية
اما اذا فقط كلام داخل النفس ولا يسمع به أي شخص لا اشكال فيه
نعم قد يجعل الشخص مرض بالغيرة والحقد والحسد ولكن لا اثم عليه
من الآفات هالمحرم
الحسد
تدرون شنو يعني؟
من أحسد انسان معناهة اعترضت على الله
معناهة مارضيت بقسمته وشككت بعدالته
معناهة اگله اني أفهم منك وأعرف شلون أقسم بس انت ما تعرف ومانصفت! 💔
الله سبحانه يعرف بينه أكثر من نفسنه
أكو شخص ما يفيده ان يكون غني ولو شاف فلوس يطغى فهنا الله يرحم بيه يخليه فقير
وشخص مايفيده الفقر بس يصير فقير ويحتاج يضل يقتل ويسرق ويعيث بالفساد فالله يلطف بيه فيغنيه
وحدة لو انطاهة جمال تروح لطريق يبعدها عن الله فيخليها جمالهة على گدهة رحمة بيها
وثانية يخلقها يتيمة لأن وهي يتيمة تصير قوية وينطيهة شي يعوضهة علم أو قوة شخصية فتصير مبدعة
لو انطاهة الأب چان ممكن ما توصل ل الي وصلته
المصطفى يتيم
سيد محمد باقر يتيم
سيد محمد حسين الطباطبائي عظيم العظماء هم يتيم
وأغلب المبدعين هم أشد وأقسى ماعانوا بالحياة
تمعنوا بسيرة الأنبياء وأهل البيت والناجحين
تلگوهم شگد حياتهم مانت مليانة معاناة وجهاد وصبر
اذن الله مو ظالم
الله كل شي يفعله بيه حكمة ومصلحة
احنه عقلنه قاصر ما يدرك هالأشياء لو أدركنا ربما مانتحمل الأسرار والحكم
لهذا نعترض ونحسد
نعترض على تقسيمه للأرزاق
وهذا من أقبح ما يكون
أتمنى النعمة الي عنده تنسلب منه وتنطه الي
أكو شي إسمه غبطة وهذا مو حرام
يعني أشوف الشي الي عنده حلو وأتمنى الله يرزقني مثله بس مو على حساب ينسلب منه
مثلا أشوف فلانة واصله ومتعلمة ومثقفة أگول هنيئا الهة ربي يديم هالنعمة وبنفس الوقت أتمنى ان الله يرزقني هالنعمة وأسعالهة هم
هذي يسموهة غبطة ومابيهة حرام
لهنا أخذنا 15 محرم
الدرس الجاي نكمل إذا أبقانا الله وإياكم
