الصحابي الجليل حبيب بن مظاهر الاسدي
جان يلقب بشيخ الأنصار لأنه كان اكبر مجاهدين الأنصار اللي شاركوا وي الامام الحسين عليه السلام بواقعة الطف
نجي نتكلم عن حياته قبل الواقعه مع الحسين
طبعاً للعلم هو جان بعهد النبي محمد صلى الله عليه وآله وسلم موجود وبعهد الأمام علي عليه السلام موجود
شارك بعدة معارك مع الأمام علي عليه السلام
معركة جمل وصفين ونهروان
جان من زعماء بني أسد متميز بشجاعته
حتى في بعض الأيام جان يمشي وي الأمام علي عليه السلام
الامام گال ياحبيب يزينك العلم والحلم والشجاعة وسيزينك شيء رابع
حبيب گالة وماهو الشيء الرابع ياسيدي
الأمام بلغه الشيء الرابع ستنال الشهادة في سبيل الله عز وجل
بقة حبيب ينتضر الشهادة لأن الامام بلغة بيهة جان بكل معركة يشارك وي الامام كل الاصحاب يستشهدون الا هو يبقة
حتى بأحدى المعارك حبيب گال للامام لقد بشرتني بالشهادة فمتى أنالها
الامام علي بشره أنك ستنال الشهادة مع ولدي الحسين
للعلم الامام الحسين جان صغير بوقتهة من صار هذا الكلام يعني حبيب بقة هاي الفترة كلهة لحد ماكبر الامام الحسين عليه السلام وأجت واقعة الطف
حبيب جان عايش بالكوفة جان وي مسلم بن عقيل ياخذ البيعة من أهل الكوفة للامام الحسين
زوجتة جانت إنسانة مؤمنة والانسان مهما تقرب من الله عزوجل كلما زادت عندة المعرفة ببعض الأمور يعني مثل منگول يبقة يحس بالشي قبل لايصير وهاي منزلة عظيمة مو أي انسان يگدر يحصلهة
وهم گاعدين أثناء وجبة الأكل غصت زوجته من الطعام فقالت الله أكبر يا حبيب الساعة يرد كتاب كريم من رجل كريم وفعلاً ساعات قليلة واندگ الباب راح حبيب من الطارق قال: أنا رسول وقاصد الحسين عليه السلام إليك فقال حبيب: الله أكبر صدقت الحرة يعني زوجتة بما قالت أنطا الكتاب وقرأه فسألته زوجته عن الخبر فأخبرها فبكت
أحنة ذكرنا أنو زوجتة جانت أنسانة مؤمنة فمن اجة المرسال عرفت انو الامام الحسين عليه السلام بحاجة الأنصار الة ومن ضمنهم زوجهة حبيب بن مظاهر وگالتلة بالله عليك يا حبيب لا تقصر عن نصرة ابن بنت رسول الله فقال: أجل حتى اقتل بين يديه فتصبغ شيبتي من دم نحري
الرسالة جانت👇
بسم الله الرحمن الرحيم
من الحسين بن علي عليه السلام إلى الرجل الفقيه حبيب بن مظاهر أما بعد: ياحبيب فأنت تعلم قرابتنا من رسول الله وأنت اعرف بنا من غيرك وأنت ذو شيمة وغيرة، فلا تبخل علينا بنفسك يجازيك جدي رسول الله يوم القيامة
حبيب من وصلتة الرسالة
گال لابد اروح لنصرة الأمام الحسين وطبعا هذا شرف عظيم مو اي انسان يحصلة وخصوصاً بوقتهم بس ماننسى انو الامام علي بلغه انك من المستشهدين على يد ولدي الحسين عليه السلام فهو عرف وقت موتة قد قرب
انطة أمر للعبد اللي عندة مثل منگول الخادم هم قبل يسمونه العبد
حتى لايصير شك عند اهل المدينة انو هو رايح لنصرة الامام لان اهل الكوفة جانوا يعاندون اللي يروح لنصرة الأمام فهو اي شخص جان يسألة اذا تريد تروح او لا ماينطيهم الخبر الصح لأن بعض الاهالي وصلهم علم انو حبيب وصلتة رسالة طلب قدوم من الامام الى كربلاء للنصرة
بلغ العبد أنو ياخذ الحصان الى نهاية البستان بالكوفة وگالة اني اجي وراك حتى يصير علم عند اهل الكوفة انو حبيب رايح للبستان وحتى محد يلاحقة
حبيب أتأخر على العبد بقة ينتضر فترة مثل منگول ساعه ساعتين ماكو حبيب
بهل اثناء العبد يتكلم وي الحصان يگلة ياجواد لو سمح لي سيدي لامتطيت صهوتك ولذهبت بكل وجودي للحسين لأنصره
سمعه حبيب گال شنو من حب هذا اللي يخلي العبيد هيج تگول وتنصر الحسين والوزراء كلمن منتهي بمنصبة
حبيب گالة انت حر لوجه الله بعدهة العبد گالة سيدي انت تذهب للجنة وانا هناا
فراحوا اثنينهم لكربلاء لنصرة الحسين بن علي
نكمل حديثـنا...
وصل حبيب بن مظاهر الى كربلاء وشارك مع الحسين بواقعة الطف جان من ضمن الاصحاب اللي على ميسرة الحسين كشف الله عن قلبه حجب النور فاطلع على الاسرار والانوار والحقائق والدقائق
قاتل قتال الابطال وهو يقول:
أنا حبيب وأبي مضاهر
فارس هيجاء وحرب تسعرُ
أنتم أعد عدة واكثرُ
ونحن أوفى منكم واصبرُ
ونحن أعلى حجة واظهرُ
حقاً وأنقى منكم وأعذرُ
أقبلت عليه قبيلة بني تميم قتل قتال الابطال
حتى قتله الحصين بن تميم لعنه الله وقطع رأسه الشريف
تذكر الروايات انه جان عمرة بيوم عاشوراء ٧٥ سنة
قبره في كربلاء المقدسة بجوار ضريح الامام الحسين عليه السلام
فالســلام عليه يوم ولد ويوم استشهد مع الحسين ويوم يبعث حيا
