ليش الصلاة؟
وشدعوة هالتركيز عليهة مو أكو أعمال غيرهة زينة مثل الإحسان للناس و غيرهة ...
ركزولي شوية بكلمة "صلاة" شنو تعني هالكلمة؟ صلاة جاية من (الصلة) صلة العبد بربه! الأفضل نگول صلة الحبيب بحبيبه !! الي متفضل علينه بكل هالعطايا والنعم شنسميه إذا مانسميه حبيب،
زين ب شنو تنفعنه الصلاة؟
أول شي ( حل المشاكل)
شلون بلا الصلاة تحل مشاكلنه 🤔
بالصلاة إنت واگف بين إدين الحكيم! شنو تگله ( إياك نعبد وإياك نستعين ) هاي ال "نستعين " ركز بيهة يعني هنا طلبت القوة وبعد شتگلة( إهدنا الصراط المستقيم) هنا طلبت منا ال إرشاد وهنا يجي المكسب الثاني من الصلاة وهو (الإلهام) يلهمك الأفكار والخواطر والحلول للأشياء الي إستعصت عندك!
لهالشي ينقل عن أحد العظماء چان إذا وگفت عنده مسألة يتوضأ ويصلي ركعتين ويرجعلهة فتنحل!
كل هالشي تسويه الصلاة ! يي لأن إنت جاي تطلب من أحكم وأكرم الكرماء
كل هالشغلات تحصلهة إذا چانت نيتك ( الإتصال بالله عز وجل) ...
(وإستعينوا بالصبر والصلاة) الله تبارك وتعالى يگول!
( الصلاة عماد الدين من أقامها أقام الدين) الرسول ص يگول!
( فلم أجد أثقل من الدين) الإمام علي ع يگول!!
الدين بثقله الصلاة تقومة !!
بعد شنو تسوي الصلاة ... تطهر الإنسان من الملكات السيئة والذنوب وغيرهة من النفسانيات المذمومة
(أَرأَيتم لو أنَّ نَهرًا ببابِ أَحدكم يغتسل منه كلَ يوم خمسَ مَرَّات، هل يَبقى مِن دَرَنه شيء؟ قالوا: لا يبقى مِن درنه شيءٌ، قال: فَذلك مَثَل الصَلواتِ الخمس، يَمحو اللَّه بهن الخَطايا) الرسول صلوات الله عليه وآله
مشكلة ...!
آني هم أحب أكون من الي يعشقون صلاتهم ويتلهفون الهة بس ماأحس عندي هالحب أضوج من طاريهة و بالنسبة الي مجرد فرض بس أريد أصليهة وأتخلص منهة شسوي؟ 😞
آني أگلك ليش حتى نعالج المشكلة لازم نعرف سببهة .."
من الأسباب الي تخلي الواحد مايحس بحلاوة صلاته ولا يخشع مو بس الصلاة حتى القرآن يضوج منه أو ع الأقل مايحس ب شي من يسمعه هي شنو تسمع( الأغاني) 🎧🎷 أگللكم شلون:
مو برواية عن الإمام الصادق ع قال: من أصغى إلى ناطق فقد عبده فإن كان الناطق يؤدي عن الله عز وجل فقد عبد الله وإن كان الناطق يؤدي عن الشيطان فقد عبد الشيطان.
القرآن والصلاة من كلام الله أما الغناء ف كلام من الشيطان و الضدين يجتمعن؟
أكيد لا ،،
الأغاني كلماتهة كلهة إحباط وتخدير وحتى الي يگول اني أرتاح من أسمعهة وإن كان هالشعور هو تضليل من الشيطان ومو صحيح تلگه هالراحة الي يگول عنهة مدتهة قليلة وتنتهي ويرجع لنفس وضعه
السبب الثاني هو شنو تشوف و لمنو تسمع ( المسلسلات و الصديق الي تگعد وياه) 🖥👬👭 ...
هالشي كلش يأثر العلاقة وي الله مثل الوردة تريد سقي 🥀🌨 بس تهملهة تذبل وتضمحل بدون متحس ..
شلون أسقيهة ؟
صديقك أو الشخص الي أغلب الوقت تقضيه وياه كلش دوره مهم ب السقي يعني راح تشوف إهتمامك كله يصير بالمواضيع الي هو يهتم بيهة، الكلام الي تسمعه منه راح ياخذ حيز ببالك ويأثر عليك .
الكتب 📖 عامل كلش مهم ب السقي من تستمر بقراءة الكتب الي تحچي عن الصلاة وتجارب الي چانو عانوا من نفس مشكلتك وشلون تغيرو هالشي راح ينطيك معرفة،أمل،حافز وقوة حتى تعالج مشكلتك.
المحاضرات الدينية 🍃 كلش دورهة مهم توعيك وترشدك، إختار الخطيب الي ترتاح لإسلوبه وتحبه أهم شي تحبه لأن بس تحب شخص راح تحب كل شي يگوله ❤️
وأهم عامل يساعدك بالسقي هو ( الإمام الحبيب المنتظر) خليه يكون هو الحبل بينك وبين الله تتوسل بيه بكل خطوة تخطيهة وتطلب العون منه 🤝💗
الأغاني بدلهة بالأناشيد والمناجيات ب أصوات عذبة مثل صوت حسين الأكرف 🦋 راح تضرب عصفورين بحجر هم تزيد تعلقك بالإمام وهم تخلصك من الأغاني وتساعدك بتصحيح صلاتك وتذوق لذتهة ❤️
ثمرة الصلاة نجنيهة بعد الإنتهاء من الصلاة،
جرب غير نظرتك للصلاة من واجب وتكليف إلى نعمة وفرصة لقاء بحبيب كامل جميل ماكو أجمل منه تتحول هالدقائق القليلة إلى شراع محرك لسفينة حياتك ونجاتك توصلك لغايتك ومبتغاك 🌱❤️
ختاما القلبُ الذي لا يتكئ خمس مراتٍ يوميًا على
" وإياك نستعين " قلبٌ أعرج
طوبى لمن أدَّب قلبه 💙
