"نص حواري بين مواهب "أم ليالي" وفاطمة💙..نتابع"
فاطمة :- أيوة نعم..أتفضلي
مواهب بزهج:- ما جاية أضايف انا..عندي كلمتين واقفات في حلقي جيت أقولهم ليك وماشة
فاطمة بذوق:- لو سمحتي إتفضلي..وقفتك قدام الباب كده ما صاح..حتى لو عندك كلمتين
"مواهب دخلت وقعدت في اقرب كرسي وجسمها كلو برجف من الزعل والغضب..فاطمة جابت ليها موية وجات قعدت قصادها.."
فاطمة:- سامعاك💛
مواهب:- طبعا انتي ولدك بِدرُس في جامعه() كلية إدارة..المهم الحصل إنو( وسردت ليها قصتهم كلها من الالف للياء...وإنهم بكذبوا عليهم وماشين في اتجاه معاكس..حكت ليها عن ضربها لليالي وكل حاجه عملتها فيها وتهديداتها..وهي حاسة إنو كده صح)..أها قولك شنو!؟..ح تتصرفي مع ولدك كيف!؟..أنا عارفة إنو الاولاد أصعب من البنات بس خلي يقيف في حدو ولو بخاف من ابوهو هددي عشان تاني ما يتجاوز كلامكم وو..
فاطمة مقاطعه حديثها :- ثواني يا اخت ثواني..بعيداً عن كذب أولادنا اللي هو سلفاً أنا بررتوا ليهم..إنتي جادة ضربتي بتك!؟...جادة شلتي تلفونها ومهدداها بأبوها و انك تفضحي أصحابها!؟..لو جادة تبقى مشكلة كبيرة..بتك أكيد ح تكون جاتها حالة نفسية..مهما كان تصرفها وذنبها..هي ما كفرت..كنتي تعنفيها ايوة تزعلي منها كم يوم تحرميها من الجامعه يومين ك عقاب..بس تمدي يدك عليها!؟..
مواهب بصوت عالي:- أي بمد يدي وأكسر رقبتها كمان..عاوزاها تمشي في السكة دي يعني لما تضيع..اي واحده بتدخل المجال ده ما نااافعه..عاوزاني استنى لما أشوف بتي ما نافعه!؟..انا بطريقتي دي بحافظ عليها وعلى سمعتها..
فاطمة مستنكرة فعلة مواهب :- انا ما قادرة استوعب...قبل شوية قلتي تابعتي ليهم مسلسل كامل..يعني عشان بقت بتك ومشت في السكة دي يبقى المجال ما نافع!؟ إنتي إنسانة سوية يعني!؟..متأكده أنتي البت دي بتك..يعني والله حرام عليك..انا ما بعرف بتك بس زعلتا عليها جداً..لا وجاااياني بكل وقاحه وبتتكلمي عن ولدي..عاوزاني أعمل شنو..أعمل زيك مثلاً..أضربه ولا أقلع تلفونه ولا أستخدم معاهو أي أسلوب!!..يا أستاذة الجيل ده غير جيلنا..فكراً وجملة وتفصيل..العادات القديمة دي خلصت من زمان..بقى في أساليب جديدة للتربية..يعني ما ممكن أبداً تمسكي ليك بت عمرها 17 أو 18 تضربيها!!..بتك دي لما تكبر وتعجز الموقف ده ما ح يزح من راسها..إنتي أمها وأي شي..بس هي كمان إنسان..بتنفس عندو رغبات هوايات مبادئ...صح غلطت لو هي أو مجدي أو البقية وانا عازراهم..تصرفات الاهالي هي الوصلتهم هنا..ما أديتوهم مجال للاختيار...
مواهب:- أنا بقول في شنو وهي بتقول شنوو!..الكلام ده بقولوا الدكاترة للعيانين المنفسنيين ما لي انا..الواقع غير..
فاطمة:- الواقع ما غير و لا شي..مشكلتكم مستهترين بالطب النفسي..عموماً ما موضوعنا...أنتي حاليا عاوزة مني شنو..المطلوب شنو بالضبط!؟
