_بقيت ابكي بحرقة وماسكة في إيناس شديد..كلهم كانوا مستغربين وبتبادلوا النظرات..مجدي قال لي:- ليالي في شنو بتبكي كده ليه..زول من ناس البيت حصلت ليهو حاجه!؟..أتكلمي الله يرضى عليك..مجتبى قال لي:- ليالي في شنو ليه البكى ده كلوو!؟..مقداد قال:- فهمينا الحاصل يا بت مالك؟؟..زحيت من إيناس الكانت مخلوعة من بكايي وقولته:- بعد المحاضرة نقعد وبفهمكم الحصل شنو بالضبط..دخلنا المحاضرة وهم تركيزهم كله كان معاي..إيناس كل دقيقة تسألني من العلامة الفي خدي "منطقة مُحٌّمَرة"..بعد طلعنا..قعدنا في الكافتريا..مما بدوا يسألوني عن الحاصل بكيت..حرفياً قلبي كان واجعني شديد وما عارفة كيف ح أقدر أنطق جملة زي دي..كيف ح أقدر!!..إيناس قالت:- ليالي نحنا متوترين على فكرة..يا بت الناس أحكي لينا!!؟..مسحتا دموعي وبصوت منتهي من البكى حكيت ليهم الحصل من الاول للاخر..مجتبى ومجدي ديل حسيتهم غضبانين من روحهم غضب..مجتبى قال بنبرة تعنيف :- كلو بسببي..لو ما ضغطت عليكم عشان توافقوا ما كان حصل الحصل..قولته ليهو:- ما تقول كده..وبعدين خلاص ماف شي ح يتغير..حالياً أمي متحكمه فيني شديد..أنا نفسياتي تعبانة..ما قادرة أعمل شي..عاجزة أني اتصرف أي تصرف..مجدي اخد نفس وقال:-
واسي المفروض يحصل شنوو؟!..ح تقاطعينا!؟..قالت:- برة الجامعه..متضطرة يا مجدي ياااخ...مقداد قال:- طيب خلاص أهدي..كل حاجه بتحصل لخير💙..طالما أمك طلبت منك كده يبقى تسمعي كلامها..بعدين نحنا ح نتلاقى جوه الجامعه ومعاملتنا ما ح تتغير اتجاه بعض فشنوو أسمعي الكلام وأكسبيها..مجتبى قال ليهو:- أنت مجنون..بعد الوصلنا ليهو ده كلو هي ح تتراجع!...اي صح طريقتنا كانت غلط..مشيتنا ورا تحقيق أحلامنا كانت غلط..وهم السبب..هم الوصلونا هنا...ليالي أنتي ما ممكن تقيفي في النص..ما عشانا لا عشانك💙..قولته ليهو:- مجتبى افهمني..الموضوع ده أتحسم خلاص من الصعب أشتغل معاكم تاني وحتى من الصعب أرجع لهواياتي..أبوي لو عِرف بالموضوع ده مُشكِلة..مابعيد يقعدني في البيت..كله عندو سهل و عادي إلا الكذب..وأنا كذبت عليهم واستغفلتهم...إيناس بس كانت بتبكي على حالتي..واصلتا:- أنتو واصلوا شغل وما توقفوا أبداً..وعليكم الله حاولوا ما تتواصلوا معاي...عشان لو واحد فيكم بس حاول يتواصل معاي أمي ح تنفذ تهديداتها لي..وبكده نحنا ح ننتهي قبل ما نوصل للعاوزنو...واثقة أنكم ح توصلوا حته بعييييدة💙..مجتبى كان بعاين لي وزهجااان قال:- حته بعيدة ما فيها أنتي..ما عاوزين نوصل ليها...وقام على حيله..إيناس قالت:- مجتبى..قال ليها بنرفزة:- ما مجتبى ياخ ما مجتبى وطلع من الكافتريا..ومجدي لحقه...مقداد قال لإيناس:- م تزعلي منووو..طبيعي يتزاهج في واحد فينا..الموضوع صعب...ختيت يدي فوق يد مقداد وقولته ليهو:- أنت طيب شديد..كنت متمنية أوقاتنا للنهاية تكون لطيفة..ما علينا..إيناس ح أكتب ليك أدوات المكياج السينمائي في ورقة ح تمشي تجيبيهم مفهوم..وكل يوم تحتضري فيديو عن كيفية التعلم..انا ما ح أكون معاكم..وعشان الشغل يمشي ضروري تكونوا عاملين المكياج..إيناس كانت بتعاين لي بس بدون تتكلم..كتبت ليها الادوات كلها ودموعي بتخزلني وتنزل...!
