"بعد مرور فترة الاجازة"
"على لسان مجتبى"
_نزلنا الجامعه..السمستر ال6..مقداد امتحن ملاحقه والحمد لله اشتغل فيهم كويس ومرَّ...في الفترة ديك بدا يلمع ويظهر اسم "أصحاب الابداع" زي زمان واكتر🎀💕..في يوم ليالي جات الجامعه مُبوذة وزهجانة..سلمت علينا وقعدت..قولته ليها:-خير يا طير..مالك قالبة خلقتك!!..قالت:- لا والله جاي تسألني مالي كمان..ليكم فترة ما على بعضكم..بقول لنفسي اصبري ح يجوا يحكوا ليك ما تستعجلي..لو في شي مهم كان جوو كلموك...طلع في حاجات مهمه وانا ما جايبة خبر..قولته ليها:-قصدك على موضوع المدرسة صح!؟..قالت لي ببياخة:- يا سلام عليك..هو في موضوع غيره..مجدي قال ليها:- كنا ح نكلمك انتي وإيناس بس..قاطعته:-ما بس..ما بس ولا حاجه..حتى لو نحنا بقينا ما في اصحاب الأبداع..أقلاها تكلمونا بتعملوا في شنو..مش نسمع من برة زي الغُرباء..حتى انت يا مقداد ما حاولتا تكلمنا..مقداد قال ليها:- ما تظلميني انا والله عرفت في فترة الاجازة ..وهم ما كلموكم عشان ما تنشغلوا بيهم بس..يعني ابدا ما كان قصدهم حاجه..مجدي قال:- انتي زعلانه يعني؟؟..لو كلمناك اسي او في وقتها..كانت ح تفرق!؟..قالت:-طبعا بتفرق..انت ما شايف انكم غلطانين..قال ليها:-أبداً..نحنا لمن فكرنا في الموضوع ده أنتي امورك كانت جايطة وإيناس ما هنا..وحصل وفاة خالة نفيسة ومن الطبيعي جداً نتلخم..وايوة صح ما حبينا نكلمكم في البداية..عارفة ليه!؟..عشان كنتوا ح تمنعونا بحجه الخوف من الاهل ولو كشفونا ممكن يحصل فينا أسوأ من الحصل ليكم..فقررنا نكتم على الموضوع..وياهو عرفتي..يبقى الزعل ما حبابو يا لياليِّ💕..بقت تعاين لينا بالصف ولسة صارة وشها..قولته ليها:-خلاص ياخ اضحكي..ده ما موضوع زعل ليك..تلقاك منفسنة وقولتي تجي تجنني فينا😏..بقت تبرر لي وتعمل حركات بوشها الكلُ جضوم ده😂😂😂..بعد خلصنا محاضرات..طلعنا انا ومقداد على البيت ومجدي قال بركبها وبحصلنا على هناك...أثناء ما نحنا في الطريق إيناس اتصلت علي وقالت:- تبو يا تبو..قولته ليها:- ننوسة كيفك!..قالت:- تمام الحمد لله..فاضي!؟ عاوزاك في حاجه مهمه شديد..قولته ليها:-حالياً في المواصلات..بصل البيت وبديك تلفون..قالت:-طيب تمام.....!
"على لسان ليالي"
_كنت ماشة وراا مجدي وهو قدامي..بتكلم بالتلفون..لما جينا نقطع الظلط..رجع خطوتين لوراء وعاين لي..بقى يوقف العربات لحدي ما قطعنا..قال لي:-ساكتة مالك..زعلانه انتي!؟..قولته ليهو:- ماف شي..قال لي:-تمام..انفصمت فيهو طوالي:- كيف يعني تقول لي تمام...انت ما حاسس أني زعلانة ومضايقة..كيف تسألني سؤال زي ده..وبقيت اكورك..كان بعاين لي مُستغرب..رافع حاجب ومُنزل حاجب..قال لي:-ليالي على ما اعتقد سألتك وقولتي ماف شي..تاني الدراما شنو!..قولته ليهو:- دراما دي لي انا يا مجدي!؟..بقى يلتفت حوالينو وقال:-ماف زول غيرنا في الشارع..وماف غيرك قدامي..خلينا نمشي بدل تتاخري..براك عارفة المواصلات صعبة كيف..قولته ليهو:-ما ماشة ماعندك شغلة معاي..مش انا بعمل دراما يلا امشي خليني..بعرف درب المواصلات بوين..قال:- ليالي..لا إله إلا الله..عمرك ما شفتيني بتعصب صح!؟..لو سمحتي ما تخليني أنفعل وامشي قدامي..يلا عشان جد الزمن إتأخر...قولته ليهو:- تمااام..بس ارجع البيت القاك حاظرني واتس ومكالمات فاهم..عشان الدراما حقتي ما تقتلك..قال لي:- لقيتك جادة بتحاسبيني على كلمة طلعت مني بكل عفوية..والله كلام لكن..وابتسم ابتسامة كده ومسح راسه..قولته ليهو:- اي بحاسبك وابقى أعمل حساب لكلامك تاني..جوا مارين بتين واحدة قالت لي:- اسي ده بزعلووو..يخسي عليك يا هناية وبقت تضحك ومجدي بتفصل..بعد مشت ضربته بشنطتي في كتفه..قولته ليهو:-بتتفصل مالك!؟..قال لي:-عشان كلامها حقيقي..اسي انا بزعلوني!!..كنت بعاين ليهو وما برمش وهو نفس الشيء..قبل يزح عيونه قال:-أستغفر الله من دي عيون يا شيخه💕..فصلني بقيت ابتسم وحكيت ليهو إنو قبل كده أتقالت لي نفس الجملة دي من صحباتي..طبعا هو بقى محتار في تقلبُاتي دي..ركبني المواصلات ومشى...!
