لا هو تكلم ولا ناا نطڨت بحرف بڨيت نتبع فيه بعيوني دخل يديه بين السياج و حمل حفنة تراب في إيده و هو يشبحلي بعينيه و خزرته ما طمن
وناا أش تلڨاني الدجاج لكحل حسيته يدور فوڨ راسي ودمي فار في عروڨي هواا تو تعدي علي حرمة أرضي و نااا منغفرش لغالط خلي إذا كان واحد من عرش العياري .
هزيت إيدي علي ما تعلي و شلحطه بسوط الخيل علي إيده لين خلي أمارة وكب حفنت التراب
خزرلي و عنيه تڨدح نار لكن سبڨته في لكلام ماخليته يزيد حرف معايا
_أسمع أاا ولد العياري لباش يتعدي علي حرمة أرضي في حضوري أمه مزالت مجابتهاش .
فيڨني صوت ضحكته وڨلي :
_ أخيرا شبحناك ها بنت الماجري ما غلطوش لڨالو ڨوية بعشرة رجال ولله أما ما تخافيس الصاع يرجع صاعين .
_ ههه أسمعني هاا ولد الناس ولله ركابيا ترخفو من كلامك خوفتني أسمع نڨلك نصيحة روح لمك تضامدلك جروحك و ڨلها تعطيك كويس حليب بلعسل باين فيك عندك السخانة ولا إنت جلدك يحك فيك علي طريحة تنسيك لحليب لرضعته في صغرك إنت تهددني نااا هههه ضحكتني أسمع راني بنت واد ماجر وحق الرب لكريم لخلقني لو كان جا سيفي معايا ما نبعثك لأهلك و راسك هازه في إيدك و ها ويني تشلحية باهية باش تعرف حرورت عرشي .
مشيت ناحيت فرستي ركبتها و خليت كان لعجاج و هو مزال حال فمه مخلتلاش حتي النفس باش يرد علي كلامي خليه يستاهل هلغراب لطاح علي عڨاب لعشية خليه ضوڨته درس ما ينساه مدامه عايش ..
********
