رمالي هاك الكلمات و خلاني و خرج و لله حسيت نار ڨايدة في ڨلبي كل شي و لا أهلي وبباي ما نريدلهم مضرة و منطيڨ فيهم دڨة الشوكة
**********
رجع سي علي لدوار بعد ما أيس إنو يلڨاها و زيد ظلام هليل ڨول عامل عليه بلعاني ظلام كيف ڨلبو تو و بنتو غايبة ...
روحت الناس الكل حيلها مهدود و زيد خيوط الصبح علي بزوغ يطلعو النهار و
يخرجو يحوسو عليها وصل لدار يلڨي النسوة الكل ملمومين في الحوش
جميلة تحكي :
_ مقڨابليني الرجال كيف داخلين للحوش لكن ما شميت ريحة كبدي معاهم جريت و تعلڨت لسي علي في رڨبته
_ جيتك بجاه ربي ويني الغالية ويني كبدي راني مشوية عليها .. ما نطڨ بكلمة يخزرلي في عيوني و عيونو معمرة بدموع نعرف ڨلبه مشوي كيفي ولا أكثر
ترميت في حضن امة خديجة ناري شاعلة علي بنيتي عمرها ما فرڨتني ...
_ وسعي بالك ها جميلة بنيتي و خلي ربي في بالك و دعيلو ترجعلك بنيتك سالمة
كلنا مشوين علي فراڨ الغالية هاو الفجر ڨريب يطلع تو نخرجو الكل نحوسو عليها و بإذن الله نلڨوهاا ....
الناس الكل بالها مشغول حتي لين جاء مصطفي يجري لسي علي و نفسه مڨطوع هذا واحد من خدامته
_ يجماعة راني شبحت خيال علي حصان جاي من بعيد يمكن جايبلنا أخبار باهية
خرجت الرجال الكل و علي راسهم سي علي يرجو في لخيال حتي لين ڨرب كلو لابس في الأكحل حتي وجهه لابس عليه لثام ما يبان كان عينيه .
هيئته ما تبشر بخير هذا موش عبد جايب خبر باش يزهي لڨلوب لحزينة
_ بديتكم بسلام يا عرش ماجر طال علي مسامعي انكم أهل معروفين بشدة و الڨوة و الشرف عندكم أغلي من روح بنادم لكن هام ڨالو بنتكم غايبة عندي كلمتين ليك يا سي علي باغيك تسمعهم و نرجع علي طريڨي .. بنتك ماهي ضايعة و لا مخطوفة راهي عاشڨة في ولد العياري و بايتة عنده والصباح تكون عندك
الصدمة كانت بادية علي وجوه الحاضرين ولي سمع كلام ها لغريب العڨل يڨول صدقه و الڨلب مو رايد يستوعب هلكلام و يڨلو ياا علي بنتك تربية رجال ما تعمل هلعملة ..
