حلمي

الحلقه 25

#حلمي
__________________

الحلقه الخامسة والعشرون
_____________________________
كتابة : BOSHRA HADIA

معاذ يلبس في نظاراته : فات بسرعه الاسبوع هدا ماتوقعتاش يمر هكي
جمال : حتى الصبر كويس
معاذ : ماصبرتش زين لاكن يالله فات في حاله
جمال : شنو ماشالله شايفك واتي ؟
معاذ : اي هي ننزلو
جمال : استنى خلينا نشوفو محمد قبل ونشوفوه بيركب معانا ولا!
معاذ : وعلاش بنستنو شني بنركبوه ع ضهورنا؟
جمال : ياغبي افهم
معاذ : شنو بنفهم ؟
جمال : اذا محمد ركب في نفس رحلة الطيارة يلي بنمشو فيها نحنا! ... معناها محمد هوا وراء كل شيء والتعطيلة هادي يلي صارت
معاذ بإستغراب : كيف مافهمتش ؟؟
جمال : يعني اذا محمد ركب في نفس رحلتنا معناها هوا السبب يلي عطل رحلة الاسبوع يلي فات لما كنا ع اساس بنمشو وبعدها ماصارش
معاذ : اي كمل!
جمال : ونحنا توا خلينا نشوفوه قبل
معاذ : قصدي علاش مايبينيش نمشي شني بنركب ع ضهره انا ؟
جمال : لا ، بس ممكن خايف ع خطيبته ويقول مانبيهاش تقعد هي وياه في نفس المكان وانا مش موجود! ..... ومرات عارف او ملاحظ نضراتك ليها وشك في الموضوع
معاذ : اهااااا ، صار هكي!.... يعني توا من كلامك هذا نفهم ان محمد هوا يلي عطل الرحلة يلي فاتت؟
جمال : ممكن
معاذ : وربي لو كان يطلع هوا موته ع ايدي
جمال : عموماً توا هيا خلينا ننزلو لأن مش وقت قتل حالياً
معاذ : اي هيا مش ناقصني تأجيل رحلات اني

صالح ؛ فتح هاتفه وشاف رسالة من بثينة ليها حوالي فوق من اسبوع، وخش على الشات وقعد يقرأ ومصدوم والدموع في عيونه وهكي كان المكتوب :( كيف حالك؟...طبعاً سامحني لأن عارفة انك حتضايق لما تعرف اني هاجرت مع البحر في الهجرة الغير شرعيه بتاريخ 17\4\2015، وانا مش عارفة امتى حتشوف رسالتي المهم انا هاجرت في التاريخ هذا، وطبعاً اكيدة تسأل ليش انا درت هكي ؟ الجواب هوا اني انا مالقيتش راحتي من الوقت اللي ماتو فيه عيلتي، تشردت من بعدهم وانت عارف قصتي مافيش داعي نشرح، وانا توا مش عارفة نوصل للمكان يلي انا نبيه او لا لأن احتمال 50% نموت والقارب يغرق بينا، المهم حبيت نقولك ان انت احسن وارحم انسان قابلته، وربي يسعدك ويوفقك... مع سلامي ليك.. بثينة)
صالح ؛ طاح منه هاتفه وهوا مازال مش مصدق يلي قراه، رفع الهاتف من جديد وبعتلها وقال في عقله مرات تكون خدعه منها! او يطلع الايميل مش ليها!... لاكن مع الاسف الايميل هذا هيا عطتهوله وتأكد انها من التاريخ يلي بعتتله فيه معش فتحت نت 💔، طلع صالح وركب في سيارته واتجه للبحر على طول، وهوا في طريقه يقول ان البحر ممكن تكون فيه ريحة بثينة او اخر نضرات كانوا من بثينة 💔

_______________________
كتابة : BOSHRA HADIA

-وصل معاذ لِ الاردن ومعاه جمال ومحمد 😂، ومعاذ حالف ان لما بيروح بيقتل محمد على العمله يلي دارها، وجمال يزيد فيه ويشجع فيه 🙂😂، المهم خلوني نقوللكم طبعاً صارو مواقف مش عاديه في الاردن توا بنكتبهم