#حلمي 10
__________________
الحلقه العاشرة
_____________________________
كتابة : BOSHRA HA
وحطيت رجلي في الهواء وبنطيح .. وفجأة يآذن الفجر بصوت ارعبني وخوفني لدرجة طحت لاورا .. قعمزت وبديت نبكي ونسمع في الآذان واستغفرت .. كأنها كانت معجزة من ربي .. وكأنها كانت اشارة من الله ليا ❤️، وحسيت وقتها كأن الله غضب مني !! بعدها بديت ندعي ونبكي
عهد : يارب سامحني على الشيء يلي كنت بنديره 💔.. ياربي كون معاي وعطيني القوة من عندك .. انت الوحيد يلي قادر تساعدني يارب
وبديت ندعي لِربي ونبكي لحد ماكمل الآذان وخشيت نزلت للحوش خطمت من على شقة معاذ ووقفت شبحت فيها وتنهدت وقعدت واقفه فترة ونزلت ..
وحمدت ربي ان ماشافتي حد بالحالة يلي انا كنت فيها 💔
(حتى ولو كنا في اشد لحضات الحزن
نحنا قادرين على حمد الله وشكره دائما)
عهد : خشيت للحوش وخديت توتة ودوشت وانا نبكي من دون صوت حسيت جسمي كأنه قرف كأني معش طايقاته 💔، خديت ليفة وصبيت فيها كلوركس وجميع المنظفات وحكيت بيها جسمي وانا مانحس بي شي 💔
بعدين توضيت وطلعت صليت الفجر وحسيت بي راحه كبيرة ❤️
بذات لما سجدت لِربي بكيت هلبا لين راسي وجعني وكملت صلاة ودعيت لِربي يقويني ويكون معاي .. بعدين جبت فراش وفرشته جنب ماما ورقدت .
ثاني يوم ⛅️
قبل ع اساس بيديرو الاسبوع (المحضر) شوي ماصارش عشان قالو ان الدواعش انتشرو في سرت ، والناس يلي كانت بايتة في العرس كلهم روحو ، وبابا قال بنروحو حتى نحنا مرات يسكرو الطريق ونحصلو هنايا
المهم ضمينا وطلعناهم .. ووقفنا في الجنان
ماما : والله قبل كان خاطرنا نقعدو نعاونوكم ونحضرو الاسبوع لكن الله غالب
عمتي هدى : اي خسارة والله
بابا : المهم كان صارت حرب في جهتكم تعالو لِطرابلس عندنا ماتقعدوش لين الحرب تقوى وتحصلو !
عمتي : ان شاء الله .. هوا ان شاء الله مايصير شي بس
بابا :ان شاء الله
عهد واقفة مع البنات وتهدرز
هاجر : عهد خيره وجهك ويديك مخبشات ؟
اني ارتبكت ومعش عرفت شن نقول : ءاا امس في اليل طلعت للجنان ولقيت قطوسة شديتها خبشتني
هاجر : حي عليك رايحة حالة .. استني نجيبلك كريم تخفي بيه الاثار الواضحة
اني : لالا ماتجيبيش عندي تو ندير
هاجر : خلاص ادهني توا خير من غدوا تمشي للجامعه ويحسابوك ضاربينك ويتشمتو فيك
نهى : اي صح
هاجر : اووف تعرفو نحس في روحي بنروح معاكم يا عهد
اني بِفرح : الله عادي ياريت
هاجر : المشكله ان ماما بتقولي لا!
اني : علاش ؟
هاجر : حوسة العرس والدنيا هاذي من بيضمها ؟
اني : اي صح .. خسارة كان في ايدينا راه قعدنا وضمينا معاكم
نهى : عادي كل حد بضروفه .. تو نقعد معاهم انا ونساعدهم
هاجر : سلمها الفالحة يلي بتساعدنا
____________________________________
كتابة : BOSHRA HADIA
أنت تقرأ
حلمي
General Fictionقصه ليبية تحكي عن بنت تسعى وراء تحقيق حلمها لكن هل هي ح تنجح في تحقيق حلمها؟! وح تواجه هلبا صعوبات وتحديات حتى توصل للشيء يلي هيا تتمناه ،! وفيه قصص حب ح تصير وبعض من الكوميديا والغموض في الرواية 🧡
