حلمي

الحلقه 8

#حلمي
__________________

الحلقه الثامِنة
_____________________________
كتابة : BOSHRA HADIA

اول ما خشينا للصالة لقينا الناس زحمة وجتني حلا وقالتلي
حلا : الله محلاك تهبلي ❤️
اني : حتى انتِ تهبلي
حلا : اي نسيت نقولك ، مبكري في بنت سألتني عليك وقلتلها مازالت ماجت
اني : عرفتي اسمها !
حلا : لالا لكن قالتلي لما تجي تعاليلي تلقيني في نهاية الصالة
اني : اها .. فوتيها ما تقوليلهاش
حلا : براحتك .. ومشت

جتني ماما
ماما : مشالله عليك تهبلي طالعة ❤️
اني : حتى انتِ تهبلي والله وبديتي صغيرة 😂❤️
ماما : فِ عينك حتى من دون مكياج حلوة وصغيرة
اني : اي مشالله عليك ❤️
ماما : خليني نمشي نشبح عمتك .. ومشت

اني خشيت جوا وخديت كرسي وقعمزت وبديت نفكر .. زعما من البنت يلي تبيني !
بعدين جوني اية وايات ونهى وهاجر قعمزو حداي

اية : بالله اشبحو العزوز يلي مقعمزة وتفنص في يلي تخطم من يالاها
ايات : شكلها عندها ولده اتدورله
اية : اي شكلها
اميمة : يا بنات بنحكيلكم موضوع وعطوني رايكم وخلوه بيناتنا
كلنا : احكي نسمعو فيك !
اميمة : اني خطيبي "معتز" ليه فترة معش مهتم بيا لا يسأل ولا يتصل ولا يهدرز ولا حتى يبعت في مسج !؟
نهى : بالك عنده ضروف ؟
اميمة : لالا ليه فترة هِك من حوالي اربعه شهور حسيته ما يدورش وحتى لما اني نتصل بيه يتكلم معاي بِجفاف ومعنداش احساس او لهفة للكلام معاي وخديت حتى رآي هاجر وقالتلي سيبيه واني ما نقدرش نسيبه !
اية : تعالي نقولك ..
اميمة : شني ؟
اية : اول شي هذا انتِ قلتي ليه فترة ما يدروش ولا يتصل ، نقولك علاش
كلنا : علاش
اية : يا حنه هذا لاقي غيرك ولاقي البنت يلي يبيها هوا ، انتِ اميمة من نوعيتك البنت المسالمة يلي من اي شي تستسلم وعندها كل شي عادي حتى تضحي بحياتها غير ما تديرش مشاكل ، وتخاف من ابسط الاشياء يلي يحاولو يهددوها وما تخبرش حد ، وحسيتك مزودتيها معاه يعني ديما انتِ يلي تكلمي وديما انتِ يلي تهدرزي وتبدي معاه في الدوة وملصقه روحك فيه هلبا ، لكن هوا شكله من النوع يلي يحب البنت القوية يلي متخافش من شي شخصيتها ما يهزاهاش ذكر عندها عزة نفسها وكرامتها اعلى حتى من برج خليفه ! وهوا شكله دور غيرك ولاقاها .
اميمة : قصدك هوا يخون فيا توا 💔؟
اية : تي لا مش قصة يخون فيك .. لكن عادي ره توقعي اي شيء منهم الرجالة ، المهم توا تعالي نقولك ع طريقه يا اما تخليه يجي للطريق يا اما يزيد يضيع منك .
اميمة : قولي !
اية : معش تقعدي تتصلي بيه خليه هوا يلي يفقدك خليه يستاحشك ، يستاحش صوتك ، ويستاحش حبك ليه ، ويستاحش اهتمامك الزايد وكل شي فيك، وقللي من الكلمات المعسولات عشان هوا يستاحشهم ، وتعاملي معاه نفس ما يتعامل هوا معاك ، وخلي ثقتك في نفسك عالية ❤️ حتى ولو كان سيبك عادي شن فيها ، يسيبك توا خير من يسيبك لما تتزوجي شن معش في غيره!
اميمة : مشكلتي اني نحبه بس 💔
ايات : واني تعالي نقولك ع دُعاء كنت نستخدم فيه لما نشوف واحد طرف وقلبي يتعلق بيه 😔😂💔
كلنا : 😂😂😂
ايات : المهم هي اسمعو الدعاء قولو ( يارب امحي هالحب من قلبي )
ورددوه عشرين مرة
اميمة : علاش نقوله توا ؟
ايات : 🤦🏻‍♀️تي لا مش توا .. هذا كان سيبتو بعض وقلبك قعد معلق فيه
اميمة : اها .. هوا انشالله لا لكن حسيت روحي بديت نكرهه من معاملته الحق
اني : ديري زي ما قالتلك اية وتوكلي ع الله
اميمة : انشالله
وفات الوقت ونحنا نهدرزو ونضحكو وبعدين خشت العروس الحق طالعه حلوة ،
وبعدين جت الفرقه ونضنا اني والبنات رقصنا والجو حلو
وبعدين جابو العشاء ووزعو ع الناس وبعدين خش العريس والبنات قريب ماتو فيه طالع يهبل 🥺❤️
واني لما شفته نزلت مني دمعه مش عارفه علاش ممكن تذكرت امير💔!