نواف : تميم ما كأنا بدينا نطلع عن الحواري ؟؟
تميم بإستهبال : بخطفك
نواف : عن الاستهبال
تميم: ان بيت جدي تقريباً كأنه مزرعه ومبتعد عن المدينه وجوها
نواف : والله اتوقع انه مبعد عن الطرق بعد كم لنا وحنا نمشي في البر ؟
تميم بضحكة : باقي لنا نص ساعه ونصل
نواف : انت بس متأكد ماضعنا؟؟
تميم : ههههههههه لا لا ابشرك ماضعنا نمشي على الطريق الصح
وبعد تقريباً نص ساعهبدت تلمح مجموعه بيوت ماتتعدى ٢٠ بيت وعلى يمينها بيت كبير مسور مايبتعد كثير عن البيوت اللي قبل لكن اللي يشوفها يلاحظ المسافة اللي بين البيوت والبيت الكبير
وانتبه نواف على ان تميم بدأ يتجه للبيت الكبير دقايق وهم متعدين الاسوار بدأ نواف يتأمل النخل اللي يحيط به تجي ٧٠ نخلة والورد والفاكهة كان على قد ماهي بسيطة الا انها تشرح الصدر وجميله وقف تميم قدام البيت وأشر لنواف ينزل نزل واعطاه الخوذه وانتبه لتميم اللي يتكلم مع هندي قرب منهم وهو يقدر يسمع الحوار
تميم : السلام عليكم
: وعليكم سلام بابا
تميم : وش اخبارك ياكريم
كريم : الحمدلله واجد زينه انتا بابا كويس ؟
تميم وهو يضحك : ههه كويس ياكريم واجد كويس بابا كبير فيه؟
كريم : مافيه موجود بيت هدا بابا في دكا
تميم : يالله ياكريم انا جيب معي ضيف بروح لبابا كبير سلم عليه انا وضيف
وراح لنواف اللي قريب منهم : حياك يانواف حياك جدي عند الدكة وراء البيت
مشى تميم ووراه نواف دقيقتين ويقبلون على دكة وعليها شايب يتقهوى وقدامه مقداع تمر ودلة وفناجيل نوف يوم شافته صارت في توتر مايعلم فيه الا الله لدرجه مشيها صار يتباطَء وهي تشوف الشايب يوقف وهو يهلي ويرحب بتميم وتميم يحب راسه وخشمه
: ياهلا بولدي ياهلا
تميم وهو يحب راسه وخشمه : يالله ان تحييه تريح يايبه تريح
: معك احد ياتميم؟
: ايه يا يبه معي خويي نواف الساجي
جد تميم بنظرة تفحصيه : يامرحبا ومسهلا يالله حيه
نواف وكن التوتر بدأ يخف : الله يبقيك
جد تميم : اقلط ياضيف الرحمن
دخل الدكه نواف وهو يقول : الله يزيد فضلك
جد تميم : صب القهوه ياتميم
تميم : ابشر
جد تميم : كريم يا كريييم
ابتسم تميم وهو يدري وش جده ناوي عليه
الجد : والله ليموت واجبك ذي الليلة
نواف بتفاجؤ : استهدي بالله ياعم
الجد : والله وهذا انا حلفت انه ليموت واحد من الذبايح لك
نواف : كثر الله خيرك وافي يا ابو
تميم بهمس : سياف ابو سياف
نواف بإستدراك : يا ابو سياف
جاء كريم وبدأ ابو سياف يأمره انه ياخذ من شبك الذبايح واحد من احسن الخرفان يذبحه ويوديه للطباخ
تميم : جدتي في البيت ولا ؟
الجد : الا في البيت رح سلم عليها قدهي متولهه عليك
تميم بفرحه : اجل ارخصوني
نواف والجد : اذنك معك
بعد ماراح تميم
الجد : وش انت منه يانواف
نواف وهو يسوي حاله واثق : من آل الساجي يابو سياف
الجد : أجل خوالك من النيار؟
نواف وقلبه يدق بخوف : لا بالله خوالي ماهم من النيار
الجد بتمعن : اجل التولان ؟
نواف وهو ناوي يختصرها : انا ياعم يتيم ورضعت من اكثر من عايلة وخوالي بكذا صاروا كثير
الجد بنظرة تسليكيه : الله يرحمهم
اما عند نوف في نفسها : ياذا الشايب ما اعنده مع مرور كل هالسنين ماتغير هو هو عنيد وراسه يابس اشك انه عرفني بس يسوي نفسه لا ياربي لا ما ابيه هو بالذات يعرفني خاصه وهو يدري باللي صارلي
صح اني اكن له في قلبي محبه وادري انه يعتبر ابوي واحد من اولاده وابوي كان يشوف فيه الابو اللي فاقده وهو كان احن لي من اللي من دمي بس ما ابيه يعرفني اخاف تميم يدري بعدها
جذبها من افكارها
الجد : تقهو ياولدي
مدت الفنجال وصب لها
الجد : كيف تميم بالمدرسه
نواف : تميم مخلص المدرسه ياعم صار بالجامعه
الجد : اللي هو جامعه على قولتكم ولا مدرسه بشرني هو ترك عنه المشاكل
نواف : من تميم؟
الجد : انا اتكلم عن غيره
نواف : والله استغربت لان تميم ما خبرته راعي مشاكل
الجد : الحمدلله تركها يعني ياما محطته بالخيزرانه ابي يعتدل كل يوم مجرجرني للمدرسه فالق ذا في راسه وكاسر خشم ذا ولا كاب مويه على استاذ
نواف بضحكه : يوووووه كل ذا من تميمه!؟
الجد : ما جاك شي بس تصدق احيان امشيها له لاصار الحق معه
نواف : هههههههه
الجد: لا وازودك من الشعر بيت كنت امسك اللي تهاوش معه وامحطه بالحيزران على ظهره والوكاد ان تميم ماشافني ماكنت ابي اشجعه على العنف مع زمايله
نواف : كل ذا ولا تعوده عالعنف ياعم
الجد : ماهو عنف لاضربته جده واعلمه عالمرجله ولا عد تقولي ياعم قولي يبه ماتشوف تميم يقوله (شاف التردد على وجه نواف ) ولا قولي ياجد مافرقت بس امنعني من ياعم
قاطعهم جية تميم وهو يقول : مسرع خذيتوا على بعض
نواف : والله ان جدي ينحط عالجرح يبرا
تميم وهو يجلس : لا فيه تطورات ادامك تقول جدي
الجد : تعلم من خويك يالجلف
نواف : والله صدمتني ياتميم ماتوقعتك راعي مشاكل
تميم بصدمه : امداكم تحشون فيني !؟
الجد : معاذ الله منك لاحشينا فيك ولاشي بس اقوله عن سواد وجهك يوم كنت تجرجرني بالمدارس
تميم : انا وش اللي اقرد حظي وجبتك هنا !! ماجاء في بالي الماضي الاسود
ضحك الجد ونواف عليه
تميم : وبعدين يايبه ترا نواف ذا ماهو بأقل مني بالمشاكل
الجد وهو يلتفت على نواف : هو صادق باللي يقوله يايبه؟
نواف : كذوب انا ماني بقليل شر بس ما اوصل مواصيله
تميم : تدري شلون تعرفت عليه يايبه؟؟
الجد : كيف ؟؟
تميم : دخل هو وخويه غرفتي منحاشين من حارس السكن
الجد : منحاشين!؟
تميم : جاء حظر التجول وهم انحاشو من المدرسه ولما رجعو على حظهم بدت الدوريه يشوفون احد برا السكن
الجد بصدمه : وطلعت مو هين يانواف
تميم يضحك على صدمه جده واحراج نواف
نواف بتبرير : ما انلام ياجد تدري متى يبدا حظر التجول؟؟
الجد : متى؟؟
نواف : 7 الليل انطق خلعي لازان الجو رفضو نطلع
الجد : ماعليك ملومه ياولدي لو منك كل يوم منحاش اللوم عليهم
سبع مره بدري
نواف بحماس : كفو ياجدي
ضحك عليه تميم وجده
الجد وهو يقوم : يالله بالاذن بشوف كريم وش صار عليه
تميم ونواف : اذنك معك
بعد مابعد الجد
نواف : يانذل ليه فشلتني عندي الجد؟؟؟
تميم : لاتشيل هم ابوي ماعليه قده متعود على مشاكلي
نواف وهو يشرد بفكره (ابوي) اه ياكم هالكلمة ثقيله على لساني ماقدرت حتى اجامل جد تميم واقوله يبه
تميم : وش تفكر فيه
نواف بشرود : افكر بكم انت محظوظ بجدك
تميم : صح اني ما اعرف ابوي بس ربي عوضني بجدي هو اللي رباني مع عمي سياف الله يرحمه
نواف : تدري ياتميم انا بعد يتيم ام واب بس الفرق اني اذكرهم لكن جدي ماكان مثل جدك كان محملني مسؤليه موت ابوي وكأني انا اللي بغيته يموت ماهو قدر كاتبه الله له (وبشبح ابتسامه) :كان يلومني عشان....
________________
من العايدين عقب الزحمة ♥️♥️
وكل عام وانتم بخير ياحبايبي 🌹
اعجبتكم عيديتي¿¿
أنت تقرأ
بدأ القناع يثقل!
Actionبين الحاضر والماضي بين الحب والفقد بين الطفولة والحرمان بتتوقع ان القناع بيبدأ يثقل !! اغلب الناس عايشة بأقنعة وكل شخص يتميز بقناعه لكن ! فيه من صار يعيش ويعيش اللي حوله بوهم ! ايه وهم يتقنص شخصيه غير شخصيته من اجل ان ينسى ويكمل حياته ! لدرجة نسى ش...
