بدأ القناع يثقل!

19اسرار؟

ماخلاه سند يكمل وهو ياخذ الاوراق بسرعة وصار يفكر وين كان عقله فيه يوم وثق به ومثل الغبي تبعه؟ بس وقف قراءه وهو مطير عيونه : وش ذا
نواف : ماقريته؟
سند : قريت بس مافهمت اوبالاساس ما استوعبت وش ذا الكلام يانواف
نواف بإبتسامة سخرية:..........

نواف بإبتسامة سخرية: المكتوب في الاوراق الاول انك بتكون شريكي في الشركة
سند وقف بصدمة : مايصلح! وشلون ؟؟
نواف : بسيطة وقعت على اوراق وهذي الاوراق عقود رسميه
سند : يانواف فهمتني غلط وانا اخوك انا يوم كنت احكي لك اللي صار واللي يصير مابغيت منك صدقة ولا شفقة انا اعتبرتك صديق الا أخو مع ان حنا ماتعرفنا الا من كم يوم بس..
قاطعه نواف : سند يشهد الله ان العقود اللي وقعتها ماهي شفقة ولا صدقة انا ربي مارزقني بأخوان من امي وابوي بس عوضني فيك وفي اخوياي وتأكد اني انا اللي محتاج لشخص يكون ذراعي اليمين شخص اثق فيه ويكون ذكي وفطين وانت ماشاء الله موفي هالمواصفات
سند : وان وافقت انا، ابوي؟
نواف : عمي الفيصل عارف وموافق ويدعي لنا بالتوفيق اما الارباح انا 60% وانت 40% مني التمويل ومنك الاشراف وبنتساعد عشان نكبرها وتضبط امورنا وتذكر انت بتكون الواجهه للشركة بمعنى انت الرئيس هذا اللي كنت اقولك اني محتاجة شخص عشانه انا مايمديني اطلع نفسي للناس فيه من يطاردني ومالقيت من هو كفو لها الا انت ياسند
سند : اعتبر اللي قلته تم ، بس ليه يطاردونك
نواف سكت وسرح
سند حس ان ماوده يتكلم فقال يصرف : طيب وسالفة العين وبيع البيت اللي صدمتني فيها وشهي ؟
نواف بضحكة : هذي قرصة اذن عشان ماتثق بأي احد بذي السهولة
سند : بس انت مو اي احد
نواف بتفكير : هذي الدنيا مافيها امان وانا اخوك توقع كل شي ماهو متوقع
سند : والعقد الثاني وش هو؟ ؟
نواف : هذاك العقد عقد تمليك
سند بستغراب : تمليك؟
نواف : ايه تمليك بيت
سند شهق بصدمة : بيت؟!
نواف : انا خذيت على نفسي عهد اني اخلصك من العصابة بس انت ما راح تتخلص منها الا اذا غيرت بيتك و
قاطعه سند بحرج : يانواف والله اللي تقدمه كثير كثير وانا مقدر اخلاقك وكرمك بس البيت اعذرني ما اقدر اقبله
نواف بإستنكار : وش اللي ماتقبله صار لك ياسند
سند بسرعة : برجعه كلها ورقه اوقعها وخلاص يرجع لك والله يكثر خيرك والله اللي سويته مايسويه اللي انا من دمهم
نواف : افا يا ذا العلم اعتبرني اخوك والاخ مهما فعل ما يوفي اخوه واللي سويته صدقني ماهو شي (وبعصبية) وبعدين البيت صار بإسمك وانتهى وما اسمح لك ترده واذا ماتخاف على نفسك خاف على عمي
سند صد بوجهه بتأثر
فهم نواف ان سند على حافة البكاء
وقف وضمه وهو يقول : لاتشيل هم وانا فيه تكفى طلبتك ماتردها
سند ضمه وهو متأثر على الأخر أخر مرة حس بالسند والأخوة وهذا الحضن الحنون كان مع رائد اخوه قبل لايصير له الحادث ويتوفى
قرب من اذن نواف وهمس : الله الشاهد ان جميلك دين علي ماني بقادر ارده
نواف : مابين الاخوة هالسوالف وتعال شوف بيتك (وبإبتسامة عريضة) حاولت اخليه نفس اللي وصفته
سند بتعجب : بنروح له اللحين ؟
نواف عطاه نظرة وقال : وليه نروح له؟
سند : غبي انت وشلون نشوفه وحنا مارحنا له ؟!
نواف : الغبي انت والله انت في بيتك يارجال
سند تنح وقال : انا فيه ؟ (وتلفت حوله) هذا البيت اللي تقصده !؟
نواف : لا والله اللي استخف وش جاك ؟! ايه هذا البيت اللي حنا فيه بيتك انت عساه اعجبك بس اذا ما اعجبك عادي غيرناه
سند : ذا قصر ماهو بيت يانواف !
نواف : يارجال قدرك اكثر يالله اعجبك ولا؟
سند : اعجبني اعجبني
نواف : اجل تعال شوفه نبدأ اول شي بالحديقة اللي بغيتها لعمي الفيصل
سند شاف الحديقة اللي انبهر فيها من اول ماوطت رجله الارض وهو يفكر هذي حديقة ولا مزرعة؟!
نواف : السموحة حاولت اخليها مقبولة الى حد ما بس الوقت ما اسعفني يمدينا بعدين نجيب البستاني يضبطها
سند : مقبولة ؟ ياخي تجنن ماتوقعت بيوم اني بتمشى في ارض عشبها واشجارها زي كذا وكلها ورد وش عاد بالسكن !
نواف : الحمد لله انها اعجبتك
وكمل نواف اللفة اللي على البيت<اللي يبي وصف البيت قد وصفه سند في بارت (مابعد الضيق الا الفرج ) وطبعاً اعتبروا نوف حطت ذوقها الفخم عليه>
نواف : يالله ياسند خلنا نجيب عمي وعمتي للبيت انا قلقان عليهم من العصابة ماني مرتاح لين ادري وش وراهم
سند بتوتر : ابوي يدري بالبيت؟
نواف : لا
سند بتنهيدة : اجل ماهو بساكنه ابوي واعرفه كم مرة عمي عبد العزيز الله يرحمه حاول فيه بس ابوي عنيد ماقبل منه شي
نواف وهو يحاول يسحب منه الكلام : هو عمي الفيصل من متى يعرف عبد العزيز الله يرحمه
سند : يعرفه من قبل الجامعة
نواف : واضح ان عمي يغليه
سند : لو ما اغلاه من يغلي ؟ (وبتصريفه ) انت تعرفه
نواف بتوتر : من مايعرف عبد العزيز النيار خيره وشهرته سابقته
سند : صادق
حس نواف ان سند مايبي يتعمق بالموضوع لبس الكمام والنظارة والقبعه ودق عالسواق يجيه : يالله ياسند لبيتكم نشوف وش بيسوي ابوك
سند : طيب ، بس ليه هالتخفي كله؟
نواف بسرحان : فيه ناس ما ابيهم يعرفوني
______________
عند اسيل تفكر : انا لازم اتوظف يكفي اني انا وهديل ناخذ من تقاعد امي ناية وهي ماهي مكلوفة فينا حتى اني لاحظت انها تقصر في علاجاتها عشان ماتحسسنا بالنقص
كملت صنع الشاهي واخذت الحب وشغلت التلفزيون تتابع مسلسلها
جتها هديل وهي تنظم لها : انتي ماتتركين عنك هالكواريه ما ادري تحبين فيهم
اسيل بإستهزاء : اذا ما اعجبوك الباب يوسع جمل
هديل : تحسبيني مقابلتك حب فيك ولا في الكواريه ؟؟ لا ياحبيبتي حباً في الشاهي
اسيل شمقت في وجها : من يومك مصلحجيه
كملت اسيل تتابع المسلسل ثم تكلمت بعد تردد : هديل
هديل وهي تشرب الشاهي : نعم
اسيل : انا قررت اتوظف
هديل بصدمه : ليه ؟ ناقصك شي محتاجة شي ؟
اسيل : لا
هديل : طيب؟
اسيل : انا ما ابي اثقل على امي ناية فوق ما امثقلة عليها اللحين
هديل : انا وانتي واحد انتي اذا ثقلتي عليها معناها انا مثقلة بعد
اسيل بحزن هزت راسها : انتي بنت اختها وبنتها بالرضاعه بس انا بنت ضرتها
هديل بغضب : وش هالكلام ؟؟
اسيل : صدقيني ياهديل انك انتي وامي ناية اهلي اللي اعترف بهم وغيركم اهل بالاسم بس تبين راحتي؟ خليني احس اني مو ثقيلة وذا بيصيراذا توظفت
قامت هديل بضيقة : بكيفك انا ادري وكلنا ندري انك اذا قررتي شي مانقدر نقنعك بغيره
ولا حطو في بالهم ان فيه من يسمع كلامهم وهو يمسح دموعه
_______________
اخذ نواف اكل من المطعم وهم رايحين لبيت سند
دخلو وسلمو عليه الفيصل : كان ما اغلبت نفسك ياولدي الخير كثير
نواف : والله ياعم مشتهيه بس ما اعرف اتلذذ بالاكل الا احد معي ياكل ومافيه الا عني وسند اللي وجيهم تفتح النفس للأكل
الفيصل : هههههه والله ياولد انك تعرف شلون تجيب الامور لصالحك
نواف : مواهب ياعمي مواهب
اكلو وغمز نواف لسند انه يروح وفهم سند انه بيفاتح ابوه
نواف وهو يمد عقد البيت للفيصل : ياعمي اقر اللي كتب
الفيصل بحواجب معقودة: عساه خير
مرت ثواني وهو يقرأ بعدها طاحت الورقة من يده و....
_______________________
السلام عليكم والرحمة
اسفة عالتأخير
من منكم يصوم العشر ؟