Fast Food

Chapter 21

On repeat: Honesty-Billy Joel

***

Nakatakda ang kasal ni Trish sa darating na Pebrero.

Habang abala ang magulang niya at ang magulang ni Marky sa paghahanda, ang nasa isip niya ay ang sinabi ni Angie.

Tama nga kaya siya sa sinabi na kapag hindi siya magdedesisyon, ibang tao ang gagawa nito para sa kanya?

Kapag nakikita niya ang excitement sa magkabilang panig, doon niya napapatunayan na malamang totoo nga ito.

Naisip niya si Marky.

Nagdesisyon ito.

Kung tama o mali man ang ginawa niya, gumawa siya ng aksiyon.

Hindi siya nanahimik.

Ginawa niya ang sa tingin niya ay tama para sa kanya.

Hindi nga lang siya nagtagumpay.

Ang naging kapalit ng desisyon niya ay ang pagpunta ng magulang niya sa bahay nila para kausapin ang magulang niya.

Wala silang kaalam-alam na pinagkasundo na pala sila.

Pinuntahan niya si Marky sa ospital bago ito lumabas.

Nanonood ito ng TV at nagulat ng makita siya.

Nangayayat ang dati niyang nobyo.

Ang kanang kamay ay bagong palit ang benda.

Hinila niya ang isang upuan at umupo sa tabi nito.

Kinumusta niya si Marky.

Inangat nito ang kanang kamay.

"Heto nagpakatanga." Pilit itong tumawa.

"Alam mo naman siguro kung ano ang pinunta ko dito di ba?"

"Nasabi sa akin ni Mommy."

"At payag ka sa gusto nilang mangyari?"

"Mahal kita, Trish. High school pa lang tayo, alam mo na iyan. Wala ka ba talagang nararamdaman para sa akin? Hindi mo ba talaga ako minahal?" Nagmamakaawa ang mga mata nito.

Tiningnan niya si Marky.

Nasa ospital ito dahil sa ginawang desisyon.

Dahil nagpakatanga siya.

Pero nilakasan niya ang loob at ginawa ang bagay na dudurog sa puso ng mga magulang niya.

Naisip niya kaya ang mga ito ng maglaslas siya?

Ano kaya ang tumatakbo sa isip niya ng ginawa niya iyon?

"Trish, hindi mo ba sasagutin ang tanong ko?"

Kung hindi ka magdedesisyon, ibang tao ang gagawa noon para sa'yo.

Iyon ang laging pumapasok sa isip niya.

Kapag nasa trabaho siya at nakikita na parang hindi apektado si Angie sa nangyari sa kanila, nasasaktan siya.

Nanghihinayang sa pinagsamahan nila.

Hindi mahirap mahalin si Angie.

Ang totoo nga, masuwerte ang taong makakapiling nito.

Kapag nagmahal kasi si Angie, buong-buo.

Siya ang may problema.

Hindi si Angie o si Marky.

Naguguluhan siya sa sarili niya.

Naiipit sa gusto niya at sa mga bagay na gusto ng magulang niya.

Pero kung hindi siya kikilos, hanggang kailan siya padadala sa agos na gawa ng ibang tao?