بحر الفيروز

ظنناها النهاية ولم تكن إلا بداية

ماذا لو كنت مكان معاذ ..
وقال لك الرسول صل الله عليه وسلم "إني ولله لأحبك" ..💜💫

العاشق في جمال النبي يصلّ عليه 💜
صلوا عليه 💜

*______________________________*

السلام عليكم يا حلوين مبسوطة انكم حبيتوا تجربوا روايتي أتمنى تعجبكم 💜
طبعا ديه اول مرة اكتب رواية فبعتذر لو لقيتوا أخطاء إملائية أتمنى تعذروني بس ده ممكن يبقى إن شاء الله في اول كام بارت بس ومش كتير يعني لا تقلقوا 💜
إن شاء الله كل ما هنتعمق في الرواية اكتر هيبقى فيه احداث اكتر وقصص أكتر لذلك متحكموش عليها من اولها لإني مكنتش متمكنة اوي ، لكن وعد مني اللي جاي بإذن الله احلى بكتيرر ومش هتندموا 🙈💜
يلا نسمي الله بقى ونبدأ كدة 😉💜 قراءة ممتعة إن شاء الله 😉💜

*______________________________*

_ مش مطلقها يا بابا ولو حطيت سيف على رقبتي مش مطلقها

= هتطلقها يا حمدي .. انا لا يمكن اسمح ان بنت اكرامي تفضل في عيلتنا بعد اللي عمله

حمدي وهو يشعر انه سيصاب بالجنون : يا بابا احنا مالنا ومال مشاكلكم انا متجوز هدى بقالي 9 سنين وعمري ما شوفت منها حاجة وحشة ولا انت بردو ده غير اني بحبها وهي بتحبني وعندنا بنت وهي حامل في التانية وحضرتك دايما بتعتبرها بنتك انا مش قادر اصدق ازاي عايزني افرط فيها لمجرد ان حصل مشكلة بينك وبين والدها

= هدى فعلا بنت حلال ومشوفناش منها وحش بس ابوها ابن الراجحي زودها معايا اوي المرة ديه وانا مش هسمح ان حتة منه تفضل في عيلة أيمن الادهم وبنتك ديه لازم مراتك تسقطها كفاية البت الاولانية اللي هتفضل رابط بيني وبينه طول العمر غصب عن عيني ديه

حمدي : بالنسبة لموضوع الحمل ده فانا هعمل نفسي مسمعتش حاجة عشان اكيد حضرتك مش مدرك بتقول ايه و ..

قاطعه أيمن (والده) بانتفاضة وغضب وبصوت عالٍ : مش مدرك ليه شايفني عبيط مثلا ولا ايه اسمع يا حمدي اقسم بالله يا تطلقها وتنهي الموضوع ده يا اما لا انت ابني ولا اعرفك وهتبقي برا العيلة وحتي الورث هتتحرم منه سامع ولا لا

نظر حمدي بصدمة وشهقت والدة حمدي وانتفضت قائمة : اهدى يا حاج أيمن مش للدرجة ديه ان..

قاطعها الحاج أيمن : اسكتي انتي .. حمدي .. يا اما تطلقها دلوقتي اهو يا اما تاخد مراتك وبنتك واشبع بيهم مش عاوز اشوف وشك تاني

حمدي نهض وهو ينظر لوالده بصدمة مما قاله : يا بابا انا مقدرش اكسر كلمة حضرتك بس دلوقتي انت كإنك بتخيرني ما بين عيني اليمين وعيني الشمال وده ميرضيش ربنا

أيمن : وهو يرضي ربنا اللي ابوها عمله ده

دلف عبد الرحمن اخ حمدي في نفس اللحظة من الخارج
حمدي : ممكن حضرتك تبطل تفكر في هدى علي انها بنت اكرامي الراجحي وتفكر فيها علي انها مرات ابنك ..حرم حمدي الأدهم وام حفيدتك