بحر الفيروز

عاصفة

*__________________*

ماذا لو أن القلب الذي كسرته يحبه الله ؟
ماذا لو نمت أنتَ واستيقظ هو ؟
وقال : اللهم إني مغلوبٌ فانتصر

الكاتب / أحمد الشرقاوي

*__________________*

لَعَمْري لأهلُ العِشقِ فيما يُصـيبُهُم
أحقٌّ بِأَنْ يُبْگى عَلَيهِمْ مِنَ المَـوتَى ؟

_ العباس بن الأحنف "المحب اللطيف" ❤️✨

*__________________*

" اااااااااه جاموسة راحت تقابل جاموسة "

غناها كلٌّ من يمان وزياد ومالك ومهند وكلٌ منهم يمتطي بغلته التي تسير في اتجاه البيت وهم يرتدون تلك الجلباب القصيرة التي كانت تظهرهم كالبلهاء او بتعبير أدق كما قال يمان "عاطف في العيال كبرت"

أكمل مهند وهو يلحنها : .. ااااااااااه جاموسة راحت تقابل جاموسة يا ليلي مالقاتهاش جاموسة يا ليلي .. لقتها بقرة يا عيني يا ليل

" اااااااااااه "

أكمل بها الثلاثة خلفه قبل أن ينفجروا ضاحكين ليردف مالك بضحك وقد أنهوا الأغنية : تاني تاني

الثلاثة بضحك وفي صوت واحد : لااا
أكمل زياد : ابوس ايديكم بلاش احنا بقينا مُهزقين اوي ، كفاية لحد كدة احسن الواحد كرامته اتسوّت بالأرض في المشوار ده والله

يمان : فعلاً .. كان يوم لطيف جداً يا ريت مايتكررش تاني

ضحك الأربعة بمرح ثم أردف مهند : الإنسان اشتاق لسريره اوي بجد .. مش مصدق اننا ممكن نروًح البيت بعد كل ده والواحد يرجع لأوضته وسريره ينام في سلام وأمان تاني

مالك : الواحد كان بيقعد يعيّب على القاعدة في البيت وبيتنمر عليها وعلى طول عايز يبقى برا .. لو قعدت يوم بس في البيت ببقى مش طايق نفسي .. دلوقتي انا نفسي بس اشم ريحة البيت حتى .. بجد وحشني اوي .. ثم وجه نظره للسماء : وعد عليا والله يا رب لو رجعت مش هتنمر على قاعدة البيت تاني بس ارجع

يمان : هنرجع بإذن الله متقلقش .. فعلاً الواحد مش بيحس بقيمة الحاجة غير لما يتحرم منها .. ربنا يهوّن الباقي من الطريق خلينا نروّح بقى ونرتاح

مهند : إن شاء الله .. انا مش مصدق اني ورايا مدرسة كمان بعد يومين بعد كل ده .. انا محتاج اسبوعين راحة في البيت أساساً اتعافى م اللي حصلي

مالك : كلنا والله مش انت بس

أكمل الأربعة الحديث وهم يركبون الماشية التي تتوجه ناحية بيتهم ويتمنون أن لا تقابلهم عقبات أخرى في طريق العودة

*________________________*

عاد الجميع للبيت وسمع كلٌّ من ريهام وسيف وسارة صوت البوابة فأخبرت ريهام سارة بأن تنتظر في الداخل لتكون تلك مفاجأة لهم ووافقت سارة على الأمر