بعيداً عن دار السلام

الخامس عشر

علامة استفهام ظهرت على راسي

من تصرفاته

بعد مرور ثلاث اشهر

كاعده لابسه دشداشه خفيفه ومدي

اكطعها من الحر

حرارة شابه بجسمي.. وشعري رافعته

لاعلى نقطة براسي.. ماطايقته بس ينزل

اكطعه توه دخل الصيف.. وحراره

وهرمونات الحمل والدراسه.. شخطت فدنوب

وكعدت داقره جانت ساعه ب ٩ بليل

دخل ماهر بيده علاكة حلويات وبيها موطة بالحليب والكاكو علبة جبيرة

سلم وانطانياها

كعدت فتحتها واني مدي افترسها بقضمه وحدة بس عيب من برستيجي كدامه

بعدين تذكرت الخواشيك رحت جبت الي

واله هو ماقبل كال : لا بويه... بالعافيه.. انه اريدن جاي

ردت حميته اله وكعدت اكل وهو يتأملني ويدخن

كتله بنزعاج : ماهر عفيه.. طفيها.. الدخان موزين استنشقه

تنهد وذبها بالنفاضه

بدون اي كلام جارح او عدم مبالاة

ماهر رجع طبيعي.. وكان السبب بهذا

رحنه لدكتورة وخالتي اصرت الا يدخل

يسمع نبض الطفل ويشوفه بالسونار

ولان الدكتورة عرف دخلته

ومن عدها بده معاملته تصير لطيف اكثر

بعد مازهكني بعيشتي..

رحت صبيتله جاي وكملت الموطا كلها

بحيث العلبه صفيتها ومن حركة كلبي

والحلويات هم استلمتهن " صايرة دبة..

بس موحيل يعني ... تقريب بس ١٠ كيلو

عن وزني الاولي"

وكام طلع برا كال : ادخن واجي.. حظريلي

جنطتي لباجر..

كتله تمام وكمت عزلت الهول

وحظرت جنطته لان باجر يسفرون هادي

لاجراء عملية التجميل

وماهر لازم يروح... كونه دايح عفواً

خبرة بسفر والطلعات... ورجل مسؤول

يعتمد عليه" بس بسوالف السفر والدواحة"

حظرتها ومشطت شعري وهو دخل

مدد بالسرير وريحته عبارة عن دخان

خلصت شعري ورحت حظرت محاظراتي

والملابس وتمددت بصفة

توني حطيت ظهري على الفراش