بعيداً عن دار السلام

السادس عشر

وخز قوي بجفوني

والم فضيع بكل جسمي.. احس انشاليت وانشمرت

من مكان عاالي كلش بعدين اهتزازات رجت كل
جسمي

رجعت دخلت لعالم الظلام وماحسيت

اسمع اصوات واريد احاجيهم ماكدر او اكدر

بس ماعرف شكول.. مسطوره وعيوني متنفتح

ادخل واطلع من عالم الوعي

حسيت بظربات خفيفه على وجهي

وصوت مها تبجي وتصيح بسمي وصوت

غريب اول مرة اسمعه.. صوت رجالي متوسل

يحاجيني برجاء يمكن الصوت سامعته بس النبرة

جديدة علية.. ظليت هيج لوقت طويل

واخيراً جفني بده ينفتح

بس ينفتح وينسد بسرعة قبل لا اشوف شي واضح

تسائلت لبرهة اني وين...

فتحت عيوني وضوه قوي دخل

ونيت بألم ونطقت بحروف..وكلمات مخربطة

: اه.. ماما.. بطني.. مممم

مها كانت أول وجهة اشوفه

شفت الدموع مغطيه وجها وعيونها وبشرتها

حمراء دلالة على البجي الطويل المتواصل

همست : مها

ردت بشهة وهي تحضن وجهي : ياعيون مها..

اروحلج فدوة.. يعمري جاوبيني شتحسين متوجعه

استوعبت الوضع بدقايق واني احس بطني

فارغه

عطت بفزع   : ابنيي وين..." نهضت وتأذيت". اااه بطني شصار بيه

بديت ابجي

ومها تكول : الحمدلله علي سلامتج.. ولدتي طفل يخبل.. يروحي ارتاحي موزين عليج

رديت واني ابجي : لا تجذبين.. ابني مات موو..

عطت شلون اولد واني بسابع..

ردت وهي تبوس وتقنع بيه : والله ولدتي وانتي

وطفلج.. مابيكم شي.. قرة عيني بسلامتكم.. ردت

اموت بره من الخوف عليكم

: مها.. ماما  وبابا.. وابني... "رجعت ابجي" اريد ابني

انفتحت الباب ودخلت امي تبجي وتهلهل

: مبروك يمه... الف الحمدلله على سلامتج انتي

وابنج.. كرة عينج بي يايمه

حضنتني وتبوس بيه

ودخل وراها ابويه وهنودي

بابا يبجي يبوس براسي كلهم مهبوطين

متوقعوا راح اجيب

وعندت عليهم الا اشوف الطفل